पोखरा– पोखराका सडक अचेल व्यस्त हुन थालेका छन्। पोखराभित्र भित्रिने सवारीसाधनको चाप बढेसँगै सडकमा जाम हुने समस्या पनि बढिरहेको छ।
पृथ्वीचोक, महेन्द्रपुल, सिर्जनाचोक, सभागृह चोकमा चारैतिरबाट गाडी तथा यात्रुको आवतजावत हुने हुँदा कार्यालय समयमा अत्यधिक जाम हुने गर्छ।
पोखरा महानगरपालिकाले महानगरभित्रका सडक जाममा कमी ल्याउन आकासे पुल बनाउने भएको छ।
यही आर्थिक वर्षभित्र सिर्जनाचोक र पृथ्वीचोकमा आकासे पुल बनाउने गरी प्रक्रिया अघि बढाइसकेको महानगरका योजना प्रमुख सोभियत खड्काले जानकारी दिए।
‘यही आर्थिक वर्षमा सुरु गरेर १ वर्षभित्रै २ ठाउँमा आकासेपुल बनाइसक्ने गरी योजना तयार पारिसकेका छौं,’ उनले भने, ‘यसका लागि डिजाइन पनि तयार भइसकेको छ।’
मोडलका रुपमा थ्रिडी र लेआउट म्याप गरी २ प्रकारका पुल डिजाइन छानिसकेको खडकाले बताए। ‘त्यसका लागि इन्जिनियरिङ डिजाइन, इस्ट्रक्चर डिजाइन छानेर यसै आर्थिक वर्षमा निर्माण सुरु गर्ने र अर्को आर्थिक वर्षमा पूरा गर्ने गरी योजना बनाएका छौं,’ उनले भने।
महानगरले पोखराका अन्य मूख्य चोकमा पुल बनाउने लक्ष्य राखे पनि यस आर्थिक वर्षमा २ वटा पुलबाट काम सुरु गर्ने जनाएको छ। ‘मेजर इन्टरसेक्सन भनेको पृथ्वीचोक र सिर्जनाचोक हुन्।
त्यसैले तत्काल हामीले यी ठाउँबाट काम सुरु गर्ने योजना बनाएका छौं,’ उनले भने। पुलको टेन्डर १ महिनाभित्र सार्वजनिक गर्ने उनले सुनाए।
एउटा पुल बनाउन २ देखि साढे २ करोडसम्म लाग्न सक्ने अनुमान गरिएको छ। तर महानगरले यस आर्थिक वर्षमा जम्मा १ करोड पुलमा बजेट छुट्टयाएको छ।
‘पुल बनाउन पर्यटनमन्त्री रवीन्द्र अधिकारीले निर्वाचन क्षेत्र पूर्वाधार विकास कार्यक्रम अन्तर्गत ५० लाख रुपैयाँ विनियोजन गर्नुभएको छ। त्यो बजेट पनि यसैमा खर्च गरिन्छ,’ उनले भने।
२ वटै पुलको डिजाइन लगभग एकै किसिमले बनेका छन्। तर, चढ्ने भर्याङमा केही परिवर्तन देख्न सकिन्छ। योजना प्रमुख खड्काका अनुसार जग्गाको उपलब्धताका आधारमा भर्याङमा परिवर्तन गर्नुपरेको हो।
‘हामीले २ वटै पुलको बीचको डिजाइन एउटै बनाएका छौँ। त्यसले गर्दा पुल बनाउन पनि सजिलो हुन्छ। दुवै पुल एउटै किसिमको भयो भने सुन्दर पनि देखिन्छ,’ सोभियतले भने, ‘भर्याङमा मात्रै केही फरक छ।’
पुलको बीचको भाग स्टिल स्ट्रक्चरमा बन्ने छ। बनाउन सजिलो र बनाउँदा ट्राफिकलाई पनि धेरै असर नगर्ने भएकाले स्टिलको डिजाइन तयार पारिएको सोभियतले प्रष्ट्याए।
उनले भने, ‘यसले लगत पनि कम लाग्छ। अन्य डिजाइन गर्दा २०÷२१ दिन व्यस्त बाटोमा टेको राखेर काम गर्न पनि गाह्रो हुने देखियो। स्टिल स्ट्रक्चर भयो भने अफ आवरमा पनि काम गर्न सजिलो हुन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
