काठमाडौं– इन्डोनेसियाको फुटबल लिग च्याम्पियन पेर्सिजा जाकर्ताले नेपालका मिडफिल्डर रोहित चन्द सम्झौता थप गर्ने भएको छ।
सम्झौताका लागि रोहित बुधबार इन्डोनेसियाका लागि प्रस्थान गर्ने स्रोतले बताएको छ।
यता पेर्सिजाका सिइओ फेरी पाउलसलाई उधृत गर्दै फुटबलको चर्तित न्युज पोर्टल गोल डटकमले रोहितसँग सम्झौता थप हुने लेखेको छ। सिइओ पाउलसका अनुसार प्रशिक्षकले रोहितलाई टिममा फर्काउन चाहेका छन्।
यसअघि रोहितको पोजिसनमा पेर्सिजाले उज्वेकिस्तानका जाखोन्गिर अब्दुमुमिनोभलाई भित्राएको थियो। तर उनको प्रदर्शन कमजोर रहेपछि पेर्सिजाले विकल्प खोजेको हो।
पेर्सिजा र रोहितबीच सम्झौताको विषयमा समझदारी हुन सकेको थिएन। रोहितले प्रदर्शनअनुसारको तलब मागेका थिए। तर पेर्सिजा सकारात्मक बनेको थिएन। त्यसैले रोहितले पेर्सिजासँग सम्झौता हुन नसकेको नेपाल लाइभलाई बताएका थिए। बीचमा उनले एन्जेटमार्फत अन्य क्लबसँग सम्झौताका लागि कुरा अघि बढाएका थिए।
'रोहितले पेर्सिजासँग सम्झौता गर्न सहमति जनाएका छन्,' पेर्सिजाका सिइओ पाउलसले भनेका छन्,'रोहित बुधबार जनाखोन्गिरलाई प्रतिस्थापन गर्न बुधबार आइपुग्नेछन्।' रोहितले एएफसी कप खेल्ने पनि पेर्सिजाले जनाएको छ।
यता इन्डोनेसियाको चर्चित न्युज पोर्टल बोला डटकमले पनि रोहित र पेर्सिजाबीच मौखिक रुपमा सहमति भइसकेको उल्लेख गरेको छ। पेर्सिजाले रोहितलाई सम्झौता पठाइसकेको बताइएको छ भने त्यसमा हस्ताक्षर मात्र हुन बाँकी छ।
इन्डोनेसियानको लिग आगामी अप्रिलबाट सुरु हुँदैछ। अहिले इन्डोनेसियन कपका खेलहरु भइरहेका छन्। लगत्तै प्रेसिडेन्ट कप सुरु हुँनेछ।
यसअघि रोहित र पेर्सिजाबीच ३१ डिसेम्बर २०१८ मा सम्झौता सकिएको थियो। २०१७ पेर्सिजनामा मासिक ३ हजार ५ सय अमेरिकी डलरमा अनुबन्धित भएका थिए। त्यससँगै उनी सबैभन्दा धेरै कमाउने नेपाली फुटबल खेलाडी हुन सफल भएका थिए।
गत सिजनको सुरुवातमा इन्डोनेसिया प्रेसिडेन्ट कप जितेको पेर्सिजाले २०१८ को इन्डोनेसिया लिग वान पनि जित्न सफल भएको थियो। पेर्सिजनाको उपाधिमा रोहितको भूमिका उत्कृष्ट रहेको थियो। जसकारण उनले २०१८ लिग-१ को सर्वोत्कृष्ट खेलाडीको उपाधि समेत जिते। एसएम माकारसारका विलियम जान प्लुइम र पेर्सेबाया सुराबायाका डेभिड डा सिल्भालाई पछि पारेर पेर्सिजा जाकर्तामा आबद्ध रोहितले सर्वोत्कृष्ट खेलाडीको अवार्ड हात पारेका थिए।
सिजनमा चन्दले पेर्सिजालाई च्याम्पियन बनाउन उत्कृष्ट प्रदर्शन गरेका थिए। उनले लिगमा ३१ खेल खेल्दै ३ गोल गरे। उनले ३४ खेल मध्ये ३ खेल खेल्न पाएनन्।
रोहितले यसअघि सन् २०१३ देखि २०१५ सम्म पेर्सिजाबाटै खेलेका थिए। यस्तै रोहित २०१७ फेरि पेर्सिजामा आबद्ध भएका थिए।
एन्फा एकेडेमिका उत्पादन रोहितले सन् २००९ मा व्यवसायिक फुटबल खेल्न सुरु गरेका थिए। मच्छिन्द्र क्लबमा आवद्ध भएर करिअर सुरु गरेका उनी पहिलो सिजनमै उत्कृष्ट डिफेन्डर घोषित भए। मच्छिन्द्र त्यो सिजनमा ब्रिटिश गोर्खा कपको सेमिफाइनल सम्म पनि पुगेको थियो। मच्छिन्द्रमा मासिक १ लाख ५० हजार रुपैयाँमा आबद्ध रोहित सर्वाधिक पारिश्रमिक पाउने नेपाली फुटबलरका भएका थिए।
रोहित सन् २०१० मा भारतीय क्लब हिन्दुस्तान एरोनोटिक्स् लिमिटेड एससीमा अनुबन्धित भए। क्लबले रोहितलाई मासिक १ लाख २८ हजार रूपैयाँमा अनुबन्ध गरेको थियो।
२०१२ मा रोहित इन्डोनेसिया पुगे। त्यतिबेला उनले एफसी पेकन्बरूमा सम्झौता गरेका थिए। एक सिजन इन्डोनेसियामा खेलेपछि उनी एफसी भेस्ट्स्जेल्याण्डमा आबद्ध भए। त्यहाँ ६ महिना बिताएपछि रोहित इन्डोनेसियाको पेर्सिजा जार्कतामा आवद्ध भएका थिए। २ सिजन जार्कतामा बिताएपछि रोहितले सन् २०१५ मा मलेसियन क्लब टि–टिम एफसी र २०१६ मा मनाङ मस्याङ्दी क्लबबाट खेले।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1664177809.jpg)
1664177809.jpg)
-1764146706.png)
