धादिङ– पृथ्वी राजमार्गअन्तर्गत धादिङको गलौंदी क्षेत्रमा थप मर्मतसम्भार गर्न सोमबार राति ६ घण्टा सवारी आवागमन बन्द गरिने भएको छ।
जिल्ला प्रशासन कार्यालय धादिङले सूचना जारी गर्दै गजुरी गाउँपालिका–५ गलौंदीमा त्रिशूली नदीको कटानका कारण भासिएको सडकमा थप मर्मतसम्भार गर्नुपर्ने भएकाले आवागमन रोक्ने जनाएको हो।
कार्यालयका अनुसार असोज २६ गते सोमबार राति ११ बजेदेखि मंगलबार बिहान ५ बजेसम्म उक्त सडकखण्ड भएर चल्ने सबै सवारीसाधनको आवागमन पूर्ण रूपमा बन्द गरिनेछ।
यसअघि सडक मर्मत गरी दुईतर्फी सवारी सञ्चालनमा ल्याइएको थियो। थप मर्मतको काम गर्नुपर्ने भएकाले अस्थायी रूपमा आवागमन बन्द गर्न लागिएको प्रमुख जिल्ला अधिकारी लक्ष्मी पाण्डेय (गौतम) ले जारी गरेको सूचनामा उल्लेख छ।
सवारी आवागमन बन्द हुने समयमा यात्रु तथा चालकलाई आवश्यक सावधानी अपनाउन र सम्बन्धित निकायसँग समन्वय गर्न प्रशासनले अनुरोध गरेको छ।
सहयोग तथा समन्वयका लागि नेपाल प्रहरीको हटलाइन १००, सशस्त्र प्रहरी बलको १११४ र जिल्ला आपतकालीन सञ्चालन केन्द्रको १२३४ वा ०१०-५२१४६४ मा सम्पर्क गर्न सकिनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791537260-1791790325.jpeg)
-1786602170.png)
