काठमाडौं- वाङ्मय शताब्दी पुरुष सत्यमोहन जोशीको शतवार्षिकी भव्यताका साथ मनाइने भएको छ।
संस्कृतिविद् जोशीको सयौं वार्षिकोत्सव मनाउन गठित समितिको पहिलो बैठकले २०७६ बैसाख ३० गते कार्यक्रम गर्न लागेको हो। जोशी सो दिन ९९ वर्ष पूरा भई सय वर्षमा प्रवेश गर्दैछन्।
ललितपुर महानगरपालिकाको दोस्रो नगरसभाले शताब्दी पुरुष जोशीको शतवार्षिकी मनाउन महानगरका प्रमुख चिरीबाबु महर्जनको संयोजकत्वमा १११ सदस्यीय समिति गठन गरेको छ। समितिमा राष्ट्रियसभाका सांसद, प्रतिनिधिसभाका सांसद, छिमेकी नगरपालिकाका प्रमुखलगायत सदस्य छन्।
महानगरपालिका–३ का अध्यक्ष श्रीगोपाल महर्जनको संयोजकत्वमा १५ सदस्यीय सचिवालयसमेत गठन गरिएको छ। महानगरले जोशीको १०० औँ जन्मोत्सवलाई वर्षभर विभिन्न कार्यक्रम आयोजना गरी मनाउने जनाएको छ।
यस अवसरमा महानगरले नेपाल राष्ट्र बैकसँग अनुमति लिएर स्वर्ण मुद्रा प्रकाशन गर्ने, हुलाक टिकट प्रकाशन गर्ने, सत्यमोहन जोशी पार्क निर्माण गर्ने र महानगरपालिकासँग जोडिने कुनै एक सडकको नाम सत्यमोहन जोशी मार्ग नामाकरण गर्नेलगायतका कार्यक्रम तय गरेको छ।
प्रमुख महर्जनले इतिहास बोकेको र नेपाललाई महत्वपूर्ण योगदान दिएको व्यक्तिलाई जीवितै रहँदा सम्मान गर्न महानगरले विभिन्न योजना बनाएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791537260-1791790325.jpeg)
-1786602170.png)
