भरतपुर– २०६७ सालदेखि प्राथमिक तहका विद्यार्थीलाई दिइँदै आएको दिवाखाजा कार्यक्रम हटेपछि चितवनको पहाडी क्षेत्रका चेपाङ बालबालिका नियमित विद्यालय जान छाडेका छन्।
खाजा कार्यक्रमपछि आर्थिक अवस्था निकै कमजोर भएका चेपाङ समुदायका बालबालिकाको विद्यालयमा भर्नादर र उपस्थिति दर बढेको थियो। तर, भदौदेखि सरकारले दिँदै आएको खाजा कार्यक्रम हटेपछि चेपाङ समुदायका विद्यार्थी विद्यालयमा नियमित उपस्थित हुन छोडेका हुन्।
चेपाङ समुदायका बालबालिका मात्रै अध्ययन गर्दै आइरहेको राप्ती नगरपालिका–१३, कालीटारको आधारभूत विद्यालयका प्रधानाध्यापक दीपक श्रेष्ठ खाजा कार्यक्रम हटेपछि विद्यार्थीलाई नियमित बनाउन अप्ठेरो भइरहेको बताउँछन्। ‘पाँच महिनादेखि विद्यालयमा विद्यार्थी नियमित आउने दर कम भएको छ’, उनले भने, ‘विद्यालय आउने विद्यार्थी पनि खाना नखाई न्याउरो मुख लगाएर आउने गरेका छन्।’ चिसो बढी भएकाले र भौगोलिक विकटताका कारण पनि बालबालिका नियमित हुन नसकेको श्रेष्ठको भनाइ छ।
चिसोमा लगाउने स्विटरलगायतका न्यानो कपडासमेत नहुँदा कतिपय बालबालिका नियमित हुन सकेका छैनन्। पैदल एक घन्टासम्म हिँडेर बालबालिका आधारभूत विद्यालय आउने गरेका छन्। १ सय ७२ चेपाङ बालबालिका अध्ययन गर्ने आधारभूत विद्यालयमा अहिले ४० देखि ५० जना मात्रै नियमित विद्यालय आउने गरेका छन्। वडा नम्बर १३ को ग्यामिराङ, थानडाँडा, खोलाधारी, कुमैटारलगायतका क्षेत्रबाट अध्ययनका लागि विद्यार्थी आधारभूत विद्यालयमा आउने गरेका छन्।
राप्ती नगरपालिका–१३ कै राष्ट्रिय आधारभूत विद्यालयमा पनि विद्यार्थी नियमित नहुने समस्या उस्तै छ। विद्यालयका प्रधानाध्यापक प्रमोदकुमार शाहले ८५ विद्यार्थीमध्ये आधा विद्यार्थी मात्र नियमित विद्यालय आउने गरेको बताए। ८५ मा ८४ जना चेपाङ बालबालिका र एक जना दलित विद्यार्थी छन्। ‘डेढ/दुई घन्टा हिँडेर विद्यार्थी विद्यालय आउनुपर्ने बाध्यता छ,’ शाहले भने, ‘गरीबीका कारण सबै अभिभावकले विद्यालय पठाउँदैनन्।’
धेरै बालबालिका हुने घरमा आमाबुबा मेलापात जाने र विद्यालय आउने उमेरका बालबालिकालाई भाइबहिनी हेर्न लगाउने गरिन्छ।
‘कतिपय विद्यालय आउने बालबालिकासँग न्यानो कपडा, कापीकलम र झोला हुँदैन’, शाहले भने। खाजा कार्यक्रम हुँदासम्म विद्यार्थीलाई विद्यालयमा टिकाउन सहज भएको उनको भनाइ छ।
ठूलो सङ्ख्यामा विद्यालय बाहिर रहेका विद्यार्थीलाई विद्यालयको पहुँचमा ल्याउन र टिकाइराख्न दिवा खाजा प्रभावकारी बनेको राप्ती नगरपालिकाका शिक्षा अधिकृत हुमाकान्त अधिकारीले बताए। केन्द्रले बजेट कटौती गरेका कारण नगरपालिकाको स्रोत साधनले खाजा कार्यक्रमलाई निरन्तरता दिन नसकेको उनको भनाइ छ। ‘नगरपालिकाभित्रका चेपाङ बालबालिकाका लागि मात्रै खाजामा करीब ४५ लाख रुपैयाँ खर्च हुन्छ’, उनले भने, ‘नगरपालिकाले छुट्टाएको १० लाख रुपैयाँ बजेटले सीमित क्षेत्रलाई पनि पुग्दैन।’
नगरपालिकाको पहाडी क्षेत्रका १०, ११ १२ र १३ नम्बर वडामा २ हजार ८ सय विद्यार्थीमध्ये दुई हजार २ सय चेपाङ बालबालिका रहेको अधिकारीले बताए। अन्य ६ सय विद्यार्थी पनि अधिकांश जनजाति समुदायका छन्।
भौगोलिक विकटतासँगै घरमा समयमै खाना खान नपाउने भएकै कारण बालबालिका विद्यालयसम्म आउने वातावरण नबनेको अधिकारीको भनाइ छ। उनले बालबालिकालाई नियमित बनाउन न्यानो कपडा वितरण, छलफल, अन्तक्र्रियालगायतका कार्यक्रम निरन्तर गरिरहेको जानकारी दिए।
बालबालिका टिकाउन विद्यालयमै छात्राबास
राप्ती नगरपालिकाले पहाडी क्षेत्रका बालबालिका विद्यालयमा टिकाउन छात्राबासको व्यवस्था गर्ने भएको छ। केही विद्यालयमा छात्राबास निर्माण भइसकेका छन् भने केही निर्माण हुने चरणमा छन्।
राप्ती नगरपालिकाकी प्रमुख प्रभा बरालले भौगोलिक विकटताका कारण बालबालिका समयमै विद्यालय उपस्थित हुन नसकेपछि विद्यालयमै छात्राबासको व्यवस्था गर्न लागिएको बताइन्। वडा नम्बर ११ को थाकलटारमा छात्राबास निर्माण भई सञ्चालनमा आएको छ भने वडा नम्बर १२ को एउरालीटारमा छात्राबास निर्माण भइरहेको प्रमुख बरालले जानकारी दिइन्।
अन्य विद्यालयमा पनि छात्राबास निर्माणको लागि प्रक्रिया अघि बढाइएको उनले जानकारी दिइन्। (समाचार-कृष्ण आचार्य/रासस-तस्बिर-बिबिसी)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
