ह्यामिल्टन- दुवै इनिङमा गरी ४ सय २० रन बनेको तेस्रो तथा निर्णायक टी-२० खेलमा भारतमाथि घरेलु टिम न्युजिल्यान्डले ४ रनको रोमाञ्चक जित हात पारेको छ। जितसँगै ३ खेलको सिरिज न्युजिल्यान्डले २-१ ले जितेको छ।
न्युजिल्यान्डले दिएको २ सय १३ रनको लक्ष्य पछ्याएको भारतले २० ओभरमा ६ विकेटको क्षतिमा २ सय ८ रन जोडेको थियो। अन्तिम ओभरमा जितका लागि १६ रन चाहिएको अवस्थामा भारतले ११ रन मात्र जोड्न सकेको थियो।
अन्तिम ओभरमा क्रिजमा रहेका दिनेश कार्तिक र क्रुनाल पाण्ड्याले पहिलो पाँच बलमा बाउन्ड्री प्रहार गर्न नसक्दा खेल न्युजिल्यान्डको पक्षमा गएको थियो। अन्तिम बलमा टिम साउदीलाई दिनेश कार्तिकले छक्का प्रहार गरे पनि जितका लागि पर्याप्त हुन सकेन। कार्तिकले १६ बलमा ४ छक्का हिर्काउदै नटआउट ३३ र क्रुनालले १३ बलमा २ चौका र २ छक्का हिर्काउदै नटआउट २६ रन जोडे।
भारतका लागि कप्तान रोहित शर्माले ३२ बलमा ३८ र विजय शंकरले २८ बलमा ४३ रनको योगदान दिए। रिशव पन्तले १२ बलमा २८ र हार्दिक पाण्ड्याले ११ बलमा २१ रन बटुले।
त्यसअघि न्युजिल्यान्डले ४ विकेटको क्षतिमा २ सय १२ रन जोड्यो। उसका लागि ओपनर कोलिन मुनरोले ४० बलमा ७२ रन जोडे। उनले समान ५-५ चौका र छक्का हिर्काए। अर्का टिएल सेइफर्टले २५ बलमा ४३ रनको योगदान दिएका थिए। दुईबीच पहिलो विकेटका लागि ८० रनको साझेदारी भएको थियो। मुनरो म्यान अफ दि म्याच भए।
यसअघि भएका पहिलो टी-२० मा न्युजिल्यान्ड र दोस्रो टी-२० मा भारत विजयी भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
