एजेन्सी– बल टेम्परिङ काण्डमा दोषि पाइएका अस्ट्रेलियाका ओपनिङ ब्याट्सम्यान क्यामरन बेनक्रफ्टले आफूलाई तत्कालिन उपकप्तान डेभिड वार्नरले उक्साएको खुलासा गरेका छन्। गत वर्ष दक्षिण अफ्रिका विरुद्ध केप टाउनमा भएको टेस्टका दौरान भएको चर्चित बल टेम्परिङका काण्डको योजना तत्कालिन उपकप्तान वार्नरले बनाएको बेनकफ्टले बताएका हुन्।
'वार्नरले मलाई बल कोट्याउन भनेका थिए। हामी खेलमा थियौं। मैले गरिरहेको थिएँ राम्रोसँग थाहा थिएनन्,' बेनक्रफ्टले भनेका छन्, 'म अनजान थिए। मलाई बल फिट पार्नु थियो।'
बेनक्रफ्टले भावुक अन्तर्वार्ता दिँदै आफ्नो गल्तिले टिमलाई लज्जित बनाएकोमा पछुतो मानेका छन्। उनले भनेका छन्,'टेम्परिङ मैले आफ्नै मान्यतामा गरे। तर त्यो ठूलो गल्ति थियो। म जब खाँटमा जान्थे। सबैलाई गिराएको महसुस गर्थे। टिमलाई लज्जित गराएको सम्झिन्थे।' उनले आफ्नो गल्ति अरुलाई नथुपार्ने समेत बताए। उनले टेम्परिङ गर्ने निर्णय लिँदा नै आफूले गल्ति गरेको बताए।
उनलाई ९ महिनाको प्रतिबन्ध लगाइएको थियो। सो प्रतिबन्ध अहिले सकिएको छ। उनी डिसेम्बर ३० मा बिग बासको लिगको खेलमार्फत क्रिकेटमा फर्कदै छन्।
गत वर्ष दक्षिण अफ्रिकाविरुद्धको तेस्रो टेस्टका दौरान ओपनिङ ब्याट्सम्यान बेनक्रफ्टले बल टेम्परिङ गरेका थिए। बलिङमा ‘स्विङ’ ल्याएर ब्याट्सम्यानलाई आउट गर्ने उद्देश्यका साथ पूर्वनियोजित रुपमा टेम्परिङ भएको खुलेपछि कारबाही गरिएको थियो।
तत्कालिन कप्तान स्टिभ स्मिथलाई र उपकप्तान वार्नरलाई १–१ वर्ष तथा बेनक्रफ्टलाई ९ महिनाको प्रतिबन्ध लगाइएको थियो। साथै स्मिथलाई २ वर्ष र वार्नरलाई आजिवन कप्तान बन्न पनि रोक लगाइएको थियो। अस्ट्रेलियन क्रिकेटले अनुसन्धानपछि प्रतिबन्ध लगाउने निर्णय गरेको थियो।
बेनक्रफ्टले ‘बल टेम्परिङ’ गरेको टिभी फुटेजमा देखिएको थियो। सो कार्य कप्तान स्मिथ तथा उपकप्तान वार्नरसमेतको छलफलमा सुनियोजित रुपमै अघि बढाइएको भन्दै उनीहरुलाई अष्ट्रेलियाको राष्ट्रिय टोलीबाट खेल्न नपाउनेगरी प्रतिबन्ध लगाइएको थियो।
टोलीका प्रमुख खेलाडीमाथि प्रतिबन्ध लागेसँगै अष्ट्रेलियाको क्रिकेट स्तर खस्किएको छ। त्यसपछि, उसले इंग्ल्यान्डविरुद्धको एकदिवसीय शृंखला ५–०, पाकिस्तानसँगको दुई खेलको टेस्ट शृंखला १–० र टि–२० शृंखला भने ३–० ले गुमाएको थियो। त्यस्तै, दक्षिण अफ्रिकाविरुद्धको एकदिवसीय शृंखला २–१ तथा भारतविरुद्ध भएका सबै शृंखलाहरुमा पराजित भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
