काठमाडौं– पाँचौ महिला साफ च्याम्पियनसिप अन्तर्गत समूह 'ए' को विजेताका लागि नेपालले बंगलादेशसँग प्रतिस्पर्धा गर्दैछ। खेल विराटनगरको सहिद रंगशालामा दिउँस ३ बजे सुरु हुनेछ।
नेपालका प्रशिक्षक हरि खड्का बंगलादेशविरुद्ध जित निकालेर समूह विजेता बन्ने बताउँछन्। उनले भने,'हाम्रो स्वभाविक लक्ष्य बंगलादेशविरुद्ध जित निकालेर समूह विजेता बन्नु हो,' भुटानविरुद्धको खेलपछि उनले भनेका थिए।
अघिल्लो खेलमा भुटानमाथि ३–० को जित निकालेको थियो। यस्तै बंगलादेशले पनि भुटानमाथि २–० को जित निकालेको थियो। खेलपछि भुटान बाहिरिएका थिए भने नेपाल र बंगलादेश सेमिफाइनलमा पुगेका थिए।
अब शनिबार जित हात पार्ने टिम समूह विजेता बन्ने छ। खेल बराबरीमा सकिए नेपाल गोलअन्तरको आधारमा समूह विजेता बन्नेछ।
यसअघि साफ च्याम्पियनसिपमा नेपाल र बंगलादेशबीच दुई पटक भिडन्त भएको छ। सन् २०१० को पहिलो संस्करणको सेमिफाइनलमा नेपालले आयोजक बंगलादेशमाथि ३–०को जित निकाल्दै फाइनलमा स्थान पक्का गरेको थियो। यस्तै सन् २०१४ मा पनि नेपाल र बंगलादेशबीच सेमिफाइनलमै प्रतिस्पर्धा भएको थियो। सेमिफाइनलमा बंगलादेशमाथि १–० को जित निकालेर नेपाल लगातार तेस्रो पटक फाइनलमा पुगेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
