पथरी (मोरङ)- आर्थिक अवसर, खुला परिवेश, अनि ‘म पनि केही गर्न सक्छु’ भन्ने महत्वाकांक्षी भावनाले महिलाहरु परम्परागत चुल्होचौकोबाट बाहिर निस्किएर उद्योग व्यवसायमा लागेका छन्।
मोरङ उर्लाबारीमा बुटिक व्यवसाय सञ्चालन गर्दै आएकी उर्मिला राई (श्रेष्ठ) सफल महिला उद्यमी भएर समाजमा ज्वलन्त उदाहरण बनेकी छन्। उर्लाबारी –३ निवासी राईले सञ्चालन गरेको अविश बुटिक पछिल्लो समय बुटिक पारखीका बीच लोकप्रिय बन्दै गएको छ।
फेसनको आधुनिक दुनियाँमा रमाउन चाहने पछिल्लो युवा पुस्तामाझ उनको बुटिक डिजाइन लोकप्रिय बन्दै जाँदा उनले व्यवसायको दायरासमेत बढाएकी छन्। पाँच वर्षअघि उर्लाबारी–२ मधुमल्ला रोडमा करिब रु पाँच लाखको लागतमा सञ्चालन गरेको व्यवसाय हाल रु ३० लाख बराबरको बन्न पुगेको छ। कुनै समय स्थानीय स्तरमा मात्र सीमित उनको उत्पादन पछिल्लो समय देशका विभिन्न भूभागमा मात्र नभएर विदेशमा समेत रुचाइएको पाइन्छ।
लेङ्गा, कुर्ता सुरुवाल, साडी आदिमा आकर्षक बुट्टा भरेर डिजान गर्न माहिर उनको व्यवसायले अमेरिका, बेल्जियम, अस्ट्रेलिया, हङकङ जस्ता देशमा बस्दै आएका नेपाली महिलाहरुको मन जित्न सफल भएको छ।
उनी जस्तै पथरी शनिश्चरे–१ की मनमाया लिम्बु पनि बुटिक व्यवसायमा निकै सन्तुष्ट छिन्। उनले पाँच जनालाई रोजगारीसमेत दिलाएकी छिन्।
बुटिक व्यवसाय सञ्चालन गरेर राम्रो भविष्य खोजिरहेकी अर्की व्यवसायी हुन् पथरी ८ की निर्मला धिमाल। निर्मलाले तीन जनालाई रोजगारी दिएकी छिन्। त्यसो त उनले डिजाइन गरेको बुटिकका विभिन्न पहिरन स्थानीय कलाकारदेखि राष्ट्रियस्तरका कलाकारहरुले विभिन्न कार्यक्रमहरुमा समेत लगाइसकेका छन्।
स्वदेशमै व्यवसाय गर्नेदेखि लिएर वैदेशिक रोजगारीमा जाने जो कोहीलाई समेत उनीहरुले सुलभ मूल्यमा तालिमको आयोजनासमेत गर्दै आएका छन्। फेसन डिजाइन आफैँमा सिर्जनासँग सम्बन्धित भएकाले यसमा नयाँपन र परिवर्तनको अपेक्षा गरिन्छ। फेसन डिजाइनिङ अहिले विश्वमै करिअर निर्माणका लागि आधार बनेको छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
