राजविराज– सप्तरी सदरमुकाम राजविराजस्थित केशो अनिरुद्ध माविका विद्यार्थीहरुले आईतबार राजविराज नगरपालिका कार्यालय घेराउ गरेका छन्। नगरपालिकाले फोहोर व्यवस्थापन नगर्दा पठन-पाठन प्रभावित भएको उनीहरुको गुनासो छ।
विद्यालयबाट नाराजुलुससहित नगरपालिका पुगेका विद्यार्थीहरुले सवारी अवरुद्ध गरेर प्रदर्शन गरेका थिए। फोहोर र दुर्गन्धका कारण विद्यालयमा बसेर पढ्न सक्ने अवस्था नभएको कक्षा १० का सुमन देवले बताए।
‘विद्यालय अगाडि नै फोहोर फाल्दा पढाइमा असर परेको विषयमा हामीले पटक–पटक गुनासो ग¥र्यौं। विद्यालय प्रशासन र नगरपालिकामा समेत कुरा गरेका छौं’ देवले भने–‘तर, समस्या समाधानमा कोही गम्भीर देखिएन,’ देवले भने।
जिल्ला प्रशासन कार्यालय, खानेपानी तथा सरसरसफाइ डिभिजन कार्यालय र शिक्षा विकास तथा समन्वय इकाइमा फोहोर व्यवस्थापनका लागि आफूहरुले लिखित निवेदन दर्ता गराउँदा पनि कुनै कारबाही नभएपछि बाध्य भएर प्रदर्शन गर्नु परेको बताएका थिए।
विद्यालय अगाडिको खाली जग्गामा मासु बजारबाट फ्यालिएका कुखुराका प्वाँख, आन्द्रा÷भुँडी र हाडखोड कुहिएर बस्नै नसक्ने अवस्था आएपछि आफुहरु बाध्य भएर नगरपालिका विरुद्ध आन्दोलनमा उत्रिनु परेको कक्षा १० की सपना मिश्राले बताइन्।
विद्यार्थीहरुले मेयर शम्भु यादवलाई भेटी विद्यालय आसपासमा भएको फोहोर तत्काल हटाउँन र फोहोर व्यवस्थापनको अर्को विकल्प खोज्न आग्रह गरे।
केशो अनिरुद्ध मावि आसपास मात्र होईन, फोहोर र दुर्गन्धका कारण राजविराज नगरपालिकासमेत अस्तव्यस्त छ।
नगरपालिकामा दैनिक २२ जना स्विपर ५ वटा ट्याक्टर र ३ वटा टिपर परिचालित छन् भने सरसफाईकै लागि दैनिक सरदर १६ हजार २ सय रुपैयाँ खर्च हुने गरेको छ। तर, सरसफाईको अवस्था भने सन्तोषजनक छैन। गत आर्थिक वर्षमा मात्रै राजविराज नगरपालिकाले कुल ५८ लाख ३३ हजार ३ सय ६९ रुपैयाँ खर्च गरेको थियो।
राजविराज नगरपालिकाका मेयर शम्भुप्रसाद यादवले फोहर मैला व्यवस्थापनका लागि नगरपालिकाले योजना बनाइरहेकाले चाँडै समस्याको समाधान निस्कने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
