राजविराज– प्रदेश २ को भुमि व्यवस्था, कृषि तथा सहकारी मन्त्री शैलेन्द्रप्रसाद साहले कोशीटप्पु वन्यजन्तु आरक्षको पुनः सिमा निर्धारण गरेर भएपनि वन्यजन्तुको आतंक समाधान गरिने बताएका छन्।
सोमबार सप्तरीको भारहका जंगली जनावरपीडित किसानसँग भएको भेटपछि मन्त्री साहले यस्तो बताएका हुन्।
‘कोशीटप्पु वन्यजन्तु आरक्ष प्रदेश १ मा छ, तर क्षति जति प्रदेश २ का किसानले भोग्नु परेको छ,’ मन्त्री साहले भने, ‘यस विषयमा सरकारमा कुरा उठेको छ। यसको पुनः सीमा निर्धारण गरेर भएपनि समस्या समाधान हुन्छ।’
हनुनमानगर कंकालिनी नगरपालिकासहित कञ्चनरुप, सप्तकोशी नगरपालिका तथा तिरहुत, रुपनी, अग्नीसाईर कृष्णासवरण गाउँपािलकालगायतका स्थानीय तहका हजारौं किसान हात्ती, बंगुर, बँदेल, अर्नालगायत जंगली जनावरबाट पीडित भएको विषयमा सरकारमा कुरा उठेको उनले बताए।
‘अब आरक्ष र मध्यवर्ती क्षेत्रका नाममा जनताले दुःख पाउनु हुँदैन’ मन्त्री साहले थपे, ‘कोशीटप्पु वन्यजन्तु जंगली जनावर नियन्त्रण गर्नुपर्छ।’
संघीय सरकारले पहल नगरे प्रदेश सरकारले नै कानुन बनाएर जंगली जनावर नियन्त्रण गर्ने मन्त्री साहले प्रतिबद्धता जनाए।
स्थानीय केरा किसानको गुनासो सुन्न भारदह पुगेका मन्त्री साहले खेतसम्म पुग्न सडक निर्माणका लागि प्रदेश सरकारले सहयोग गर्ने प्रतिबद्धता समेत जनाए। उनले हात्तीलगायत जंगली जनावरले क्षति गरेको केरा खेतीको निरीक्षण समेत गरे।
भारदहका करिब २ सय किसानले ५० हेक्टर जमिनमा केरा खेती गर्दै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
