सवारी दुर्घटना रोक्न ‘ट्राफिक कम्युनिकेसन एप’

सूचना-प्रविधि

नेपाल लाइभ सोमबार, माघ २८, २०७५ १०:२९

बुटवल– बढ्दो सवारी दुर्घटना नियन्त्रण गर्न नेपाल प्रहरीले ‘ट्राफिक कम्युनिकेसन एप’ प्रयोगमा ल्याएको छ। विशेषगरी लामो दुरीका सवारी साधनमा दुई जना चालक अनिवार्य राख्नुपर्ने कानुनी व्यवस्था कार्यान्वयनका लागि यो एप प्रयोगमा ल्याइएको प्रहरीले जनाएको छ।

प्रदेश ५ मा प्रदेश ट्राफिक प्रहरी कार्यालय र जिल्ला ट्राफिक प्रहरी कार्यालय नवलपरासीले सुनवल–१२, भूमहीमा उक्त एप प्रयोगमा ल्याइएको हो। सुनवल नगरपालिकाका प्रमुख भीमबहादुर थापा क्षेत्रीले चालकको फोटोसहितको विवरण लिएर उक्त एप प्रयोगमा ल्याएका हुन्।

यो एप प्रयोगमा आएपछि लामो दुरीमा सञ्चालन हुने सवारीसाधनले कानुनी व्यवस्था अनुसार २ सय ५० किलोमिटर दुरीपछि अर्को चालक परिवर्तन गरे नगरेको पत्ता लाग्ने छ।

पहिलो चरणमा काठमाडौंको नागढुंगा, सर्लाहीको कर्मैया, नवलपरासीको भूमही र बाँकेको कोहलपुरमा एप सञ्चालनमा आएको प्रदेश प्रहरी कार्यालय दाङका वरिष्ठ प्रहरी उपरीक्षक नरबहादुर केसीले जानकारी दिए। लामो दुरीमा चल्ने सवारी साधनमा चालक परिवर्तन भए नभएको पत्ता लगाउन एक निश्चित बिन्दुमा सवारी चालकको फोटो खिचेर सवारी साधनको नम्बर, प्रस्थान तथा गन्तव्य स्थान दर्ता गरी इन्टरनेटको सर्भरमा राखिन्छ।

ट्राफिक प्रहरीहरुले चेकिङ पोइन्टहरुमा जाँचको क्रममा चालकको फोटो र अनुहार जाँच तथा विवरणको आधारमा चालक बदली भए नभएको सहजरुपमा पत्ता लगाउन सक्ने प्रदेश ५ ट्राफिक प्रहरी कार्यालय बुटवलका प्रमुख प्रहरी उपरीक्षक गणेश चन्दले बताए।

ट्राफिक प्रहरीहरुले जिपिएस लोकेसन पनि थाहा पाउन सक्ने यो एपमा चालकको लाइसेन्स नम्बर, टाइम कार्डसमेत चेक गर्ने सुविधा भएकाले चालकले झुक्याउन पाउने छैनन्।

यसमा ट्राफिक म्यासेज ब्रोडकास्टिङ गर्ने व्यवस्था समेत रहेको छ। एपको प्रयोगले समयको पालना, तीब्र गतिमा नियन्त्रण भई सवारी दुर्घटना न्यूनिकरण हुने र प्रभावकारी सवारी व्यवस्थापन एवम् सुरक्षित गन्तव्यका लागि यो एप उपयोगी हुने ट्राफिक प्रहरी निरीक्षक हेमबहादुर शाहीले बताए।

संयुक्त राष्ट संघको तथ्यांक अनुसार विश्वमा प्रत्येक वर्ष १३ लाख मानिसको सडक दुर्घटनाबाट मृत्यु हुने गरेको छ। नेपालमा एक वर्षमा सरदर २ हजार ५ सय जनाको सडक दुर्घटनाबाट मृत्यु हुने गरेको छ। पछिल्लो ५ महिनामा सवारी दुर्घटनाबाट १ हजार १ सय ७६ जनाको मृत्यु भएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

तीन वटा वैकल्पिक बाटो प्रयोग गरेर खुलाइँदैछ पूर्व–पश्चिम राजमार्ग

नवलपुरको विनयी खोला पुल भासियो, पूर्व-पश्चिम राजमार्ग बन्द

पाँच महिनाको अवधिमा ६ खर्ब बढी रेमिट्यान्स भित्रियो