काठमाडौं- चीनले सुरु गरेको महत्वाकांक्षी परियोजना बेल्ट एन्ड रोड इनिसिएटिभ (बिआरआई) मा कनेक्टिभिटी र ऊर्जालाई सकारले उच्च प्राथमिकतामा राखेको बताएको छ।
बिहीबार मन्त्रिपरिषद्का निर्णय सार्वजनिक गर्न सिंहदरबारमा आयोजित पत्रकार सम्मेलनमा यसबारे उठेको प्रश्नको जवाफ दिँदै सरकारका प्रवक्ता समेत रहेका सञ्चार तथा सूचना प्रविधिमन्त्री गोकुल बास्कोटाले यस्तो बताएका हुन्। ‘हामीले यस सम्बन्धमा केही अवधारणाहरु अघि सारको छौं,’ मन्त्री बास्कोटाले भने, ‘कनेक्टीभिटीलाई हामीले प्राथमिकता दिएका छौं। ऊर्जालाई हामीले त्यतिकै प्राथमिकता दिएका छौं।’
बिआरआई परियोजना अन्तर्गत सरकारले सहयोग प्राप्त गर्न चाहेका क्षेत्रको सरकारले प्राथमिकीरण गरिसकेको बताउँदै उनले भने, ‘कृषिलाई हामीले प्राथमिकता दिएका छौं। त्यसैगरि प्रविधिलाई पनि प्राथमिकता दिएका छौं।’
उनले प्रधानमन्त्रीको चीन भ्रमणका बेला पनि यसबारे कुरा राखिएको बताए। ‘सम्माननीय प्रधानमन्त्री ज्यू र परराष्ट्रमन्त्री ज्यूको भ्रमणका यी बिषयलाई राखेका छौं,’ उनले जानकारी दिँदै भने।
उनले परियोजना अन्तर्तत सहयोग प्राप्त गर्न चाहेका क्षेत्रको सूचीसमेत बनाएको भन्दै ती अनुदान वा ऋण दुवै हुन सक्ने बताए।
नेपालले सन् २०१७ मा चीनको बिआरआई परियोजामा सहभागी हुने सहमतिमा हस्ताक्षर गरेको थियो।
त्यसै मन्त्री बास्कोटाले विवादित राजदूत लक्की शेर्पाबारे सरकार यसअघिकै धारणामा अडिग रहेको बताएका छन्। यसअघिको पत्रकार सम्मेलनमा उनले प्रधानमन्त्री केपी ओलीले राजदूत शेर्पालाई राजीनामा दिएर मार्ग प्रशस्त गर्न आग्रह गरेको बताएका थिए।
‘यस विषयमा सरकारले दुई साताअघिको निर्देशनात्मक दृष्टिकोण जे थियो त्यसलाई कायम राखेको छ’, उनले भने, ‘यो अहिले प्रक्रियामै छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
