काठमाडौं– श्रम, रोजगार तथा सामाजिक सुरक्षा मन्त्रालयले ७ सय ५३ वटै स्थानीय तहहरूमा बेरोजगार युवाहरूको विवरण संकलन गर्न रोजगार संयोजक पूर्ति गर्ने तयारी गरेको छ।
मन्त्रालयले रोजगार संयोजकको पदपूर्ति प्रक्रिया शुक्रबार विज्ञापन गर्ने तयारीसमेत पूरा भएको श्रममन्त्री गोकर्ण विष्टले बताए।
मन्त्रालयले बिहीबार पत्रकार सम्मेलन गरेर सबै स्थानीय तहमा रोजगार संयोजक नियुक्तिका लागि शुक्रबारदेखि अनलाइन आवेदन खुला हुने जानकारी गराएको थियो।
संयोजक नियुक्तिका लागि मन्त्रालयले तयार पारेको मापदण्ड पुस ९ गते बसेको मन्त्रिपरिषद् बैठकले स्वीकृत गरेको थियो।
मापदण्डअनुसार मन्त्रालयले सम्बन्धित नगर तथा गाउँपालिका मातहतमा रहने गरी नायव सुब्बा र शाखा अधिकृत सो सरहको एकरएक जना संयोजक नियुक्त हुने छन्।
७ सय ५३ स्थानीय तहमध्ये १० हजार भन्दा कम जनसंख्या भएका स्थानीय तहमा नायव सुब्बा सो सरहको व्यक्ति रहने मन्त्रालयले जनाएको छ।
१० हजारमाथि जनसंख्या भएका स्थानीय तहमा शाखा अधिकृत सो सरहको अस्थायी कर्मचारी भर्ना गर्ने मन्त्रालयले जनाएको छ।
उक्त कर्मचारीले सम्बन्धित पालिकाको प्रमुख प्रशासकीय अधिकृतको अधिनमा रहेर रोजगार सेवा केन्द्र सञ्चालन गर्नुपर्ने मापदण्डमा उल्लेख छ।
रोजगार संयोजकको स्वीकृत अस्थायी दरबन्दीमा मन्त्रालयले एक वर्षमा लागि प्रदेशगत रुपमा खुला प्रतिष्पर्धाद्वारा करारमा पदपूर्ति गरी स्थानीय तहमा खटाउने छ।
पारदर्शी रुपमा नियुक्तका लागि मन्त्रालयले अलग्गै सफ्टवेयरको व्यवस्था गरेको र सोही मार्फत हुने मन्त्रालयले जनाएको छ।
निष्पक्ष बनाउनका लागि मन्त्रालयले तोकिएको न्यूनतम शैक्षिक योग्यताको लब्धांक प्रतिशतबापत ७० प्रतिशत, न्युनतम् भन्दा माथिको शैक्षिक योग्यताबापत २० र अनुभवको प्रमाणपत्रका आधारमा अंक १० गरी सफ्टवेयरले कर्मचारी छनोट गर्नेछ।
नायव सुब्बा सो सरहका लागि प्रविणता प्रमाण पत्र तह (प्लस टू) र शाखा अधिकृत सो सरहका लागि स्नातक तह उत्तीर्ण हुनुपर्ने गरी न्यूनतम शैक्षिक योग्यता तोकिएको छ।
उमेर हदका लागि २१ वर्ष पूरा भई ४५ ननाघेको हुनुपर्ने गरी मापदण्डमा उल्लेख छ।
संयोजकको सेवा सुविधा भने निजामती कर्मचारी सो सरह र सम्बन्धित स्थानीय तहमा सरकारले तोकेअनुसारको भत्ता दिने मन्त्रालयले जनाएको छ।
प्रत्येक स्थानीय तहमा रोजगार संयोजक नियुक्त गरेर लाखौँलाई रोजगार दिने सरकारको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
