काठमाडौं- संघीय सरकारको मातहत रहने गरी समायोजन गर्न सरकारलाई दबाब दिँदै आएका सरकारी चिकित्सकले सोमबार पनि काठमाडौंमा प्रर्दशन गरेका छन्।
सरकारी चिकित्सक संघ, नेपाल (गोदान)को आह्वानमा सोमबार पनि सरकारी चिकित्सकले काठमाडौंको वीर अस्पतालबाट रामशाहपथस्थित स्वास्थ्य तथा जनसंख्या मन्त्रालयको मूलगेटसम्म र्यालीसहितको प्रर्दशन गर्दै आफूको माग तत्काल सम्बोधन गर्न सरकारलाई दबाब दिएका हुन्।
सरकारले आफूहरुको वृत्ति विकास तथा सेवा, सुविधा कटौती हुने गरी प्रदेश र स्थानीय तहमा समायोजन गर्ने गरी विधेयक ल्याएपछि त्यसको विरोधमा प्रर्दशन गर्नु परेको गोदानका केन्द्रीय सदस्य डा. राजेशकुमार मण्डलले जानकारी दिए। बढुवा हुने, अध्ययन गर्नेलगायतका सेवा, सुविधा कटौती हुने गरी सरकारले समायोजनमा लगेकोमा सरकारी चिकित्सकको आपत्ति छ।
यता, स्वास्थ्य तथा जनसंख्या मन्त्रालयले भने सरकारी चिकित्सकको माग अनुसार समायोजन गर्न भन्दै संघीय मामिला तथा सामान्य प्रशासन मन्त्रालयलाई पत्राचार गरिएको जानकारी गराएको छ।
स्वास्थ्य तथा जनसंख्या मन्त्रालयकी सचिव डा. पुष्पा चौंधरीले सरकारी चिकित्सकको माग सम्बोधन हुनेगरी संघीय मामिला तथा सामान्य प्रशासन मन्त्रालयलाई पत्राचार गरिएको जानकारी दिएकी छन्। 'सरकारी चिकित्सकको वृत्ति विकासलगायतका विषयमा अवरोध आउन नदिन मुख्यसचिवलाई ध्यानाकर्षण गरिसकिएको छ,' उनले भनिन्।
सरकारी चिकित्सकहरुले संघीय सरकार मातहत राखेर आफूहरुलाई समायोजन गर्न माग गर्दै आईतबार स्वास्थ्य मन्त्रालय घेराउ गर्दा प्रहरीले धरपक्कड गरेको थियो।
प्रर्दशनमा उत्रिएका सरकारी चिकित्सकले आफूहरुको शान्तिपूर्ण विरोध प्रर्दशन गर्न पाउने अधिकारबाट पनि बञ्चित गराउने प्रयास सरकारले गरेको भन्दै आक्रोश पनि व्यक्त गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
