काठमाडौं– अखिल नेपाल फुटबल संघ (एन्फा) को सोमबार बसेको कार्यसमितिको बैठकले आगामी निर्वाचन एक महिना टाढा सार्ने निर्णय गरेपछि उपाध्यक्ष किशोर राई ‘झापाली’ले असहमति जनाउँदै ‘नोट अफ डिसेन्ट’ लेखेका छन्।
तिहारको बिदा लगत्तै कुनै छलफल नगरि एन्फाले एक्कासी कार्यसमितिको बैठक बोलाएर माघ ११ मा निर्वाचन गर्ने निर्णय गरेको हो। यसअघि निर्वाचन पुस १७ गते गर्ने निर्णय गरेको थियो।
यस्तै, कार्यसमितिले निर्वाचनका लागि गठन गरेको उजुरी कमिटीमा वकिल बालकृष्ण श्रेष्ठको सदस्यतालाई लिएर प्रश्न उठेको छ।
वकिल श्रेष्ठ एन्फाका वरिष्ठ उपाध्यक्ष मणी कुँवरको घरायसी मुद्धा लडिरहेका वकिल हुन्। एन्फाका अन्य पदाधिकारीले घरायसी मुद्धा लडिरहेका व्यक्तिलाई उजुरी कमिटीमा राख्ने आचारसंहिता विपरित भएको भन्दै आपत्ति जनाएका हुन्।
‘एक्कासी निर्वाचन सार्ने र घरायसी मुद्धा लडिरहेका वकिललाई निर्वाचनको उजुरी कमिटीमा राख्ने निर्णयले शंका उब्जिएको छ। बिना कुनै एजेन्डा फुटबललाई धरासायी पार्ने नियतले आएको हुनाले यसको विरोध गरेको हुँ,’ उपाध्यक्ष राईले नेपाल लाइभसँग भने।
एन्फाले कार्यसमितिको बैठकबाट ४ वटा निर्णय गरेको थियो। जसमा सुमन केसीको संयोजकत्वमा ३ सदस्यीय निर्वाचन समिति गठन गरेको छ।
यस्तै, अधिवक्ता मोतिराम गौतमको संयोजकत्वमा निर्वाचन अपील कमिटी गठन गरेको छ। यसैगरी ४५ वटा जिल्ला फुटबल संघको निर्वाचन कार्तिक २५ देखि मंसिर २५ सम्म गरिसक्नु पर्ने र माघ ११ मा केन्द्रिय समितिको निर्वाचन गर्ने निर्णय गरिएको थियो।
यस्तै, एन्फा नेतृत्वको लापरवाहीका कारण गत वर्ष एएफसी कप खेल्न नपाएको थ्रीस्टार क्लबलाई यसपालि एएफसी क्लब च्याम्पियनसिपमा भाग दिलाउन पहल गर्ने निर्णय भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
