काठमाडौं– सन् १९०१ मा इटालीको रिवानामा स्थापना भएको को-अपरेटिभ मुरातोरी ई कमिस्ट (सिएमसी) इटालीको एक प्रसिद्ध निर्माण कम्पनी हो। आर्थिक र वित्तीय हिसाबमा स्थायित्व प्राप्त यो कम्पनी विश्वका विभिन्न मुलुकमा निर्माण कार्यमा संलग्न रहेको छ। अन्तर्राष्ट्रियस्तरमा काम गर्ने इटालीको थोरै निर्माण कम्पनीको सूचीमा सिएमसी पर्छ।
इटालीको आन्तरिक बजारमा पनि सिएमसीको अवस्था राम्रै छ। स्वदेशका प्रमुख पूर्वाधार निर्माण, तीव्र गतिको रेलसेवा, सार्वजनिक भवन र सामुद्रिक निर्माणमा पनि सिएमसी संलग्न रहेको पाइन्छ। सपिङ मल, होटेल र रिसोर्ट निर्माणमा पनि सिएमसीले इटलीमा सम्पनन गर्ने काम हुन्।
पहिलो र दोस्रो विश्वयुद्ध पूर्व नै स्थापित यो कम्पनीको दुवै विश्वयुद्धपछि इटालीको पुनर्निमाणमा महत्वपूर्ण योगदान छ। ऐतिहासिक घडीमा पुर्याएको योगदान र काममा देखाउने सफलताका कारण सिएमसी इटालीमा प्रशंसनीय नै छ।
सन् १९६५ पछि निर्माण प्रविधिमा आएको परिवर्तनलाई आत्मसात गर्दा सिएमसीको कार्यक्षमता पनि दोब्बर वृद्धि भएको कम्पनीले जनाएको छ। त्यसपछि नै इटालीको पहिलो राजमार्ग निर्माण सम्पन्न गर्नुलाई सिएमसीको महत्वपूर्ण उपलब्धि मानिन्छ।
राष्ट्रियस्तरमा ख्याति कमाएपछि सिएमसीले सन् १९७५ देखि अन्तरराष्ट्रिय ठेक्का पट्टामा हात हालेको हो।
आफूसँग भएको ज्ञान र अनुभव उपयोग गर्दै आफ्नो उपस्थितिको औचित्य प्रमाणीत गर्न सक्ने विदेशी निर्माण परियोजनामा मात्रै यो कम्पनी सहभागी हुने गरेको कम्पनीको आधिकारीक वेबसाइटमा उल्लेख छ।
हाल यो कम्पनी अल्जेरिया, अंगोला, अर्जेन्टिना, साउदी अरेबिया, दुबई, चीन, इजिष्ट, फिलिपिन्स, प्रान्स, हङकङ, भारत, केन्या, लाओसका विभिन्न आयोजनामा काम गरिरहेको छ। लेवनान, माल्वी, मोजाम्विक, नामिबिया, नेपाल, पाकिस्तान, सिंगापुर, दक्षिण अफ्रिका, स्विडेन, थाइल्यान्ड, अमेरिका र जाम्बिया लगायत देशमा पनि यसका आयोजना छन्।
४ महादेशका करिब ४० देशमा सिएमसी कम्पनीले काम गरिरहेको छ।
सन् २०१७ को तथ्यांक अनुसार सिएमसीको वार्षिक आम्दानीको ६५ प्रतिशत विदेशी परियोजनाको निर्माण कार्यबाट आएको उल्लेख छ। सो वर्ष कम्पनीको वार्षिक आम्दानी १ हजार ११८ दशमलव ९ मिलियन युरो रहेको कम्पनीले जनाएको छ।
सिएमसीमा विश्वभर ६ हजार ६ सय ७६ कामदार कार्यरत रहेको जनाइएको छ।
अन्तर्राष्ट्रिय निर्माण कम्पनीहरूको लेखाजोखा गर्ने अन्तर्राष्ट्रिय संस्था मूडी अनुसन्धान सेवाले गत वर्षको अन्तमा सिएमसी कम्पनीलाई मूल्यांकनमा कम आकलन गरेको छ। मूडीको मूल्यांकनमा बि–३ मा रहेको कम्पनी मूल्यांकनपछि सिएए–२ मा झरेको छ।
सिएमसीले आफ्ना लगानीकर्तालाई समयमा भुक्तानी गर्नुपर्ने पैसा नगरेका आधारमा उसलाई एक स्थान तल झारेको मुडीले जनाएको छ।
मेलम्ची खानेपानी आयाेजना निर्माणकाे जिम्मा पाएकाे इटालियन कम्पनी 'सिएमसी'सँगकाे सम्झाैता आधिकारिक रुपमा नेपाल सरकारले रद्द गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
