काठमाडौं- नेपाली कांग्रेसका जिल्ला सभापतिहरुले महासमिति बैठकबाट पारित भएका विषय नचलाउन पार्टी नेतृत्वलाई चेतावनी दिएका छन्।
शनिबार काठमाडौंमा उपलब्ध जिल्ला सभापतिहरुको भेलाले पार्टी नेतृत्वले जिल्ला सभापतिको सुझावअनुसार नै विधानलाई महासमितिबाट पारित गरेको भन्दै सो विषयलाई नचलाउन नेतृत्वलाई चेतावनी दिएका हुन्।
जिल्ला कार्यसमिति नुवाकोटका सभापति जगदिशनरसिंह केसीले सभापतिहरूसँगको सहमतिअनुसार नै महासमिति बैठक सहजताका साथ सम्पन्न भएको भन्दै सहमतिमा तोडमोड नगर्न आग्रह गरेको बताए।
‘जिल्ला सभापतिहरुसँगको सहमति पार्टी नेतृत्वले नभुलोस्, हेटौंडा हुँदै ककनी भेलाले दिएको सुझाव पार्टीले पालना गर्नुपर्छ, महासमिति बैठक समापनअघिको सहमति त्यही हो,’ केसीले भने।
काभ्रे सभापति मधु आचार्यले महासमितिले पारित गरेको विषय केन्द्रीय समितिले उल्ट्याउन खोज्नु हाँस्यास्पद भएको बताए।
‘महासमितिले पारित गरेको विषय केन्द्रीय समितिले उल्ट्याउन खोजेको भन्ने सुनिँदैछ। त्यसो हो भने यो कुरा हाँस्यास्पद छ। महासमितिले गरेको निर्णय उल्टाउने निर्णय गरे असहज अवस्था आउँछ,’ आचार्यले चेतावनी दिए।
जिल्ला सभापतिहरुसहित महासमिति सदस्यले केन्द्रीय समितिमा रहेका नेताहरु महाधिवेशनमा प्रतिनिधि बन्नका लागि बुथ तहबाट नै निर्वाचन मार्फत चुनिएर आउनुपर्ने व्यवस्था गरिएको भन्दै सो विषयलाई नेतृत्वले उल्टाउन खोजेको बताएका हुन्।
यस्तै केन्द्रीय समितिमा एक पटक आरक्षण वा समावेशी कोटाबाट उम्मेद्वार भइसकेको व्यक्ति अर्कोपटक पुनः उम्मेदवार बन्न नपाउने गरी महासमितिले विधान पारित गरेको उनले दाबी गरे।
कांग्रेसको जारी केन्द्रीय समिति बैठकमा शीर्ष नेताहरु नै यस विषयमा विभाजित हुँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
