काठमाडौं– नेपाली कांग्रेस केन्द्रीय कार्यसमितिले महासमिति बैठकको भावनाविपरीत विधान पारित गर्ने संकेत देखिएको छ।
महासमिति बैठकमा उपस्थित बहुसंख्यक प्रतिनिधि र जिल्ला सभापतिहरुले केन्द्रीय नेताहरु वडा तहबाट निर्वाचित भई महाधिवेशनको लागि चुनिनुपर्ने व्यवस्थाको माग गरेका थिए।
अधिकांश केन्द्रीय सदस्यहरुले जिल्ला सभापतिहरुको आवाजको विपक्षमा रहेकाले माघ १० बाट बस्ने केन्द्रीय कार्य समितिको बैठकले वर्तमान विधानकै प्रावधानको आधारमा विधान पारित गर्ने देखिएको हो।
महासमिति बैठकको समापनको अघिल्लो दिन सभापति शेरबहादुर देउवा र वरिष्ठ नेता रामचन्द्र पौडेलसहित जिल्ला सभापतिहरुको छुट्टै बैठक बसेको थियो। उक्त बैठकमा देउवाले ‘केन्द्रीय सदस्यहरुलाई मनाउनुस्’भन्दै जिल्ला सभापतिहरुलाई जवाफ दिएको गुल्मी जिल्ला सभापति भुवन श्रेष्ठले स्मरण गरे।
तल्लो तहबाट केन्द्रीय नेताहरु विच्छेद हुने गरेको जनाउँदै जिल्ला सभापतिहरुले केन्द्रीय सदस्यहरु वडाबाट निर्वाचित हुनैपर्ने अडान राखेका थिए।
जिल्ला सभापतिहरुले आफ्नो मागमा अडिग रहेपछि समापनको दिन सभापतिले वैकल्पिक बाटो रोजेका थिए। केन्द्रीय कार्यसमितिको बैठकले जिल्ला सभापतिको मागलाई सम्बोधन गर्नेगरी विधान पारित गर्ने वचन दिएका थिए।
केन्द्रीय सदस्यहरुको महाधिवेशन प्रतिनिधि स्वतः बन्न पाउनुपर्ने जोडका कारण पार्टी सभापतिको बचन ‘तुहिने’भएको छ।
तलैबाट महाधिवेसन प्रतिनिधि चुनिनुपर्ने प्रावधान राख्ने पक्षमा न्युन केन्द्रीय सदस्यहरु छन्। महाधिवेशन प्रतिनिधि छनोट हुन नसके माथिल्लो संगठनमा प्रतिस्पर्धा गर्न बाटो बन्द हुने हुँदा केन्द्रीय सदस्यहरु ‘आन्तरिक चुनावमा डराइरहेका’ छन्।
पार्टी महामन्त्री डा शशांक कोइराला नजिक रहेका एक केन्द्रीय सदस्यले भने, ‘केन्द्रीय कार्यसमिति आफै महाधिवेशन आयोजक समिति भएकाले चुनिनुपर्ने प्रावधान अनुचित हो।’
अर्कोतिर, केन्द्रीय नेताहरुलाई तल्लो तहमा निर्वाचित हुनुमा पार्टीकै गुटले अवरोध गर्ने डर पनि छ। ‘एक पक्षको नेतालाई वडामा हराउन अर्को पक्षका लागे भने के हुन्छ?’उनले प्रश्न गरे।
पार्टी सभापति र वरिष्ठ नेता पौडेल पक्षीय अधिकांश केन्द्रीय सदस्यहरु वर्तमान प्रावधानकै पक्षमा छन्। तेश्रो धारका रुपमा चिनिएका कृष्णप्रसाद सिटौला समूहका युवा नेताहरुको जोड भने तल्लो तहबाट निर्वाचित हुनुपर्नेमा छ।
वडाबाटै निर्वाचित भई आउनुपर्ने पक्षमा आफुपनि रहेको केन्द्रीय सदस्य रमेश लेखकले बताए। उनले भने, ‘धेरै केन्द्रीय सदस्यहरु निर्वाचित भई आउनुपर्ने प्रावधानको विपक्षमा छन्।’ दुई शिर्ष नेताहरुले महासमितिको बैठकमा वचन दिए पनि विधान सोही अनुरुपको आउनेमा उनले आंशका गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
