कलाक्षेत्रलाई बोलेर कनिका बिकाउनुपर्ने ठाउँ मान्नेहरुको कमी छैन । तर, नबोलेर चामल बिकाइरहेका छन्, सौगात मल्ल ।
सौगातको अभिनय विविधता हेरेर आफ्नो फिल्ममा अभिनय गराउन चाहने निर्माता–निर्देशकको संख्या निरन्तर बढिरहेको छ । उनलाई लिएर फिल्म बनाउने निर्माता–निर्देशकहरु त्यसबेला तनावमा पर्दा रहेछन्, जब फिल्म रिलिज हुने दिन नजिकिन थाल्छ । किनभने सौगात आफ्नो फिल्मको ‘प्रमोसन’मा उतिसाह्रो रुचि देखाउँदैनन् ।
यस्तै सकस परेको रहेछ, ‘फाटेको जुत्ता’ टिमलाई । निर्माता अर्जुन कुमार भन्दै थिए, ‘म त आफैं पनि बोल्ने मान्छे हुँ । केही फिल्म बनाइसकेको छु र गायकका रुपमा पनि परिचित भएकाले खास समस्या छैन । तर, नबोल्ने हिरो–हिरोइन परिदिँदा नयाँ निर्माता–निर्देशकलाई समस्या पर्छ।’
घुमाउरो रुपमा अर्जुनले आफूलाई समस्या परेको बताए । खासमा सौगातले बोल्न त्यति जरुरी पनि छैन । बोल्नुपर्ने कुरा त फिल्मको ट्रेलरमै बोलिसकेका छन् । तराईको युवाको भूमिकामा उनको अभिनयको तारिफ भइरहेकै छ । तारिफ गर्नेमध्येका केही हलसम्म पनि गइहाल्लान् । र, बाँकी फिल्म बोल्ला । फिल्मले ‘रमाइलो’ बोलेपछि दर्शक बोल्लान्, दर्शक बोलेपछि अरु पनि हेर्न जालान् । फिल्म पब्लिसिटीको सोझो हिसाब पनि यही हो।
नवलपरासीमा छँदा सौगात पैसा भएको बेला हलमा गएरै हेर्थे भने नहुँदा हल बाहिर भित्तामा कान टाँसेर आवाज सुन्थे । लामो समय यो क्रम चलेको देखेपछि टिकटचेकरलाई उनको माया लाग्न थालेछ।
बुधबार ‘फाटेको जुत्ता’ टिमले आयोजना गरेको कलाकारसँग पत्रकार भेटघाट कार्यक्रममा कान्तिपुर दैनिकका रंग पत्रकार सुशील पौडेलले सुरुमै सौगातलाई प्रश्न गरे, ‘तपाईं किन त्यति बोल्नुहुन्न?’
‘सानैदेखि बोल्ने बानी नै भएन’, सौगातले तौलिएर कम शब्दमै उत्तर दिए ।
उनलाई कुरामा फुलबुट्टा भर्न कहिल्यै मन पनि लागेनछ । बरु काममै मिहिनेत गरेको राम्रो भन्ने महसुस भयो । विस्तारै त्यही कुरा नै बानी बन्यो।
‘यस्तो अन्तर्मुखी स्वभाव भएका मान्छेमा फिल्म खेल्ने रहर कसरी चढ्यो होला ?’ पहिलो पोस्टकी स्वेच्छा राउतको जिज्ञासा थियो।
हरेक प्रश्नको एक लाइन उत्तर दिने सौगात यो प्रसंगमा भने झन्डै १५ मिनेट बोले । यो प्रश्नको उत्तरमा सौगातलाई सोच्नुपरेन, दिमागमा आएका ‘फ्लासब्याक’ शब्दमा सर्सती प्रस्तुत गरे।
नबोल्ने सौगात फिल्म र फिल्मका हिरोको फ्यान पनि फिल्म हेर्दै नहेरी भएका रहेछन् । सुरुमा उनी अमिताभ बच्चनका फ्यान भए, जतिबेला उनले अमिताभको अनुहार देख्नु त परको कुरा, आवाजसम्म सुनेका थिएनन् ।
कसरी भयो यस्तो ?
नवलपरासीका सौगातको घरमा एक जना काम गर्ने मान्छे रहेछन् । जसले फिल्म हेरेर आएपछि भाँडा माझ्दै गर्दा सौगातलाई फिल्मको कहानीदेखि अमिताभले बोलेका डाइलगसम्म सुनाइदिन्थे।
सौगात सम्झिन्छन्, ‘विवाह, व्रतबन्ध जस्ता अवसरमा गाउँमा राति फिल्म देखाउने चलन थियो । हामीलाई राति घरबाट निस्किने अनुमति थिएन । तर, ऊ घरको काम सकेर जान्थ्यो र फिल्म हेरेर आउँथ्यो।’
पछि नवलपरासीकै हलमा फिल्म हेरे । पैसा हुँदा उनी हलमा गएरै हेर्थे भने नहुँदा हल बाहिर भित्तामा कान टाँसेर आवाज सुन्थे । लामो समय यो क्रम चलेको देखेपछि टिकटचेकरलाई उनको माया लाग्न थालेछ । उनलाई थोरै पैसामा पनि हुलमुलमा पारेर हलभित्र छिराउन थालेछन्।
फिल्म हेर्ने भूतसँगै उनमा खेल्ने रहर पनि चढेको रहेछ । त्यसपछि गणितको १,२, ३, ४ बाट उनको रुचि मोडिएर डान्स स्टेपको १, २, ३, ४ तिर पुग्यो । रिजल्ट आउँदा गणितमा जिरो आउन थाल्यो।
त्यसपछि ज्यान बनाउन थाले । एक हदसम्म प्रतिभा निखारेर काठमाडौं आए । गृहजिल्ला नवलपरासी नै भएका निर्देशक आकाश अधिकारीलाई भेटरे अभिनय कक्षा पनि लिए । लामो समय उनीसँगै हिँडे । उनका फिल्म ‘पन्छी’, ‘दाग’ जस्ता फिल्ममा झल्याकझुलुक देखिए।
अभिनय गर्ने रहर पूरा नभएपछि वीरेन्द्र हमालकहाँ अभिनय सिक्न गए । त्यसपछि रंगकर्मी सुनील पोखरेललाई कलाकारको खाँचो पर्दा हमालले सिफारिस गरेकामध्येमा सौगात पनि परे । थिएटरमा पुगेपछि उनको अभिनयको तिर्खा मेटियो, तर हिरोको भूत बाँकी नै रह्यो।
‘त्यो समय चलनचल्तीमा रहेका फिल्मको हिरो फिट हुँदिनँ भन्ने चाहिँ लागिसकेको थियो । ‘कागबेनी’मा अफर आउँदा बल्ल मेरा लागि पनि फिल्म बन्न थाले भन्ने लाग्यो’, उनले भने।
‘अहिले त धेरै स्क्रिप्ट नै तपाईंलाई हेरेर लेखिन्छन् रे नि !’ पत्रकारको अर्काे जिज्ञासा।
तर, उनले यसको सीधा उत्तर दिएनन् । घुमाउरो स्वीकारोक्ति थियो ।
यहीँनेर प्रसंग आयो, ‘फाटेको जुत्ता’को । जुन पहिले नाम राखेर पछि स्क्रिप्ट लेखिएको फिल्म हो।
फिल्म 'फाटेको जुत्ता' को एक दृश्यमा सौगात र प्रियंका कार्की
‘नामलाई न्याय गर्न कति गाह्रो भयो ?’
यसको उत्तर निर्देशक तथा फिल्मका लेखक निकेश खड्काले दिए, ‘जीवन फाटेको जुत्ता जस्तै काम नलाग्ने भन्ने अर्थ बोकेको छ । त्यो सौगातजीको चरित्रले प्रमाणित गरेको छ।’
फिल्मका निर्माता अर्जुन कुमारले फिल्मको नाम प्रमाणित हुने स्क्रिप्ट पाउन ५ वर्ष लागेको बताए।
व्यक्तिगत रुपमा सफल भए पनि सौगात व्यावसायिक रुपमा असफल हिरो हुन थालेका छन् । फाटेको जुत्ताले त्यो क्रम भंग गर्ला त ?
सौगात त्यसमा आशावादी छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।