काठमाडौं– पप्पु कन्सट्रक्सनसँग मिलेमतो गरी गुणस्तरहीन कार्य गरेर भ्रष्टाचारको मुद्दा खेपेका डिभिजन सडक कार्यालय नेपालगन्जका तत्कालीन प्रमुख राजेशकुमार यादव १८ लाख धरौटीमा छुटेका छन्।
विशेष अदालतले उनलाई सोमबार धरौटीमा रिहा गरेको हो। उनी आजै विशेष अदालत उपस्थित भएका थिए।
अख्तियार दुरुपयोग अनुसन्धान आयोगले पप्पु कन्सट्रक्सनका तत्कालीन अध्यक्ष तथा सांसद हरिनारायण रौनियार, उनका छोरा सुमित रौनियारसहित १२ जनाविरुद्ध विशेष अदालतमा असोज १९ गते भ्रष्टाचार मुद्दा दर्ता गरेको थियो।
बबई पुल गुणस्तरहीन बनाएकाले निर्माणमा संलग्न आयोजना प्रमुख, कर्मचारी र ठेकेदारसहित १२ जनाविरुद्ध मुद्दा दायर भएको थियो।
अख्तियारले धरौटीमा रिहा भएका कार्यालय प्रमुख यादवसँग ७४ लाख ५३ हजार २ सय ६९ रुपैया बिगो दाबी गरेको थियो। सांसद रौनियार र छोरा सुमितसँग जनही २९ करोड ३२ लाख २५ हजार बिगो माग गरेको थियो। यादवसँगै भ्रष्टाचारको मुद्दा खेपेका अर्का कार्यालय प्रमुख भानु जोशीसँग भने एक लाख २५ हजार माग गरिएको थियो।
पप्पुको बदमासी
बर्दियाका गुलरिया र बारबर्दिया नगरपालिका जोड्ने बबई पुल पप्पु कन्स्ट्रक्सनले बनाएको थियो। पुल गुणस्तरहीन बनाएको भन्दै सर्वत्र विरोध भएको थियो। गुणस्तरहीन भएको गुनासो आएपछि अख्तियारले अनुसन्धान थालेको थियो।
संघीय समाजवादी फोरमका प्रतिनिधिसभा सांसद हरिनारायण रौनियार पप्पु कन्स्ट्रक्सनका संस्थापक हुन्। उनी पर्सा क्षेत्र नम्बर ३ बाट निर्वाचित सांसद हुन्। मुद्दा दर्ता भएसँगै उनको सांसद पद स्वतः निलम्बनमा परिसकेको छ।
पप्पु कन्स्ट्रक्सनबाट बर्दिया सदरमुकाम गुलरिया र बारबर्दिया नगरपालिका जोड्ने जब्दीघाटको बबई पुल निर्माणमा गुणस्तरहीन सामग्री प्रयोग भएको, पुल बनाउँदाखेरि नै बांगो देखिएको र उद्घाटन नहुँदै भत्किएको अख्तियारको आरोपपत्रमा उल्लेख छ।
आयोगबाट अनुसन्धान हुँदा डिभिजन सडक कार्यालय नेपालगन्ज र पप्पु कन्स्ट्रक्सन, पोखरियाबीच पुल निर्माणका लागि २०६८ असार २२ गते सम्झौता भएपछि बबई पुल निर्माणको प्रारम्भिक चरणदेखि अन्तिम चरणसम्मको अवस्थालाई हेर्दा निर्माण अवधिमा संलग्न सबै प्राविधिक कर्मचारीहरुबाट भएको अख्तियारको भनाइ छ।
गुणस्तर प्रमाणित नभईकन नै भुक्तानी सिफारिस गरेको, डिजाइन बमोजिम नभएको अख्तियारको दाबी थियो। डिजाइन बमोजिम निर्माण नगरेको तथा निर्माण भएकोहरुमा समेत गुणस्तरहीन भएकाले लोड लिन नसकी पुल भास्सिएको प्रविधिक परीक्षण तथा विश्लेषणबाट समेत पुष्टि हुन आएको आरोपपत्रमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
