जनकपुर- नेपाली कांग्रेसका उपसभापति विमलेन्द्र निधीले वर्तमान सरकार अधिनायकवादतर्फ उन्मुख भएको बताएका छन्। उनले ओली सरकारले लोकतन्त्र र संघीयता समाप्त पार्न खोजेको आरोप लगाउँदै जनताको हितमा सरकारले केही गर्न नसकेको आराेप लगाए।
नेपाल विधुत प्राधिकरण कर्मचारी संघको दशौं केन्द्रीय परिषद भेला उदघाट्न सत्रलाई जनकपुरमा शनिबार सम्बोधन गर्दै नेता निधीले ओली सरकार लोकतन्त्र विरोधी, किसान विरोधी, मजदुर विरोधी, अधिनायकवादी, सर्वसत्तावादी र लोकतन्त्रको मूल्यमान्यता विरोधी रहेको जिकिर गरे।
वर्तमान सरकार अपराधी संरक्षण गर्ने सरकार भएको आरोप लगाउँदै निधीले हाल देशमा महंगीले आकाश छोइसकेपनि यसलाई नियन्त्रण गर्न सम्बन्धित निकाय उदासिन रहेको धारणा राखे।
कार्यक्रममा नेपाली कांग्रेसका केन्द्रीय सदस्य गगन थापाले प्रधानमन्त्री केपी ओलीसँग संघीय नेपाल चलाउने योग्यता नभएको बताए। सरकारले गर्नुपर्ने काम नगरी अनावश्यक र नगर्नु पर्ने काम गरेको आरोप थापाले लगाए। एक वर्षमा दुई तिहाई सरकारको उपलब्धि शून्य हुनु नै ओलीको क्षमता नरहेको उनको दाबी छ।
नेता थापाले वर्तमान अवस्थामा नागरिकले सरकार भएको महसुस गर्न नसकेको टिप्पणी गरे। ‘प्रधानमन्त्रीको सपनामा गरिब नागरिक छैनन्। उहाँको सपना पानीजहाज, रेल र प्लेन चलाउन मात्र छ। बाँकी गरिब र विकट क्षेत्रका जनतालाई उहाँले बिर्सनुभयो’, नेता थापाले भने, ‘मुलुकको धेरै स्थानमा समान्य र अतिआवश्यक स्वास्थ्य सेवा औषधि चिकित्सक समयमै पुर्याउन सकेको छैन, गुणस्तरीय शिक्षा दिन विद्यालयमा भौतिक पूर्वाधार र योग्य शिक्षक छैनन्। तर यसमा प्रधानमन्त्रीको चिन्ता छैन।’
नेता थापाले भ्रष्टाचार भएको प्रमाण सरकारले थाहा पाएपनि कारबाही गर्न नसकेको आरोप लगाए। ‘भष्टाचारको कुरा आम नागरिकलाई थाहा छ, तर सरकार मौन छ। हत्या बलात्कारका दोषीलाई सरकार समाउन सक्दैन’, थापाले भने, ‘पीडित न्याय माग्न सडकमा आउनुपर्छ, खोई सरकारले जनतालाई सरकार भएको अनुभूति दिन सकेको?’
जनता कम्युनिष्ट सरकारबाट सचेत हुनुपर्ने बताउँदै उनले ‘दुई तिहाईको पार्टीका दुई पाइलट एक जना संघीयता र अर्का लोकतन्त्रका विरोधी छन्’, उनले भने ‘संघीयता र लोकतन्त्रको विमानलाई गम्भीर दुर्घटनामा पार्ने खतरा छ।
नेपाल विधुत प्राधिकरण कर्मचारी संघका जनार्दन भटराईको अध्यक्षतामा भएको सो कार्यक्रममा नेपाली कांग्रेसका केन्द्रीय सदस्य रामसरोज यादव, प्रदेश २ का कांग्रेस संसदीय दलका नेता रामसरोज यादव, पूर्व सभासद दिनेश प्रसैला, नेपाल विधुत प्राधिकरण कर्मचारी संघका अध्यक्ष पुषकर आचार्य, नेपाली कांग्रेस धनुषा सभापति महेशशंकर गिरी, उपाध्यक्ष सन्तोष यादव, सचिव विशेश्वर यादव, क्षेत्रीय सभापति कन्हैया कर्ण, युवा नेता प्रफुल्लराज घिमिरे, नगरसभापति मनोज साह, युवा नेता प्रवेश चौधरीसहितका व्यक्तिहरुको उपस्थिति रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
