काठमाडौं- कांग्रेस नेता बालकृष्ण खाँडको जोडबलमा उनी निकट विद्यार्थी नेतालाई नेपाल विद्यार्थी संघको नेतृत्व दिने तयारी थालिएको छ। केन्द्रीय समितिले उमेर हद ३२ वर्ष कायम गरी तदर्थ समिति बनाउन लागिएको हो।
खाँडको दबाबमा नेविसंघ सहमहामन्त्री प्रकाश घिमिरेलाई तदर्थ समितिको नेतृत्व दिन लागिएको स्रोतले बतायो।
५ नम्बर प्रदेशबाट सहमहामन्त्रीमा ११औं महाधिवेशनमा विजयी घिमिरे कपिलवस्तुका हुन्। विद्यार्थीको केन्द्रीय राजनीतिमा अनुभवविहीन उनले जिम्मेवारी पाए तोकिएको समयमा महाधिवेशन हुनै नसक्ने एक विद्यार्थी नेता बताउँछन्। उनले भने, ‘महाधिवेशन गर्न क्षमतावान्लाई जिम्मेवारी नदिई नेताका विश्वासपात्रलाई दिने तयारी हुँदैछ।’
पार्टी पदाधिकारीमा सहमहामन्त्रीको आकांक्षी रहेका खाँडलाई सभापति शेरबहादुर देउवाले मनोनीत नगरेपछि सभापतिप्रति उनी असन्तुष्ट थिए। प्रतिनिधिसभाका प्रमुख सचेतक बनाइएका खाँड उक्त पदप्रति सन्तुष्ट थिएनन्। खाँडलाई मनाउन उनी निकट घिमिरेलाई तदर्थ समितिको नेतृत्व दिने तयारी कांग्रेसभित्र भइरहेको बताइएको छ।
संस्थापन समूहबाट नै तदर्थ समितिको बलियो दाबेदार बनेका प्रेम जोशीलाई पछि पार्दै घिमिरे नेतृत्वमा आउने सम्भावना बढेको छ।
पार्टी सहमहामन्त्री डा प्रकाशशरण महत नजिक रहेका जोशी संघका प्रवक्ता पनि थिए। संघका सात पदाधिकारीबाट राजीनामा दिनेमध्ये उनी पनि एक हुन्। गत निर्वाचनको समय कैलालीमा सभापति देउवा पत्नी आरजु राणालाई हराउन भूमिका खेलेको भन्दै जोशीप्रति पार्टी सभापति सकारात्मक छैनन्। आरजुको निर्वाचन प्रचारप्रसारका क्रममा असहयोग गरेको भन्दै स्थानीय पार्टीकार्य समितिले जोशीलाई कारबाही गर्न केन्द्रलाई सिफारिस गरेको थियो।
संस्थापन समूहबाट नै अध्यक्षको दाबेदार अम्बिका चलाउने अछामस्थित एक नगरपालिकामा उपमेयर छन्। चलाउने वर्तमान अध्यक्ष नैनसिंह महर निकट छन्।
संस्थापन समूहले अध्यक्ष पद नछोड्ने हुनाले अरु समूहका विद्यार्थी नेताहरु पदाधिकारीको आकांक्षी बन्नुपरेको छ। वरिष्ठ नेता रामचन्द्र पौडेल निकट विद्यार्थी नेता शिव रिमाल र कृष्णप्रसाद सिटौला नजिकका सुशील भट्ट र गणेश सापकोटा पनि अध्यक्षका आकांक्षी हुन्। संस्थापन समूहले अध्यक्ष पद नछोड्ने भएसँगै तदर्थ समितिमा भागबण्डा हुने बताइएको छ।
माघ १० सम्म कार्यकाल बढाइएको संघ हाल निष्क्रिय छ। पार्टीले संघबारे जारी केन्द्रीय कार्यसमितिको बैठकबाट निर्णय गर्ने भनिए पनि टुंगोमा भने पुगेको छैन। सोमबारको बैठकबाट संघलाई तदर्थ समिति मार्फत सञ्चालन गर्ने बताइएको छ। तदर्थ समितिमा रहेकाहरु १२औं महाधिवेशनमा प्रत्यासी बन्न पाउने/नपाउनेबारे पनि पार्टीले निर्णय गर्नेछ।
१२औं महाधिवेशनमा नेतृत्वको दाबेदार बन्न नपाउने प्रावधानसहित तदर्थ समिति बनेको अवस्थामा आंकाक्षीहरुको संख्या कम हुने विद्यार्थी नेताहरु बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
