धनगढी– शनिबारदेखि सुरु हुने भनिएको रुस्लान धनगढी प्रिमियर लिग (डिपिएल) क्रिकेट प्रतियोगिता मौसमको प्रतिकूलताका कारण प्रभावित बनेको छ। यद्यपी प्रतियोगिताको उद्घाटन भने पूर्वनिर्धारित समयअनुसार शनिबार स्थानीय एक होटलमा गरिएको छ।
खेलहरु भने यही माघ २८ गतेदेखि सुरु हुने भएको छ। सोमबार पहिलो डिपिएल खेल धनगढी स्टार्स र विराटनगर किंग्सबीच हुन लागेको छ।
प्रतियोगिताअघि सबै टिमले उपाधि जित्ने दाबी गरेका छन्। ६ टिमका कप्तान र उपकप्तानको भनाइ पढ्नुहोस् :
सोमपाल कामी (कप्तान धनगढी स्टार्स )
उपाधि रक्षा गर्न चुनौती छ। हामीले लगातार दुई सिजन ट्रफी जितेका छौं । यो तेस्रो पटक हुनेछ। त्यसैले हामीलाई दबाब भन्दा पनि चुनौती छ। नयाँ टिम ल्याएर खेल्दा चुनौती त भइहाल्छ। तर, हामी टिममा विश्वास गर्छौं। पानीको कारण क्याम्प भइरहेको छैन। नेट अभ्यास गर्न जाने योजनाहरु पानीले पुरा भएन । तर, खेलाडीहरुले फिटनेस क्याम्प गरिरहेका छ। होटलमा बसेर क्रिकेटकै बारेमा छलफल गरिरहेका छौं। खेलका लागि तयार छौं।
दीपेन्द्रसिंह ऐरी (कप्तान, सिवाईसी अत्तरिया )
टिम तयारी राम्रो छ। विदेशी कोचहरु छन् त्यसले राम्रो प्रभाव पर्न सक्छ। विदेशी खेलाडी सन्नी पटेल र जयकिशन कोल्शावालाले डीपीएल र पीपिएल खेलिसकेका छन्। दुवै प्रतियोगितामा राम्रो प्रदर्शन गरेका थिए। मलाई लाग्छ राम्रो हुनेछ। हाम्रो टिम युवा टिम छ। सबैले राम्रो गरिरहेको छ। हाम्रो लक्ष्य उपाधि जित्ने रहेको छ।
करण केसी (कप्तान, विराटनगर किंग्स)
तयारी राम्रो भईरहेको छ । वर्षाले अलिक बिगार्यो तर अभ्यासहरु राम्रो भइरहेको छ। टिम सन्तुलित छ। दुई विदेशी खेलाडी अभिनास यादव र शिवकान्त शुक्ला राम्रा छन्। त्यो हाम्रो लागि बोनस जस्तै हो। तर, विदेशी खेलाडी धेरै निर्भर नहुँदा पनि टिम राम्रो छ। पहिलो पटक टिम कप्तान चुनिएको छु। खुशी लागेको छ। अब राम्रो प्रदर्शन गरेर अगाडी लैजाने योजना छ। टिमको लक्ष्य डीपीएल ट्रफी उचाल्ने रहेको छ।
विक्रम शोव (उपकप्तान, रुपन्देही च्यलेञ्जर्स)
तयारी राम्रो भईरहेको छ। टिम राम्रो छ। हाम्रो प्राय अधिकांस खेलाडी युएईमा रहेको थियो। तर, हामीले भैरहवामा तयारी गरिरहेका थियौं। ७(८ दिनको क्याम्प राम्रो भयो। ब्याटिङ फिल्डिङ बलिङ सबै राम्रो छ । विदेशी खेलाडी बाबर हायत राम्रा छन्। टिमको लक्ष्य उपाधि जित्ने नै रहेको छ ।
आरिफ शेख (उपकप्तान, महेन्द्रनगर युनाइटेड)
मौसमको कारण मैदानमा छिरेको छैन। तर, जिम र फिटमा तयारी गरिरहेका छौं। ट्रफी उठाउने लक्ष्य सबैको हुन्छ। हामीले पनि त्यहिँ अनुसार तयारी गरेका छौं। हाम्रो टिम एकदमै सन्तुलित । तर, जति सन्तुलित भएपनि मैदानमा देखाउनु पर्ने हुन्छ ।
अनिल कुमार साह (उपकप्तान,काठमाडौं गोल्डेन्स)
टिमको तयारी राम्रो छ । खेलाडीहरुले व्यक्तिगत रुपमा समेत तयारी गरेको छ । हाम्रो टिमको बलिङमा विविधता छ । ब्याटिङ लाइनअप पनि अन्तिमसम्म छ । अनुभवी खेलाडीहरु छ । विदेशी खेलाडीहरुको कारण पनि टिम सन्तुलित देखिएको छ । सबै टिमको चाहना ट्रफी जित्ने हुन्छ । जित्नु भन्दा पनि हामी राम्रो खेल्नुछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
