चितवन– पूर्वी चितवनका ४ नगरपालिकाले एकआपसमा सहयोगी हुने कामलाई संयुक्त रुपमा सुरु गरेका छन्। भौगोलिक हिसाबले जोडिएका रत्ननगर, कालिका, राप्ति र खैरहनी नगरपालिकाले कतिपय विकास निर्माणका कामलाई संयुक्त रुपमा सञ्चालन गरेका हुन्।
दमकल खरिद, गुणस्तर मापनको प्रयोगशाला निर्माण, कर निर्धारणको दर, चक्रपथ निर्माण, पुल निर्माण, नदीजन्य वस्तु उत्खनन लगायतका विषयमा संयुक्त रुपमा काम थालेका हुन्। तीमध्येको सबैभन्दा पुरानो रत्ननगर नगरपालिकाका प्रमुख नारायण वनका अनुसार संयुक्त रुपमा दुई वटा दमकल खरीद गर्ने सहमति भएको छ।
निर्माणको कामको गुणस्तर मापनका लागि एउटै प्रयोगशाला निर्माणका विषयमा छलफल भइरहेको छ। छुट्टाछुट्टै नगरपालिकाले प्रयोगशाला निर्माण गर्दा खर्चिलो हुने भएकाले संयुक्त रुपमा काम हुनेगरी प्रयोगशाला निर्माण गर्न लागिएको हो। ४ नगरपालिका मिलेर भविष्यमा महानगर बन्ने निश्चित भएकाले चक्रपथ निर्माणको विषयमा छलफल भइरहेको वनले बताए।
एक नगरबाट अर्को नगरमा जाने आउने पुल निर्माणमा सहकार्य गरिने बताउँदै उनले विपद् व्यवस्थापनका लागि संयुक्त रुपमा केन्द्र स्थापना गर्न लागिएको जानकारी दिए। सबै नगरपालिकामा कर निर्धारण गर्दा छलफल गरेर कर निर्धारण गर्ने काम भइरहेको वनको भनाइ छ।
नदीजन्य वस्तुको निकासीको दररेटमा एकरुपता दिइएको पनि उनले बताए। पूर्वी चितवनका नदीमा सवारीसाधन पखाल्दा वन्यजन्तुलाई असर पर्ने देखिएपछि मकवानपुरका स्थानीय तह र पूर्वी चितवनका चार नगरपालिकाले संयुक्तरुपमा छलफल गरी नदीमा सवारीसाधन धुन बन्द गराइएको जानकारी दिए। संरक्षणको पाटोमा एक जुट भएर लाग्ने सहमति भएको पनि वनको भनाइ छ।
खैरहनी नगरपालिका प्रमुख लालमणि चौधरीले एकीकृत शहरी विकास विभागमा चारै नगरपालिकाले एउटै भूगोल भएकाले व्यवस्थित विकासका लागि आग्रह गरिएको बताए। उनका अनुसारसङ्घीय मामिला मन्त्रालयमा चारवटै नगरपालिकाले पूर्वी चितवन नदी नियन्त्रण जीविकोपार्जन कार्यक्रमलाई चार वर्ष थप गर्न निवेदन पठाएको छ।
अन्य धेरै विषयमा सहकार्य गरेर विकास निर्माण गर्दै जाने सहमति भएको चौधरीले बताए।
नदीनाला एउटा नगरपालिकाबाट बगेर अर्को नगरपालिका हुँदै जाने हुँदा कतिपय समस्याको समाधान संयुक्त रुपमा नै गर्नुपर्ने भएकाले ती नगरपालिका एकआपसमा मिलेर काम गरेका हुन्। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
