जनकपु– धनुषामा एक परिवारले १२ वर्षदेखि न्यायको लागि भौतारिरहँदा पनि न्याय पाउन सकेका छैनन्।
जनकपुर चुरोट कारखानामा कार्यरत रामविलास यादवको हत्या भएको १२ वर्षभन्दा बढी भइसके पनि हत्याका दोषी कानुनी दायरमा आउन सकेका छैनन्।
हत्यारालाई कारबाहीको दायरामा ल्याउन श्रीमती जिवछी देवी यादव र छोरा विजय यादवले १२ वर्षदेखि प्रहरी प्रशासन र अदालत धाइरहेका छन्। तर, न्याय पाउन सकेका छैनन्।
तत्कालीन गाविस मानसिंहपट्टी निवासी रामविलास जनकपुर चुरोट कारखानाको प्राविधिक शाखामा काम गर्दथे। उनको ड्युटी कहिले बिहान त कहिले साँझ पर्दथ्यो।
बिहान काम गर्ने पालो परेको बेला अपरान्ह्र ३ बजेसम्म काम गरेर उनी आफ्नो गाउँ फर्कन्थे। साँझको सिफ्टमा भने रातको ११ काम सकेपछि कारखानाकै क्यान्टिनमा वास बस्दथे।
२०६३ जेठ ८ गते रामविलासलाई साँझको ड्युटी परेको थियो। बिहान सधैँ झैँ काम सकाएर उनी कारखानको क्यान्टिनमा सुतेका थिए। तर, उनीसँगै काम गर्ने तीनजना साथीले राति नै घर हिँड्न जिद्दी गरे।
उनीसहित चारजना भएपछि बाटोमा केही नहुने भनेपछि उनी साथीहरूसँगै लागे। उनका चार साथी शिवजी साह, रामजी पञ्जियार र फेकन साहसँग साइकल चढेर उनी घरतर्फ लागे।
तर, घर नपुग्दै रामविलासको बाटो मै हत्या भयो। उनको कन्चटमा छुरा प्रहार भएको थियो भने पेटमा गोलीको छर्रा लागेको थियो।
रातीको ड्युटी सकाएर घर नफर्केपछि परिवारका सदस्यले उनको खोजी गरे।
जनकपुर स्थित पुल्चोकभन्दा पूर्व वरको रुखमुनी उनी फेला त परे, तर ज्यूँदा थिएनन्।
हत्या भएको ६ दिनपछि २०६३ जेठ १४ गते रामविलासका भाइ रामचन्द्र यादवले जिल्ला प्रहरी कार्यालय धनुषामा शिवजी, रामजी र फेकन विरुद्ध किटानी जाहेरी दर्ता गराए। किटानी जाहेरी दर्ता भए लगत्तै आरोपी तीनैजना फरार भए।
अहिले श्रीमती जिवछी र छोरा विजय रामविलासलका हत्यारालाई सजाय दिलाउन नसक्दा भौतारिरहेका छन्।
कारखानाबाट सँगै आएका तीन साथीले नै मिलेर बाबुको हत्या गरेको छोरा विजय बताउँछन्। त्यतिखेर आफूले विदेशबाट पठाएको ५० हजार रुपैयाँका लागि उनीहरुले आफ्नो बाबुको हत्या गरेको हुनसक्ने उनको आरोप छ।
बाबुसँगै रहेको रुपैयाँ उनको हत्यापछि त्यहाँ फेला नपरेको विजयको भनाइ छ।
‘मेरो बाबुको हत्या भएको १२ वर्ष बितिसक्यो,’ पत्रकार सम्मेलन मार्फत विजयले भने, ‘प्रहरी र अदालतमा गुहार लगाइसकेका छौं, अब कता जाने।’
आफूहरु अन्यायमा परेकाले दोषी जसरी पनि कारबाहीको दायरामा आउनुपर्ने उनले बताए।
आरोपीहरुलाई पक्राउ गरेर कारबाही गर्न पटक–पटक आग्रह गरे पनि विगतका प्रहरी अधिकृतहरुले अनुसन्धान भइरहेको भन्दै टार्ने मात्र गरेको विजय सुनाउँछन्।
प्रहरीले गत मंसिर ४ गते शिवजीलाई प्रहरीले घरबाटै पक्राउ गरे। तर, अदालतले ३ पौषमा शिवजीलाई ५० हजार धरौटीमा रिहा गर्न आदेश सुनायो।
जिल्ला अदालत धनुषाका न्यायधीश ऋषिराम निरौलाको इजलासले शिवजीलाई धरौटीमा रिहा गर्न दिएको आदेशबाट रामविलासकी श्रीमती जिवछी र छोरा विजयको चित्त बुझेको छैन्। र, उनीहरु पुनरावेदन गर्ने तयारीमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
