काठमाडौं– प्रधानमन्त्री केपी शर्मा ओलीले सरकारले असाधारण गति लिएको बताएका छन्। नेकपा पार्टी कार्यालय धुम्बाराहीमा भएको पार्टी प्रवेश कार्यक्रममा बोल्दै उनले यस्तो बताएका हुन्।
उनले भने, 'अहिले सरकारले असाधारण गति लिएको छ। अब झन् असाधारण गति लिनेछ।'
नेपाल सबैभन्दा तीब्र गतिको आर्थिक विकास गर्ने देश हुने बताउँदै प्रधानमन्त्री ओलीले प्रतिव्यक्ति आयमा पनि उल्लेख्य वृद्धि भएको दाबी गरे। तथ्याङ्क अघि सार्दै उनले भने, '८ सय ५० डलरबाट प्रतिव्यक्ति आय एक हजार डलर पुगेको छ।' नेकपालाई आँकडा परिवर्तन गर्ने पार्टीको संज्ञा दिँदै सरकार बन्दा कुनै संरचना नभएकाले अनेक अप्ठयारा पार गर्दै अघि बढिएको उनकाे भनाइ थियाे।
सरकारले विकासकाे दौडमा जित्ने दाबी गर्दै हरेक दिन एक कदम अघि बढेको र हरेक दिन कुनै न कुनै नयाँ काम भइरहेको उनले बताए।
आफूले कसैकाविरुद्ध लान्छना नलगाउने र आफ्नो झुठो प्रशंषा पनि नगर्ने उनकाे जिकिर गरे। सरकारको विरोधमा आइरहेको समाचारप्रति लक्षित गर्दै उनले भने, 'झुठो कुरा लेख्नेको कलम खुइलिन्छ।'
कतिपयले आफ्नो पार्टी फुट्नेबारे सोचिरहेको भए भ्रम रहेको उल्लेख गर्दै उनले भने, 'बरु पार्टीको तला थपिँदै गएको छ।'
नेकपा अध्यक्षसमेत रहेका प्रम ओलीले पार्टीभित्र छलफल गर्ने वातावरण नरहेको बताउनेलाई नेकपामा जस्तो लोकतान्त्रिक प्रणाली अरु पार्टीमा नभएको जनाउ दिए।
पार्टीको एकतामा भने केही गतिरोध आएको उनले स्वीकारे अब ढिलो हुन नदिने कुरामा दुवै अध्यक्ष ( आफू र पुष्पकमल दाहाल) बीच कुरा भएको पनि उनले जानकारी गराए।
'नेकपा खुइलिएको होइन। हेर्नेको चस्मा खुइलिएको हो। यो बुझ्नेलाई श्रीखण्ड नबुझ्नेलाई खुर्पाको बिँड जस्तै हो', नेकपा कमजोर हुँदै गएको विश्लेषण गर्नेलाई लक्षित गर्दै ओलीले भने।
कार्यक्रममा अर्का अध्यक्ष प्रचण्ड भने बोलेनन्।
कार्यक्रममा नेपाली कांग्रेस चितवनका पूर्व सभापति तीर्थ भुसाल नेकपामा प्रवेश गरेका थिए। नेता भुसाललाई पार्टी अध्यक्षद्धय केपी शर्मा ओली र पुष्पकमल दाहाल 'प्रचण्ड'ले पार्टी प्रवेश गराएका हुन्।
भुसाल २०५१ सालको निर्वाचनमा चितवनबाट प्रतिनिधिसभा सदस्यमा निर्वाचित भएका थिए। उनी चितवन कांग्रेसका संस्थापक नेतासमेत हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766928868.png)
-1764146706.png)
-1766648928.png)
