काठमाडौं– सुदूरपश्चिम प्रदेश सभाको काम कारबाहीबारे अध्ययन गर्न गण्डकी प्रदेश सभाको प्रतिनिधि मण्डल मंगलबार धनगढी पुगेको छ।
गण्डकी प्रदेश सभाका सभामुख नेत्रनाथ अधिकारीको नेतृत्वमा आएको प्रतिनिधि मण्डलमा उपसभामुख सिर्जना शर्मा, प्रदेश सभाको प्रमुख प्रतिपक्षी दल नेपाली कांग्रेस संसदीय दलका नेता कृष्णचन्द्र नेपाली सहभागी छन्।
यस्तै गण्डकी प्रदेशका सत्तापक्षी प्रमुख सचेतक मायानाथ शर्मा, सचेतक गायत्री गुरुङ, प्रमुख प्रतिपक्षी सचेतक ओमकला गौतमसहित प्रदेश सभाका चारवटा विषयगत समितिका सभापति र प्रदेश सभा सचिवालयका कर्मचारीहरूको पनि सहभागिता छ।
प्रदेश सभा सचिवालयले मंगलबार एक अन्तरक्रिया कार्यक्रम आयोजना गरी दुवै प्रदेश सभाले हालसम्म सम्पन्न गरेका कामकाज, बनाएका ऐन, लगायत अन्य विषयमा अनुभव आदानप्रदान गरेको छ।
गण्डकी प्रदेश सभाको टोलीलाई सभामुख अर्जुनबहादुर थापा, उपसभाममुख निर्मला बडाल जोशी, प्रमुख प्रतिपक्षी दलका नेता रणबहादुर रावलसहित प्रदेश सभा सदस्य तथा सचिवालयका कर्मचारीहरूले स्वागत गरेका थिए।
प्रदेश सभा सचिवालयमा आयोजित कार्यक्रमममा दुवै प्रदेशका संसदीय समितिका सभापतिहरूले समितिले गरिरहेका कामकाजबारे जानकारी गराएका थिए। यस्तै दुवै प्रदेशका प्रमुख प्रतिपक्षी दलका नेता र सत्तापक्षका सचेतकहरूले पनि आफ्ना अनुभव बताएका थिए।
सुदूरपश्चिम प्रदेश सभाका सभामुख अर्जुन बहादुर थापाले प्रदेश सभाका पदाधिकारी र सदस्यहरूले एक अर्को प्रदेशमा भइरहेका कामकाजबारे जानकारी लिन अध्ययन तथा अवलोकन भ्रमण गर्नु आवश्यक रहेको बताए।
उनले एक अर्कोले गरेको कामकाजको बारेमा जानकारी लिने र समीक्षा गर्ने कामले संंसदीय अभ्यासमा प्रदेश सभाहरू परिपक्व हुने बताए।
यस्तै गण्डकी प्रदेश सभाका सभामुख नेत्रनाथ अधिकारीले संघीयताको नयाँ अभ्यासमा रहेकाले अन्तर प्रदेश अनुभव आदानप्रदानकका लागि सुदूरपश्चिम प्रदेशको भ्रमणमा आएको जानकारी दिए।
उनले गण्डकी प्रदेशले यसअघि प्रदेश नम्बर ५ र कर्णाली प्रदेशको भ्रमण गरेको जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
