धनगढी- मुख्यमन्त्री कप अन्तर प्रदेश खेलकुद प्रतियोगिता अन्तरगत विभिन्न खेलहरु धनगढीका विभिन्न खेल मैदानमा जारी रहेका छन्। फुटबल र क्रिकेटका खेलहरु तीन दिनदेखि भईरहँदा आजदेखि व्याटमिन्टन र भलिबलका खेलहरु पनि सुरु भएका छन्।
महिला क्रिकेटमा सुदुरपश्चिम फाइनलमा
संघीय प्रहरी कार्यालयको खेल मैदानमा भईरहेका महिला क्रिकेट अन्तर्गतको आज भएको खेल जित्दै सुदुरपश्चिम फाईनल प्रवेश गरेको छ । लगातार दोस्रो जित निकाल्ने क्रममा सुदुरपश्चिमले गण्डकी प्रदेशलाई २१० रनको फराकिलो अन्तरले हराएको हो । यसअघि सुदुरपश्चिमले कर्णाली प्रदेशलाई पनि २२७ रनको फराकिलो अन्तरले हराएको थियो । टस जितेर पहिले व्याटिङ गर्दै सुदुरपश्चिमले २० ओभरमा ४ विकेट क्षतिमा २४८ रन बनायो । यो पारीमा सुदुरपश्चिमकी कविता कुँवरले १०१ रनको शतकीय पारी खेलिन् । उनले ५८ बलको सामना गरिन् । यस्तै विन्दु रावलले ६१ बलमा ७९ रन बनाईन् । गण्डकी प्रदेशका लागि एलिसा लामिछानेले दुई विकेट लिईन् । प्रतिउत्तरमा गण्डकी प्रदेश १५ दशमलव ५ ओभरमा सवै विकेट गुमाउँदै ३८ रनमा समेटियो । झिनमाया थापाले १३ रन बनाउनु बाहेक अरुले रन हान्न सकेनन् । सुदुरपश्चिमका लागि कविता जोशीले ४ विकेट र कविता कुँवरले ३ विकेट लिईन् । फाईनल पुग्ने अर्को टोलीको टुङगो भोली हुने लिग चरणका अन्तिम खेलले लगाउनेछ ।
पुरुष क्रिकेटमा प्रदेश नम्बर १ सेमिफाईनलमा प्रवेश
प्रथम अन्तर प्रदेश स्तरीय मुख्यमन्त्री कप क्रिकेट प्रतियोगिता अन्तर्गत पुरुषमा प्रदेश नम्बर १ सेमिफाईनलमा प्रवेश गरेको छ । प्रदेश नम्बर १ ले प्रदेश नम्बर ३ लाई ७ विकेटले हराएको हो। यसअघि भएको खेलमा प्रदेश १ ले गण्डकी प्रदेशलाई ५ रनले पराजित गरेको थियो। फाप्ला मैदानमा भएको खेलमा टस जितेर पहिले व्याटिङ गर्दै प्रदेश नम्बर ३ ले १६ दशमलव ४ ओभरमा सवै विकेट गुमाउँदै ९१ रन बनायो। सो पारीमा सम कंसाकारले ३६ रन बनाए । प्रदेश नम्बर १ का लागि दिपेन्द्र कण्डेल र पुष्प थापाले ३÷३ विकेट लिए ।
९२ रनको विजय लक्ष्य प्रदेश नम्बर १ ले १७ दशमलव ४ ओभरमा ३ विकेट क्षतिमा पुरा गर्यो । प्रदेश नम्बर १ लाई जिताउन मिनाष थापाले ३८ रन र पुष्प थापाले ३६ रन बनाए । प्रदेश नम्बर ३ का लागि नन्दन यादव र अनिल पौडेलले एक एक विकेट लिए । समुह ए मा प्रदेश १ सेमिफाईनल पुग्दा यो समुहबाट सेमिफाईनल र फाईनल पुग्ने टीमको टुङगो भने भोली हुने लिग चरणको गण्डकी प्रदेश र प्रदेश नम्बर ३ बीच हुने खेलपछि लाग्नेछ।
पुरुष क्रिकेटमा समुह बि मा सुदुरपश्चिम कर्णाली प्रदेश र प्रदेश नम्बर २ रहेकोमा सुदुरपश्चिम र प्रदेश नम्बर २ सेमिफाईनल पुगेका छन् । दुवै प्रदेश बीच भोली हुने लिग चरणको अन्तिम खेलले फाईनल पुग्ने टीमको टुङगो लाग्नेछ । महिला र पुरुष क्रिकेटमा दुवै समुहका विजेता स्वतः फाईनल पुग्नेछन भने उपविजेता तेस्रो र चौथो स्थानका लागि प्रतिस्पर्धा गर्नेछन्।
पुरुष फुटबलको सेमिफाईनल समिकरण पुरा
धनगढी रंगशालामा भईरहेको पुरुष फुटबल प्रतियोगिता अन्तर्गतको सेमिफाईनल समिकरण पुरा भएको छ । आज सम्पन्न भएका लिग चरणहरुका खेलहरुको नतिजापछि सेमिफाईनल समिरकण पुरा भएको हो । समुह ए बाट विजेता बन्दै प्रदेश नम्बर २ र उपविजेता बन्दै प्रदेश नम्बर १ अन्तिम चारमा पुगेका छन् । फुलबारीमको खेल मैदानमा आज भएको प्रदेश नम्बर १ र २ बीचको खेल ३–३ को बराबरीमा सकिएको हो । दुवै टोलीको समान समान ७ अंक भएपनि गोल अन्तरले समुह विजेता र उपविजेताको टुङगो लागेको हो । प्रदेश नम्बर १ का लागि राम तामाङ सन्तोष तामाङ र दिपेन्द्र घिसिङले गोल गरे । प्रदेश २ का लागि सनिल लामाले दुई गोल गरे । एक गोल प्रदेश १ ले आत्मघाती उपहार पाएको हो ।
यस्तै समुह बी बाट आज भएको खेल जित्दै सुदुरपश्चिम पनि उपविजेता भएर सेमिफाईनल पुगेको छ । धनगढी रंगशालामा सुदुरपश्चिमले प्रदेश नम्बर ३ लाई ३–० ले हराएको हो । सानदार जितमा चेतन कठायतले दुई र जीवन चौधरीले एक गोल गरे । यो समुहबाट एक जित र एक बराबरी गर्दै चार अंक सहित समुह विजेता बनेर कर्णाली प्रदेश सेमिफाईनल पुगेको छ । सुदुरपश्चिम प्रदेश कर्णाली प्रदेशसँग यसअघि १–० ले हारेको थियो । धनगढी रंगशालामा भोली हुने सेमिफाईनलमा सुदुरपश्चिम र प्रदेश नम्बर २ तथा प्रदेश नम्बर १ र कर्णाली प्रदेश फाईनल प्रवेशका लागि खेल्नेछन् ।
भलिबलमा लिग चरणका ६ खेल सम्पन्न
पुरुष तथा महिला भलिबलमा लिग चरणका ६ खेल सम्पन्न भएका छन् । आजदेखि सुरु भएको पुरुष र महिला भलिबलका तीन तीन खेल भएका हुन् । महिला भलिबलमा प्रदेश नम्बर ५ ले कर्णाली प्रदेशलाई ३–० को सोझो सेटमा हरायो । प्रदेश नम्बर ३ र गण्डकी प्रदेश बीचको खेलमा प्रदेश नम्बर ३, ३–१ ले विजयी भयो । प्रदेश नम्बर १ ले प्रदेश नम्बर २ लाई ३–१ को सेटले हरायो । पुरुष भलिबलमा पनि सुदुरपश्चिमले कर्णाली प्रदेशलाई ३–१ ले हरायो । गण्डकी प्रदेश र प्रदेश ३ बीचको खेलमा गण्डकी प्रदेश ३–१ को सेटले विजयी भयो । प्रदेश नम्बर ५ ले प्रदेश ३ लाई ३–० को सेटमा हरायो ।
व्याटमिन्टनमा पनि प्रि क्वाटरफाईनलका खेल सम्पन्न
महिला तथा पुरुष तर्फका यु–१९ र यु–१७ उमेर समुहका प्रि क्वाटरफाईनलका खेल सम्पन्न भएका छन् । यु– १९ पुरुष तर्फ प्रदेश ५ का सरोज अधिकारीले कर्णाली प्रदेशका सुजित कार्कीलाई हराए । सुप प्रदेशका प्रकाश चन्दले गण्डकी प्रदेशका प्रकाश मगरलाई किनारा लगाए । सुप प्रदेशका अंिकत चौधरीले प्रदेश २ का सुनिल चौधरीलाई किनारा लगाए । प्रदेश ५ का विनोद पाण्डेयले प्रदेश ३ का अलिस थापालाई हराए । सुपका देशराज रानाले प्रदेश २ का विवेक मण्डललाई हराए । सुपका योगेश खड्काले प्रदेश २ का भोज गुरुङलाई पराजित गरे । जित हात पारेका सवै पुरुष खेलाडीहरुले क्वाटरफाईनलमा आफ्नो स्थान सुरक्षित गरेका छन् ।
यु–१९ र यु– १७ महिला तर्फका पनि प्रि क्वाटरफाईनलका खेल सम्पन्न भएका छन् । यु–१९ महिला तर्फ कर्णाली प्रदेशकी सामना भट्टराईले सुदुरपश्चिमकी विमला ओझालाई हराईन् । कर्णाली प्रदेशकी पार्वती रोकायाले घाईते भएर खेल त्यागेपछि गण्डकी प्रदेशकी विनिता सुनार अघिल्लो चरणमा पुगिन् । प्रदेश ५ की सुष्मा श्रेष्ठले प्रदेश २ की शसि खत्रीलाई हराईन् । ती खेलमा जित हात पारेका महिला खेलाडीहरु पनि क्वाटरफाईनल पुगेका छन् । यु–१७ महिला तर्फ पनि कर्णाली प्रदेशकी पुष शाहीले सुप प्रदेशकी दिव्यानी वमलाई पराजित गरिन् । सुप प्रदेशकी पोयुम तामाङले प्रदेश ५ की सरु बराललाई किनारा लगाईन् । कर्णाली प्रदेशकी अग्रिमा भण्डारीले सुप प्रदेशकी जसुना खत्रीलाई हराईन् । विजयी भएका यो उमेर समुहका महिला खेलाडी पनि अन्तिम आठमा पुगेका छन् ।
खेलकुदलाई मौलिक हकको रूपमा स्वीकार्नुपर्छः सभामुख महारा
प्रतिनिधि सभाका सभामुख कृष्णबहादुर महाराले खेलकुदलाई मौलिक हकको रूपमा स्वीकार्नु पर्ने बताएका छन् । सुदूरपश्चिम प्रदेश सरकारले धनगढीमा आयोजना गरेको प्रथम मुख्य मन्त्री कप अन्तर प्रदेश खेलकुद प्रतियोगिता उद्घाटन कार्याक्रममा सभामुख महराले खेलकुदलाई मनोञ्जनको साधनको रूपमा मात्रै लिन नहुने बताएका हुन् । शुक्रबार उनले पछिल्लो समयमा खेलकुद स्वास्थ्य र शिक्षासँग पनि सम्बन्धित रहेको बताए । उनले संघीयाता कार्यान्यनमा उपलब्धि प्राप्त गरेको समेत बताए ।
उनले संघीयता कार्यान्यनमा बाधा पुगाउने १ सय ६५ कानुन परिमार्जन गरिएको बताए । सभामुख महराले संघीयता कार्यान्यन भएपनि कार्य गर्न भने अझै बाँकी रहेको समेत बताए । उनले केन्द्रले केहि नीतिगत कामहरू गर्नमा ढिलाई गर्दा प्रदेश र स्थानीय तहलाई काम गर्न समस्या देखिएपनि त्यो समस्या छिटै समाधान हुने समेत बताए । सभामुख महराले संविधना विरोधी र संघीयता असफल पार्ने कार्यहरूलाई सरकारले निस्क्रिय पार्ने समेत बताए । संघीयता कुनै विदेशी नभई नेपाली मौलिकतामा हुनु पर्नेमा उनले बताए । कार्यक्रममा सुदूरपश्चिम प्रदेशका मुख्य मन्त्री त्रिलोचन भट्टले जनताका मागहरू धेरै भएकाले कामहरू अझै गर्न बाँकी रहेको बताए । कानुनहरू निर्माणमा ढिलाई हँुदा विभिन्न कार्यहरू गर्न प्रदेश सरकारलाई कठिनाई भएको समेत बताए ।
कर्णाली प्रदेशका मुख्य मन्त्री महेन्द्रबहादुर शाहीले प्रदेश सरकार शुरुवाती चरणमा रहेकाले प्रदेशमा कार्य गर्न धेरै बाँकी रहेको बताए । ऐन कानुन निर्माणमा भएको ढिलाईले गर्दा प्रदेश सरकारले चाहेर पनि विकास निर्माण कार्यहरू गर्न नसकिरहेको उनले बताए । सुदूरपश्चिम प्रदेशका सामाजिक विकास मन्त्री कृष्णराज सुवेदीको अध्यक्षतामा सम्पन्न कार्यक्रममा कार्यक्रममा कर्णाली प्रदेशका समाजिक विकास मन्त्री दलबहादुर रावल, प्रदेश नम्बर १ का समाजिक विकास मन्त्री जीवन घिमिरेले खेलले अनुशासित क्षमता बृद्धि गर्ने बताए । प्रतियोगिता उद्घाटन कार्यक्रम शुरु हुनु भन्दा पहिले शुक्रबार बिहान धनगढीको ट्राफिक चौराहदेखि धनगढी रंगशालासम्म सुदूरपश्चिमका मौलिक संस्कृति झल्किने झाँकी सहित प्रभातफेरि आयोजना गरिएको थियो ।
फागुन २९ गतेबाट शुरु भएको प्रतियोगिता चैत्र ३ गते समापन हुने छन्। ७ वटै प्रदेशका खेलाडी, सफिसियल र प्रशिक्षक गरी झण्डै साढे छ सय जनाको सहभागिता छ । प्रतियोगितामा भलिबल, क्रिकेट र ब्याटमिन्टका खेल महिला र पुरुष दुवैको भइरहेको छ भने फुटबल खेल पुरुषको मात्रै भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
