काठमाडौं– सरकारले पानी जहाज चलाउनका लागि कार्यालय स्थापना गर्ने भएको छ।
पानी जहाज ल्याउने आफ्नो प्रधानमन्त्री ओलीले पुरा गर्न नसकेको भन्दै आलोचना भइरहेका बेला सरकारले कार्यालय राख्ने र कर्मचारीको व्यवस्था गर्ने निर्णय गरेको हो।
सरकारका प्रवक्तासमेत रहेका सूचना तथा सञ्चार मन्त्री गोकुल बाँस्कोटाले बिहीबार मन्त्रिपरिषदले गरेका निर्णयहरू सार्वजनिक गर्दै नेपाल पानीजहाज कार्यालय स्थापना गर्ने निर्णय भएको बताए।
उनले त्यसका लागि १६ जना कर्मचारीको दरबन्दी रहने र त्यसको नेतृत्व उपसचिवले गर्ने जानकारी दिए। उनले भने, ‘अब कागजको पानीजहाज होइन साँच्चै पानीजहाज चलाउन हामीले कार्यालय स्थापना गर्ने र कर्मचारीको दरबन्दी सिर्जना गर्ने निर्णय गरेका छौँ।’
यसअघि एउटा सार्वजनिक कार्यक्रममा प्रधानमन्त्री ओलीले पुस १६ गतेदेखि नेपालको कोसीमा पानीजहाज चल्ने भन्दै त्यसमा यात्रा गर्न आलोचकहरुलाई निम्तो दिएका थिए।
पुस १६ गते पानीजहाज चल्ने नभएपछि उनको आलोचना भएको थियो।
रेल किन्न स्वीकृति
त्यस्तै सरकारले रेल किन्न भौतिक पूर्वाधार तथा यातायात मन्त्रालयलाई स्वीकृति दिएको छ। जनकपुर–जयनगर रेल सन्चालन गर्न आफ्नै रेलगाडी किनेर सेवा सञ्चालन गर्ने तयारी स्वरुप यस्तो निर्णय गरेको मन्त्री बाँस्कोटाले जानकारी दिए।
जनकपुर–जयनगर रेल सेवा फागुनदेखि नियमित सञ्चालन गर्ने सरकारको तयारी छ।
यस्ता छन् मन्त्रिपरिषद्का निर्णय
१. मन्त्रीहरूको तलब र अन्य सेवा, सुविधा बापत भुक्तानी हुने रकमको व्यवस्थापन गर्ने निर्णय गरिएको छ।
२. प्रधानमन्त्री राष्ट्रिय प्रतिभा पुरस्कार कोष स्थापना र सञ्चालनसम्बन्धी कार्यविधि, २०७५ स्वीकृत गरिएको छ।
३. लगानी सम्मेलन, २०१९ गर्न आवश्यक बजेटको व्यवस्था गर्ने निर्णय गरिएको छ ।
४. कर्मचारी सञ्चय कोषको अध्यक्ष पदमा शिशिरकुमार ढुंगानालाई नियुक्त गरिएको छ।
५. इम्प्लिमेन्टेसन एग्रिमेन्ट अफ चाइना एड अन आयल एन्ड ग्याँस रिसोर्सेज सर्भे इन नेपाल स्वीकृत गरिएको छ।
६. प्रहरी (छैटौँ संशोधन) नियमावली, २०७५ स्वीकृत गरिएको छ।
७. वीरेन्द्रनगर नगरपालिकामा शीत भण्डार निर्माणका लागि विनियोजित रु. ५० लाख लाइन मिनिस्ट्री बजेट इन्फरमेसन सिस्टममा प्रविष्टि गर्ने निर्णय गरिएको छ।
८. भौतिक पूर्वाधार तथा यातायात मन्त्रालयलाई जी टु जी प्रक्रिया अवलम्बन गरी रेल गाडी खरिद कार्य अघि बढाउन सैद्धान्तिक सहमति दिइएको छ।
९. जनशक्ति क्षमता विकास प्रतिष्ठानसम्बन्धी विधेयक सङ्घीय संसद्मा पेस गर्न स्वीकृति दिइएको छ।
१०. प्रदेश स्वास्थ्य निर्देशनालय लगायतका निकायहरूको सङ्गठन संरचना र दरबन्दी तेरिज संशोधन गर्ने निर्णय गरिएको छ।
११. नेपाल पानीजहाज कार्यालयको सङ्गठन संरचना र दरबन्दी तेरिज स्वीकृत गर्ने निर्णय गरिएको छ।
१२. आन्तरिक शान्ति र व्यवस्था कायम गर्ने सम्बन्धमा बनेको विधेयक सङ्घीय संसद्समक्ष पेस गर्न स्वीकृति दिइएको छ।
१३. 'राष्ट्रिय जीवनका विभिन्न क्षेत्रमा रहेका महानुभावहरूको मर्यादाक्रम स्वीकृत गरी नेपाल राजपत्रमा प्रकाशन गर्ने निर्णय गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
