वासिङटन– संयुक्त राज्य अमेरिका र उत्तर कोरियाबीचको बैठकका लागि ठाउँ खोज्दै गरिएको जानकारी अमेरिकाले दिएको छ। संयुक्त राज्य अमेरिकाका राष्ट्रपति डोनाल्ड ट्रम्पले सो जानकारी दिएको बताइएको छ।
राष्ट्रपति ट्रम्प र उत्तर कोरियाली नेता किम जोङ उनबीचको आर्को चरणको बैठकको तयारी भइरहेको जानकारी यसअघि नै दिइएको थियो। तर, सो बैठकका लागि स्थानको भने निश्चित भएको थिएन।
‘अर्को बैठक गर्ने बारेमा सहमति भइसकेको छ तर पनि यस बैठकको स्थान र मिति भने तय भएको छैन। स्थान र मिति तय गर्ने बारेमा तयारी भइरहेको भइरहेको छ’, आइतबार ह्वाइट हाउसअघि राष्ट्रपति ट्रम्पले भने, ‘उत्तर कोरियासँगको सम्बन्ध राम्रै गतिमा अघि बढिरहेको छ।’
राष्ट्रपति ट्रम्पलाई उद्धृत गर्दै अमेरिकी टेलिभिजन सिएनएनले भनेको छ, ‘उत्तर कोरियासँगको सम्बन्ध राम्रो हुँदै गएको छ, हामीले राम्रोसँग वार्ताहरु अघि बढाइरहेका छौँ, अहिले कुनै रोकावट छैन, हामीले आपसमा निकै राम्रो गरिरहेका छौँ।’
‘तर, उत्तर कोरियामाथिको नाकाबन्दी भने जारी नै रहनेछ, त्यो पूरा गति र प्रभावमा नै कायम रहने छ’, राष्ट्रपति ट्रम्पले भने।
यसै हप्ताको सुरुमा राष्ट्रपति ट्रम्पले उत्तर कोरियाली नेताले आफूलाई एक पत्र पठाएको खुलासा गरेका थिए। किमको पत्रपछि पनि आफूहरुबीच वार्ता भएका र त्यसबाट छिट्टै नै दोस्रो चरणको वार्ताका लागि तयारी गरिने उनले बताएका थिए।
उता उत्तर कोरियाले भने सिंगापुरमा पहिलो चरणको वार्तामा भएका प्रतिबद्धताहरुको कार्यान्वयनमा अमेरिकी पक्षबाट कुनै पनि प्रगति नभएको भन्दै यदि त्यसो भएमा आफ्नो तर्फबाट भएको निशस्त्रीकरणको प्रयासको प्रगति पनि रोकिने चेतावनी दिएको थियो।
उत्तर कोरियाली नेता किमले नयाँ वर्षका अवसरमा दिएको सन्देशमा अमेरिकाको तर्फबाट उत्तर कोरियामाथि लगाइएको नाकाबन्दी हटाउने तथा अन्य कार्यक्रममा कुनै प्रगति नभएको भन्दै यदि त्यस्तो भयो भने आफूहरुको प्रतिबद्धताहरु पनि पूरा गर्नुपर्छ भन्ने नरहेको स्पष्ट पारेका थिए।
तर, त्यसपछि विकसित परिस्थितिका कारण यी दुई देशबीच अर्को चरणको बैठक हुने देखिएको बताइन्छ। रासस/एनआई
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771838848.png)
-1764146706.png)
