काठमाडौं- बिनाविभागीय हैसियतमा रहेका माओवादीका मन्त्रीहरुले सोमबार सरकार छाड्ने भएका छन्। निर्वाचन हुने सुनिश्चतता नभएसम्म सरकार नछाड्ने बताएका उनीहरुले सोमबार सरकारबाट बाहिरिने तयारी गरेका हुन्।
माओवादीका तर्फबाट नेतृत्व गर्दै सरकारमा गएका कृष्णबहादुर महराले सरकार छाड्ने विषयमा छलफल भइरहेको बताए। 'हामी आज परामर्शमै छौँ, भोलिसम्म केही निर्णय हुन्छ,' उनले नेपाल लाइभसँग भने।
वाम गठबन्धनले उम्मेदवारको टुंगो लगाइसकेपछि माओवादीका मन्त्रीहरुले सरकार छाड्न लागेका हुन्। उम्मेदवार विवाद भए वाम गठबन्धनको सहकार्य तोडिन सक्ने र कांग्रेससँग फेरि सहकार्य अघि बढाउनुपर्ने संसयमा माओवादी केन्द्र थियो। आपसी सहमतिमा वाम गठबन्धनले ३२ जिल्लामा उम्मेदवार तय गरेका छन्।
यस्तै, पार्टीका प्रभावशाली नेता सरकारमा सहभागी हुँदा चुनाव प्रचारप्रसारमा समेत अप्ठ्यारो पर्ने भएपछि माओवादी सरकारबाट बाहिरिने भएको हो। पार्टीका प्रभावशाली नेता कृष्णबहादुर महरा र जनार्दन शर्मा बिनाविभागीय हैसियतमा सरकारमै छन्। 'पार्टीका प्रभावशाली नेता सरकारमै रहँदा चुनाव प्रचारप्रसारमा समेत कठिनाइ हुने भएकाले सरकार छाड्नुपर्ने निष्कर्षमा हामी पुगेका छौं,' माओवादीका मन्त्री शिवकुमार मण्डलले भने।
माओवादी मन्त्रीहरुको बहिर्गमन चिकित्सा शिक्षा विधेयकसँग पनि जोडिएको छ। सरकारले चिकित्सा शिक्षा विधेयक अध्यादेश मार्फत ल्याउने तयारी गरेको छ। प्रधानमन्त्री शेरबहादुर देउवाले सोमबार बस्ने मन्त्रिपरिषद्को बैठकबाट अध्यादेशमार्फत विधेयकलाई राष्ट्रपति कार्यालय पठाउने तयारी गरेका छन्। एमालेले चिकित्सा शिक्षा विधेयकको विरोध गर्दै आएको छ। गठबन्धन निर्माणपछि एमालेको स्वार्थ गाँसिएको कुरामा समर्थन गर्नुपर्ने बाध्यता माओवादीलाई छ। सरकारमा बसिरहे अध्यादेशबाट चिकित्सा शिक्षा विधेयक ल्याइएको स्वामित्व माओवादी केन्द्रले पनि लिनुपर्ने भएपछि माओवादीका मन्त्री सरकारबाट बाहिरिन लागेका हुन्।
माओवादी केन्द्रले सर्वोच्च अदालतको फैसलाको सहारा लिएर निर्वाचन सार्न प्रधानमन्त्री देउवा लागि परेको सूचना आएको भन्दै निर्वाचन हुने ग्यारेन्टी नभएसम्म सरकार नछाड्ने बताएको थियो। प्रदेशसभा र प्रतिनिधिसभा निर्वाचनमा प्रत्यक्ष र समानुपातिक प्रणालीमा अलग-अलग मतपत्रको व्यवस्था गर्न आदेशको माग गर्दै राष्ट्रिय जनता पार्टीका नेता सर्वेन्द्रनाथ शुक्लाले सर्वोच्चमा रिट दायर गरेका थिए। सर्वोच्चले त्यस रिटमा अन्तरिम आदेश जारी गर्न अस्वीकार गरेको थियो।
हाल निर्वाचनको वातावरण बन्दै गएकाले सरकारमा बसिरहनुपर्ने आवश्यकता नभएको बिनाविभागीय बनाइएका पूर्व स्वास्थ्यमन्त्री गिरिराजमणी पोखरेलले बताए। 'निर्वाचन अब रोकिने अवस्था छैन, जनता निर्वाचनका लागि उत्साही छन्। उम्मेदवारी दर्ताको काम भइसकेको छ। यो अवस्थामा सरकारमा बसिरहनुपर्ने आवश्यकता छैन भन्ने निष्कर्ष हो,' उनले भने।
माओवादी अध्यक्ष प्रचण्ड पनि सरकारमा पार्टीलाई सहभागी गराइरहने मनस्थितिमा नरहेको बिनाविभागीय बनाइएका पूर्व सामान्य प्रशासन मन्त्री टेकबहादुर बस्नेतले बताए। 'प्रधानमन्त्री शेरबहादुर देउवासँग भोली अध्यक्ष प्रचण्डले निर्वाचनका विषयमा थप परामर्श गर्दै हुनुहुन्छ, निर्वाचन रोक्न सक्ने स्थिति नरहेको अध्यक्षको समेत बुझाइ छ,' बस्नेतले भने।
माओवादी केन्द्रका अध्यक्ष प्रचण्डले प्रधानमन्त्री देउवासँग परामर्श गरी सरकारबाट बाहिरिने निर्णय सुनाउने तयारी गरेको माओवादीका नेताहरुको भनाइ छ। सरकारमा माओवादीका ९ मन्त्री र ८ राज्यमन्त्री छन्। प्रधानमन्त्री देउवाले राप्रपा र राप्रपा प्रजातान्त्रिकलाई सरकारमा सहभागी गराएसँगै माओवादी मन्त्रीहरुको जिम्मेवारी खोसेका थिए। बिनाविभागीय रुपमा माओवादीका तर्फबाट सरकारमा कृष्णबहादुर महरा, जनार्दन शर्मा, गिरिराजमणी पोखरेल, प्रभु शाह, महेन्द्रबहादुर शाही, शिवकुमार मण्डल, टेकबहादुर बस्नेत, आशा कोइराला र शन्तकुमार थारु छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
