काठमाडौं– अखिल नेपाल फुटबल सङ्घ (एन्फा)को गत बैशाखमा भएको निर्वाचनमा लाखौँ रकम अनियमितता भएको भन्दै भन्दै ४ वटा जिल्ला संघका अध्यक्षले अडियो टेप सार्वजनिक गरेका छन्।
काठमाडौं जिल्ला फुटबल संघका अध्यक्ष विराट जंश शाही, भक्तपुर जिल्ला फुटबल संघका अध्यक्ष गौतम सुजखु, धादिङ जिल्ला फुटबल संघका अध्यक्ष दिपक खतिवाडा र ललितपुर जिल्ला फुटबल संघका अध्यक्ष पुरुषोत्तम थापाले एन्फा निर्वाचनका दौरान आर्थिक चलखेल भएको दाबी गरेका हुन्। उनीहरुले बुधबार काठमाडौंमा पत्रकार सम्मेलन गर्दै अडियो टेपसमेत सार्वजनिक गरे। तर अडियोमा स्पष्ट रुपमा कुन प्रायोजनका लागि कुरा भएको भन्ने खुलेको छैन।
एन्फा निर्वाचनका दौरान भएका अनियमिताको प्रमाणसहित अन्तर्राष्ट्रिय फुटबल महासंघ (फिफा) र एसियाली फुटबल महासंघ (एएफसी) मा पत्राचार गरेको पनि उनीहरुले बताएका छन्।
गत असोजनमा एन्फाका पूर्वउपाध्यक्ष मणि कुवँरले वर्तमान नेतृत्वले मतदातालाई प्रत्यक्षरुपमा पैसा बाँड्ने काम गरेको, चुनावलगत्तै मतदातालई युरोप भ्रमणमा लगेको, न्यायालयलाई समेत प्रभावित पार्ने काम गरेको आरोप लगाएका थिए। उनले निर्वाचन पाँच महिना पछि आरोप लगाउँदै उचित समय आएपछि प्रमाण सर्वाजनिक गर्ने बताएका थिए। बुधबार अडियो सार्वजनिक गर्दा भने कुवँर उपस्थित थिएनन्।
एन्फा निर्वाचन गत वैशाख २२ गते सम्पन्न भएको थियो। कुवँरले एन्फा अध्यक्ष कर्माछिरिङ शेर्पा र उपाध्यक्ष पङ्कज नेम्बाङलगायतले निर्वाचन समितिलाई ज्यान मार्ने धम्की दिएको आरोप लगाइएको थियो।
असोजमा पनि दक्षिण एसियाली फुटबल महासङ्घ (साफ) का उपाध्यक्ष समेत रहेका कुँवरले आफुले यी सबै आरोपका बारेमा प्रमाणसहित फुटबलको सर्वोच्च निकाय (फिफा) र एशियाली फुटबल महासङ्घ (एएफसी)मा पठाइसकेको र त्यसको जवाफ कुरेको बताएका थिए।
निर्वाचनमा कर्माछिरिङ शेर्पा प्यानल नै भारी मतले विजयी भएको थियो। निर्वाचन विधानविपरीत भएको भन्दै कुँवरले निर्वाचनको एक दिनअघि पत्रकार सम्मेलनको आयोजना गरेर निर्वाचनमा सहभागी नहुने घोषणा गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
