दमौली– उपप्रधानमन्त्री एवम् रक्षामन्त्री ईश्वर पोखरेलले आगामी माघ १० गतेभित्र पार्टीको तल्लो तहसम्म एकता टुंगिने बताएका छन्।
तनहुँको शुक्लागण्डकी नगरपालिकामा शुक्रबार आयोजित कार्यकर्ता भेटघाटमा नेकपाका सचिवालय सदस्यसमेत रहेका मन्त्री पोखरेलले माघ १० गतेभित्रै पार्टीको सबै संगठनको एकता टुंग्उयाने गरी काम भइरहेको बताए।
रक्षामन्त्री पोखरेलले पुस मसान्तभित्रै पार्टी एकताको टुंगाे लगाउने भनिए पनि पुसमा त्यो सम्भव नदेखिएको बताए।
उनले पार्टी एकता टुंगाे नलाग्दा तल्लो तहसम्म पार्टीको गतिविधि चलायमान हुन नसकेको बताए।
उनले भने, 'राष्ट्रिय आवश्यकता र जनताको चाहनाअनुसार पार्टी एकता भएकाले नयाँ सोचका साथ अगाडि बढ्न आवश्यक छ।'
उनले विचार कमजोर भए पार्टी कमजोर हुने भएकाले सबै नयाँ सोचका साथ अगाडि बढ्नुपर्नेमा जोड दिए।
उनले भने, 'पूर्व एमालेले पनि एमाले भएर नसोचौँ, पूर्व माओवादीले पनि माओवादी भएर नसोचौँ। नयाँ सोचका साथ अगाडि बढ्न जरुरी छ।'
उनले तल्लो तहसम्म एकता नटुंगिएकाले सरकारका राम्रा कामको प्रचार हुन नपाएको बताए।
फागुनभित्रै सबै कानून बनिसक्छ
रक्षामन्त्री पोखरेलले फागुनभित्रै आवश्यक कानुन निर्माण गरिसक्ने दाबी गरेका छन्। संसद्को जारी बैठकले आवश्यक कानुन फागुनभित्रै निर्माण गर्ने उनले बताए।
संविधानमा व्यवस्था भएका सुन्दर पक्षलाई लागू गर्न कानुनको अभाव भएको भन्दै उनले कानुन बनेपछि कानुन अनुसारको संरचना निर्माणलाई जोड दिइने बताए।
केपी ओली प्रधानमन्त्रीमा निर्वाचित भएपछि संसद्ले २६ वटा कानुन निर्माण गरेको जानकारी दिँदै उनले भने, 'जारी संसद्मा सबै कानुन निर्माण भइसक्नेछ।'
राजनीतिक संक्रमण सकिए पनि प्रशासनिक संक्रमण कायमै रहेको बताउँदै उनले सोही कारण देशमा अन्योलको स्थिति देखा परेको बताए।
सरकारले हालै मात्र पारित गरेको कर्मचारी अध्यादेशको विरुद्ध कर्मचारीको विरोध अनावश्यक रहेको भन्दै मन्त्री पोखरेलले अध्यादेशमा भएका असहमतिलाई सच्याउन सकिने धारणा व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
