काठमाडौं- जापानी प्रधानमन्त्री सिन्जो आवेले स्विट्जरल्यान्डको डाभोसमा आयोजित ४९औँ वार्षिक बैठकको विशेष समारोहलाई सम्बोधन गर्दै जापानी अर्थतन्त्र अझै मजबुत रहेको बताएका छन्। पाँच वर्षअघिको डाभोस समारोहमा सहभागी हुँदा जापानको अर्थतन्त्र धराशायी भएको धारणा अभिव्यक्त भएको बन्दै उनले यस्तो अवस्था नआएको बताए।
पछिल्लो समय आफू प्रधानमन्त्री भएको ६ वर्षमा जापानको आर्थिक वृद्धिदर १० दशमलव ९ प्रतिशत रहेको आवेले बताएका छन्। यो आर्थिक वृद्धिसँगै जापानको अर्थतन्त्रमा ४ सय ९० बिलियन अमेरिकी डलर थपिएको उनले दाबी गरे। अर्थतन्त्रलाई दीर्घकालसम्म यथावत राख्न जापानले लगानीमा विशेष जोड दिने गरेको उनले बताए।
जापानको जनसंख्या वृद्धि कम रहेको र वृद्धहरुको संख्या बढ्दै गएको स्वीकार गर्दै आवेले जापानले वैदेशिक रोजगारीको कानुन परिर्वतन गरेको भनाइ राखे। आगामी ५ वर्षमा जापानले करिब ३ सय ४० हजार दक्ष श्रमिक जापान ल्याउने नीति ल्याएको समेत बताएका छन्।
जापानले लिएको यही नीति अनुसार नेपालबाट पनि जापानले दक्ष श्रमिक जापान लैजाने जापानी विदेशमन्त्री तारो कानोको पुस २५ गतेको नेपाल भ्रमणका क्रममा बताएका थिए।
जापानमा धनी र गरिब वर्गबीच खाडल रहेको बताउँदै आवेले आफ्नो कार्यकाल अघि यसको वृद्धिदर कहिल्यै तल नगएको बताए। ‘मेरो कार्यकालअघि जापानमा एकल अभिभावकका छोराछोरी उच्च तहमा पढ्न जाने २४ प्रतिशत रहेकोमा पछिल्लो समय त्यो बढेर ४२ प्रतिशत पुगेको छ,’ उनले भने। यही वर्षको अक्टोबर महिनाबाट जापान सरकारले शिक्षालाई नि:शुल्क बनाउने पनि उनले घोषणा गरे।
यही वर्षको जुन महिनामा जापानमा आयोजना हुने विकासशील २० देश (जी–२०) को सम्मेलनलाई भविष्यका लागि आशावादी हुने सम्मेलन बनाउन पनि आवेले आग्रह गरेका छन्। जापानको अर्थतन्त्र विश्वले भनेको जस्तै धराशायी हुन नलागेको भन्दै जापान यो विषयमा आशावादी भएको पनि बताए। कार्यक्रममा बोल्दै आवेले आगामी जी–२० को सम्मेलनलाई विश्व अर्थतन्त्रका लागि आशावादको सम्मेलन बनाउन केन्द्रित हुन उनको आग्रह थियो।
जुनमा जापानमा आयोजना हुने जी २० सम्मेलनमा धेरै विषयमा छलफल हुने भए पनि खासमा दुई विषय महत्वपूर्ण हुने उनले दाबी गरेका छन्। सम्मेलनमा छलफल हुने ‘डाटा गर्भनेस’ भविष्यमा महत्व राख्ने विषय हुने उनले बताए। विश्व व्यापार संगठनको रोहभरमा ‘डाटा गर्भनेस’ प्रक्रियाको सुरुवात गर्नुपर्ने बेला आइसकेको उनले बताए। आगामी दिनमा विश्व ‘डिजिटल’ अर्थतन्त्रमा जाने बताउँदै उनले डाटा गर्भनेशको आवश्यकतामा जोड दिए।
विशेष कार्यक्रमलाई सम्बोधन गर्दै जापानी प्रधानमन्त्री आवेले आगामी दिनमा डाटाले सबै क्षेत्रलाई सञ्चालन गर्ने भन्दै यसको सुरक्षामा पनि विश्व अगाडि आउनुपर्नेमा जोड दिएका छन्। जी २० मा छलफल हुने अर्को महत्वपूर्ण विषय आविष्कार हुने बताए। अविष्कारका माध्यमबाट विश्वे जलवायु परिर्वतनमा देखिएको समस्या हल गर्न सफल हुने विश्वास उनको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
