काठमाडौं– अन्तर्राष्ट्रिय क्रिकेट काउन्सिल (आइसिसी) ले एसोसिएट टिमलाई प्रदान गर्ने अस्थायी एकदिवसीय मान्यताको निर्णय सन् २०१८ मा हुने एकदिवसीय विश्वकप छनोटपछि गर्ने भएको छ। एकदिवसीय विश्वकप छनोट मार्च २०१८ मा जिम्बाबेमा हुँदै छ।
आइसिसीले सन् २००५ देखि एसोसिएट राष्ट्रलाई अस्थायी एकदिवसीय टिमको मान्यता दिन थालेको थियो। आइसिसीले ६ टिमलाई अस्थायी एकदिवसीय टिमको मान्यता दिने गरेको छ। हाल भने अस्थायी एकदिवसीय मान्यता पाएका चार टिम मात्र छन् । जसमा स्कटल्यान्ड, युएई, हङकङ र पपुवा न्युगिनी छन्।
केहि महिनाअघि सम्म अस्थायी मान्यता भएका अफगानिस्तान र आयरल्यान्ड स्थायी सदस्यमा बढुवा भएपछि दुई टिमको ठाउँ खाली भएको हो।
स्कटल्यान्ड, युएई, हङकङ र पपुवा न्युगिनीलाई एकदिवसीय विश्वकप छनोट प्रतियोगितासम्म मात्र अस्थायी एकदिवसीय मान्यता छ। आइसिसीले विश्वकप छनोटमा गरेको प्रदर्शनको आधारमा सन् २०१८ मार्चपछि अस्थायी एकदिवसीय मान्यता प्रदान गर्नेछ।
विश्वकप छनोटमा खेल्ने १० टिममध्ये ४ टिम स्थायी मान्यताप्राप्त छन् । विश्व क्रिकेट लिग (डब्लुसिएल) च्याम्पियनसिपको विजेताले स्वत: एकदिवसीय मान्यता पाउनेछ। यसर्थ विश्वकप छनोटमा ५ टिम एकदिवसीय मान्यता प्राप्त हुनेछन्। बाँकी ५ एसोसिएट टिमबीच अस्थायी एकदिवसीय मान्यताका लागि प्रतिस्पर्धा हुनेछ। ५ टिममध्ये कति टिमले अस्थायी एकदिवसीय मान्यता पाउनेबारे आइसिसीले अहिलेसम्म निर्णय गरिसकेको छैन।
विश्वकप छनोटमा आयोजक जिम्बावेसहित वेस्ट इन्डिज, अफगानिस्तान र आयरल्यान्डले प्रतिस्पर्धा गर्दै छन्। यस्तै, डब्लुसिएल च्याम्पियनसिपबाट नेदरल्यान्ड्स र पपुवा न्युगिनीले स्थान बनाइसकेका छन् । छनोटमा प्रतिस्पर्धा गर्ने ४ टिमको टुंगो लाग्न बाँकी छ।
नेपालको सम्भावना कति ?
अस्थायी एकदिवसीय टिमको मान्यताका लागि एकदिवसीय विश्वकपको छनोटमा स्थान बनाउनुपर्ने हुन्छ। डब्लुसिएल च्याम्पियनसिपबाट एकदिवसीय विश्वकपमा छनोट हुन चुकेको नेपालका लागि अन्तिम विकल्प बाँकी छ। नेपालले डिभिजन–२ को शीर्ष दुई स्थान हात पारे मात्र अस्थायी एकदिवसीय मान्यताको ढोका खुल्नेछ।
फेब्रुअरीमा नामिबियामा हुने डिभिजन–२ मा ६ टिमबीच प्रतिस्पर्धा हुनेछ। डिभिजन–२ मा नेपाल, युएई, नामिबिया, क्यानडा र ओमानले खेल्ने पक्का भइसकेको छ। डब्लुसिएल च्याम्पियनसिपको शीर्ष चारभित्र पर्ने दौडमा रहेका स्कटल्यान्ड, हङकङ र केन्यामध्ये १ टिम डिभिजन–२ मा झर्नेछ।
नेपालले अस्थायी एकदिवसीय टिमको मान्यता पाउन डिभिजन–२ मा शीर्ष २ स्थानमा परेर मात्र पुग्दैन। विश्वकप छनोटमा ५ एसोसिएट टिममध्ये राम्रो नतिजा निकाल्नुपर्नेछ।
नेदरल्यान्ड्सको सम्भावना बढी
आइसिसीले सन् २०१९ मा आयोजना गर्ने भनेको एकदिवसीय लिगमा १३ टिमबीच प्रतिस्पर्धा हुनेछ। जहाँ १२ स्थायी सदस्य र एक एसोसिएट टिमबीच प्रतिस्पर्धा हुनेछ। आइसिसीले डब्लुसिएल च्याम्पियनसिपको विजेता टिमलाई एकदिवसीय लिगमा सहभागी गराउनेछ। नेदरल्यान्ड्स डब्लुसिएल च्याम्पियनसिपको उपाधि नजिक रहेकाले उसले एकदिवसीय लिग खेल्ने सभ्भावना बलियो छ।
डिसेम्बरमा हुने डब्लुसिएल च्याम्पियनसिपको अन्तिम चरणमा नेदल्यान्ड्सले नामिबियालाई हराएमा एकदिवसीय लिगमा स्थान पक्का गर्नेछ भने एकदिवसीय टिमको स्वत: मान्यता पाउनेछ।
यता अन्तिम चरणमा नेपालले युएइसँगै प्रतिस्पर्धा गर्दैछ। दुवै टिम डिभिजन–२ मा झरेकाले खेल प्रतिष्ठाको लडाइँ मात्र हुनेछ। खेल ६ र ८ डिसेम्बरमा अबुधावीको शिख जायेद रंगशालामा हुनेछ।
अस्थायी मान्यता कसले पाए, कसले गुमाए ?
आइसिसीले सन् २००५ देखि ६ वटा एसोसिएट टिमलाई अस्थायी एकदिवसीय टिमको मान्यता दिन थालेको हो। आइसिसीले अस्थायी मान्यता ४ वर्षको लागि दिने गरेको छ। अस्थायी मान्यता दिने आधार एकदिवसीय विश्वकप छनोटलाई मान्दै आइएको छ। तर, यदाकदा आइसिसीका प्रतियोगितामा उत्कृष्ट खेल्ने टिमलाई पनि अस्थायी मान्यता दिने गरिएको छ।
स्कटल्यान्डले सन् २००६ देखि अस्थायी एकदिवसीय टिमको मान्यता पाएको थियो। युएई, हङकङ र पपुवा न्युगिनीले भने सन् २०१४ मा एकदिवसीय मान्यता पाएका हुन्। यो मान्यता विश्वकप छनोट प्रतियोगितासम्मका लागि हो।
यसअघि अस्थायी मान्यता पाएका अफगानिस्तान र आयरल्यान्ड भने स्थायी सदस्यमा बढुवा भइसकेका छन्। अफगानिस्तानले सन् २००९ तथा आयरल्यान्डले सन् २००६ मा पहिलो पटक अस्थायी एकदिवसीय टिमको मान्यता पाएका थिए।
केन्याले सन् १९९७ मा पहिलो पटक एकदिवसीय मान्यता पाएको थियो। सन् २०१४ को विश्वकप छनोटमा खराब प्रदर्शनपछि केन्याको मान्यता खोसिएको थियो। क्यानडाले पनि सन् २००६ देखि २०१४ सम्म एकदिवसीय मान्यता पाएको थियो। बर्मुडाले सन् २००६ देखि सन् २००९ सम्म ३ वर्ष अस्थायी एकदिवसीय टिमको मान्यता पायो। सन् २००६ मा पहिलो पटक अस्थायी एकदिवसीय टिमको मान्यता पाएको नेदरल्यान्ड्सको मान्यता सन् २०१४ मा खोसियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
