काठमाडौं– निजी हवाई सेवा प्रदायक कम्पनी हिमालय एयरलाइन्सले त्रिभुवन अन्तर्राष्ट्रिय विमानस्थल कार्यालयसँग बक्यौता रकम भुक्तानीका लागि १० दिनको समय माग गरेको छ।
एयरलाइन्सले विमानस्थल कार्यालयलाई शुक्रबार ५० लाख रुपैयाँ बुझाउँदै बाँकी रहेको विमानस्थल सेवा शुल्कवापतको साढे १३ करोड रुपैयाँ तिर्नका लागि १० दिनको समय माग गरेको हो।
‘एयरलाइन्सले बक्यौता चुक्ता गर्नका लागि १० दिनको समय मागेको छ’, विमानस्थल कार्यालयका प्रमुख राजकुमार क्षेत्रीले भने, ‘एयरलाइन्सले मागेको समयको विषयमा सोमबार कार्यालयका अन्तर्गतका विभिन्न विभागसँग छलफल गरेर मात्रै निर्णय हुन्छ।’
एयरलाइन्सले विमानस्थल कार्यालयलाई तिर्नुपर्ने शुल्क लामो सयमदेखि नतिर्दा १४ करोड १ लाख ७५ हजार रुपैयाँभन्दा बढी भएको थियो।
‘विमानस्थल कार्यालयले नेपाली वायुसेवा कम्पनी भएकै कारण केही सहजता गरिदिएको थियो’, क्षेत्रीले भने, ‘बक्यौता रकम बढ्ने क्रम नरोकिएपछि हिमालयलाई समयमै रकम चुक्ता गर्ने ताकेता भएको थियो।’
विमानस्थल कार्यालले ताकेता गरेसँगै हिमालय एयरलाइन्सले केही रकम तिर्दै १० दिनको समय माग गरेको उनको भनाइ छ।
हिमालयले बाँकी बक्यौता रकम चुक्ता नगरे कानुनले दिएको अधिकार समेत प्रयोग गर्नुपर्ने क्षेत्री बताउँछन्।
नेपाल–चीन संयुक्त लगानीमा २०१४ अगष्टमा स्थापित हिमालय एयरलाइन्सले अन्तर्राष्ट्रिय हवाइ सेवा प्रदान गर्दै आएको छ। पछिल्लो सयम हिमालय एयरलाइन्सले यही कात्तिक १ गतेदेखि काठमाडौं–चोङकिङमा चार्टर उडानमार्फत सिधा उडान गरिरहेको छ।
यस बाहेक हिमालयले मलेसियाको क्वालालम्पुर, साउदीको अरबको दमाम, युएइको दुबई र कतारको दोहामा नियमित उडान गर्दै आएको छ।
बक्यौता नतिर्नेलाई के छ कानुनी कारबाही
विमानस्थल सेवा शुल्क नियमावली २०६७ को नियम ३० मा विमानस्थल कार्यालय प्रमुखले वायुयान कम्पनीले समयमै रकम दाखिला नगरेको अवस्थामा कारोबार रोक्कादेखि तत्काल उडान बन्द गराउन सक्ने उल्लेख छ।
नियमावलीको नियम ३० को एकमा नियमावली बमोजिम बुझाउनुपर्ने शुल्क समयमा नबुझाउने व्यक्ति वा संस्थालाई विमानस्थलबाट जारी भएको अनुमति पत्र, सम्झौता पत्र वा अन्य कुनै कारोवार गर्न दिएको अनुमति विमानस्थल प्रमुखले स्थगन गरी विमानस्थलमा रहेको निजको सम्पत्ति रोक्का राखी निजको काम कारबाही वा व्यवसायमा रोक लगाउन सक्ने उल्लेख छ। साथै त्यसरी रोक लगाएको सूचना अबिलम्व प्रधान कार्यालयमा पठाउनुपर्ने हुन्छ।
नियम दुईमा कुनै व्यक्ति वा निकायले बिल जारी भएको मितिले साठी दिनसम्म पनि विमानस्थलसँग सम्बन्धित शुल्क नबुझाएमा विमानस्थलको प्रमुखले त्यस्तो व्यक्ति वा संस्थालाई विमानस्थलमा व्यवसाय गर्न रोक लगाउँदै वायुसेवाको हकमा उडानमा तत्काल रोक सक्ने उल्लेख छ।
नियम ३० को तीनमा प्राधिकरणले यस नियमावली बमोजिम बुझाउनुपर्ने शुल्क नबुझाएमा वा प्राधिकरणसँग भएको सम्झौता उलङ्घन गर्ने व्यक्ति तथा संस्था संस्थाका सञ्चालकलाई भविष्यमा हवाइ सेवा, विमानस्थल तथा प्राधिकरणसँग सम्बद्ध कुनै किसिमको काम कारबाही तथा व्यापार व्यवसायमा सहभागी हुन नपाउनेगरी कालोसूचीमा राख्न सक्ने समेत नियमावलीमा उल्लेख छ।
नियमावलीका चारमा समयमा शुल्क नबुझाउने व्यक्ति वा संस्था उपर समयमै नियम बमोजिमको कारबाही प्रक्रिया सुरु नगर्ने विमानस्थल प्रमुख उपर विभागीय कारबाही गरिने समेत उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
