काठमाडौं– कवि विप्लव प्रतीक अब उपन्यासकार भएका छन्। उनको पहिलो उपन्यास 'अविजित' शनिबार राजधानीको डेजाभू क्लबमा सार्वजनिक भएको छ।
शिक्षाविद् केदारभक्त माथेमा, चिन्तक प्रदीप गिरी र कवि एवं गीतकार दुर्गालाल श्रेष्ठले उपन्यासको विमोचन गरे।
पुस्तकमाथि बोल्दै गिरीले अविजितले क्रान्ति, भ्रान्ति र अन्धविश्वासको कथा बोलेको बताए। 'मरेर पनि नहारेको पात्रलाई उपन्यासमा जीवन्त बनाइएको छ,' उनले भने, 'सात सालअघिको समय र पञ्चायत हुँदै २०४६ सालको आन्दोलनको ऐतिहासिक कालखण्डलाई जोड्न उपन्यास सफल छ।'
शिक्षाविद् माथेमाले उपन्यासको पात्रसँग आफू समाहित भएको भन्दै विप्लवको लेखनको प्रशंसा गरे। 'किताबमा म डुलेका/घुमेका गल्लीहरुको प्रसंग छ,' उनले भने, 'नेवारी संस्कृति र परिकारबारे लेखकको ज्ञानले म चकित छु।'
अर्का वक्ता कवि श्रेष्ठले उपन्यासकारले निकै मेहनत गरी चरित्र निर्माण गरेको र सोही अनुसार कथा अघि बढाएको भनाइ राखे। आफूलाई किताब पढिरहेको भन्दा पनि फिल्म हेरिरहेको अनुभूत भएको उनले सुनाए।
अमेरिकामा छँदा उपन्यास लेख्न थालेको र पटकपटक 'रिराइट' गरेपछि मात्र यो अवस्थामा अविजित आएको लेखकले प्रस्ट पारे। 'अमेरिकाले केही दियो भने अविजित दियो,' उनले भने, 'त्यहाँका विभिन्न ठाउँमा यात्रा गर्दा उपन्यास लेख्ने समय जुटेको हो।' बुबाकै बारेमा लेख्छु भन्ने सोच बनाएरै उपन्यासको सुरुवात गरेको विप्लवले बताए।
कार्यक्रममा उनका पुराना साथी कलाकार सुनिल थापा र गायक दीप श्रेष्ठसमेत सहभागी थिए। दीपले विप्लवले नै लेखेको गीत 'हर रात सपनीमा ऐँठन हुन्छ' गाएर सुनाएका थिए।
उपन्यास बुक हिल पब्लिकेसनले छापेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।