बुटबल- प्रदेश ५ को राजधानी रुपन्देहीको बुटवल तथा सदरमुकाम भैरहवा बजारमा पार्किङस्थलको अभाव हुन थालेको छ। सडकमा सवारीसाधनको चाप बढ्दै गए पनि बजार क्षेत्रमा पार्किङस्थलको व्यवस्थापन नहुँदा नागरिक समस्या झेल्न बाध्य छन्।
पार्किङस्थल अभावको मुख्य मारमा मोटरसाइकल र कार चालकहरु पर्ने गरेका छन्। बजारक्षेत्रमा सडकको एक किनारमा मात्र पार्किङस्थलको व्यवस्थापनका गरिएको छ। तर पछिल्लो समय बढ्दो सवारीको चापले पार्किङका लागि ठाउँ अभाव हुन थालेको हो। बजार आउने स्थानीयबासीका साथै आन्तरिक तथा बाह्य पर्यटकलाई समेत पार्किङको समस्याले सताएको छ।
सडक जामको मारमा प्रदेश मन्त्रीदेखि सांसदसम्म पर्ने गरेका छन्। प्रदेशसभा सदस्य फकरुद्दिन खानले सडक जामकै कारण प्रदेशसभा बैठकमा समयमा समेत पुग्न नसकिएको बताए।
बुटवलमा जस्तै भैरहवामा पनि पार्किङकको समस्या छ। '२०१९ को नयाँ वर्ष लागेकोले भारतीय पर्यटकहरुले बजारमा घुइँचो छ। तर, बजारमा पार्किङ स्थलको अभाव हुदाँ धेरै समस्या छ,' बैंक रोडस्थित साहिल इन्टरनेसनलका सञ्चालक हरिश सेठियाले भने, 'पार्किङ स्थलकै अभावमा बैंक रोडको मुख्य बजार अहिले प्रहरी टोलतर्फ फैलिरहेको छ। यसले भविष्यमा बैंकरोडका व्यवसायीलाई समस्या पर्ने देखिन्छ।'
बजार गर्न बैंकरोडमा आउने भारतीय पर्यटकहरुका सवारीलाई पनि ट्राफिक प्रहरीले पार्किङको विषयमा तत्काल कारबाही गर्दा आफूहरुको व्यवसाय धरापमा पर्नुका साथै पर्यटकहरुमा नकरात्मक असर पुगेको उनले बताए।
लुम्बिनी, मर्चवार, सुर्यपूरा, तिलोत्तमा, धकधई लगायत वरिपरिका नागरिकका लागि भैरहवा मुख्य बजार हो। पार्किङ स्थलको अभावमा भैरहवामा बजार भर्न गाडी लिएर जान धेरै समस्या पर्ने गरेको ओमसतिया गाउँपालिका २ पडसरीका सितल जिटी बताउँछन्।
जिल्ला ट्राफिक प्रहरी कार्यालयले रुपन्देहीका प्रमुख प्रहरी निरीक्षक बेद पौडेलले पार्किङ स्थलको अभावका कारण बजारमा ट्राफिक व्यवस्थापन गर्नका लागि आफूहरुलाई पनि समस्या परेको बताए। सडक पुरानै संरचनाको रहेको अवस्थामा लाखौँ सवारीसाधनलाई व्यवस्थापन गर्न कठिनाइ भएको उनको भनाइ छ।
बर्सेनि सवारीसाधनको संख्या बढ्दै गएका छन्। तर सडक संरचना पुरानै अवस्थामा रहँदा समस्या थपिएको हो। 'गौतम बुद्ध अन्तर्राष्ट्रिय विमानस्थल सञ्चालनमा आएपछि मुख्य बजारलाई वान वे गर्नुपर्ने वा पैदल हिँड्नुपर्ने अवस्था सिर्जना हुन्छ,' उनले भने, 'बुटवलमा अहिले नै पार्किङका कारण सडक जामले समेत सताएको छ।'
दैनिक गुड्छन् १८ हजार सवारी
ट्राफिक प्रहरीका अनुसार सदरमुकाम भैरहवामा मात्रै दैनिक साना तथा ठूला गरी करिब १८ हजार सवारीसाधन गुड्छन्। जसमध्ये दैनिक करिब १४ हजार गाडीलाई कुनै न कुनै बेला बजारमा पार्किङको आवश्यकता पर्दछ। त्यसमध्ये गलत स्थानमा पार्किङ गरेकाले दैनिक करिब ३० वटा सवारीसाधन कारबाहीमा पर्ने गरेको प्रमुख पौडेलले बताउँछन्।
गलत पार्किङ गरेका सवारीसाधनबाट मात्र वार्षिक ३५ देखि ४० लाख राजश्व संकलन हुने गरेको उनले बताए। पछिल्लो वर्ष मात्र यातायात व्यवस्था कार्यालय लुम्बिनीमा करिब डेढ लाख सवारीसाधन दर्ता भएका छन्। डेढ लाख सवारीसाधनमध्ये अधिकांश सवारी रुपन्देही जिल्लाको भैरहवा र बुटवल बजारमा बढी गुड्छन्।
ट्राफिक प्रहरीका अनुसार अन्य अञ्चलमा दर्ता भएर रुपन्देहीमा गुड्ने सवारी साधन वार्षिक करिब २० हजारको हाराहारीमा छन्।
यता सिद्धार्थनगर नगरपालिका (भैरहवा) का मेयर हरीप्रसाद अधिकारीले पार्किङ स्थलको व्यवस्थापनका लागि नगरपालिकाले छलफल तथा प्रक्रिया अघि बढाएको बताए। उनले मुख्य बजार क्षेत्रमा नगरपालिकाको स्वामित्वमा जग्गा नरहेको हुदाँ निजी क्षेत्रसँग समन्वय गरेर पार्किङ स्थलको व्यवस्थापन गर्ने सोचमा रहेको बताए।
भैरहवा कारगारलाई नगरपालिकाको स्वामित्वमा ओमसतिया गाउँपालिकाको पट्खौलीमा रहेको जग्गा दिएर हाल भैरहवा कारगार रहेको जग्गा नगरपालिकाले आफ्नो स्वामित्वमा लिएर पार्किङ स्थलको व्यवस्थापनको लागि प्रक्रिया अघि बढाइएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
