काठमाडौं– नेपाली कांग्रेसको महासमिति बैठक सकिएको छ।
मुख्यतः परिमार्जित विधान पारित गर्न महासमिति बैठक बोलाइएको थियो। र, विधानमा केन्द्रीय सदस्यबीच सहमति हुन नसक्दा बैठक लम्बिएको थियो। अन्तिम दिन आइतबार विधान लगायत पाँचवटा प्रतिवेदन सर्वसम्मतिले पारित गर्दै बैठक सकिएको हो।
आज बैठकको समापन समारोहमा बोल्दै पार्टी सभापतिले महासमिति सदस्यले अप्ठ्यारो पार्लान् भन्ने सोचे पनि त्यस्तो नभएको बताए।
'पार्टीमा मौका यही हो, सिध्याइदिऔं भन्ने हुन्छ', देउवाले थपे, 'त्यस्तो गर्न हुन्न।'
उनले पार्टीको विधान राम्रो बनेको बताए।
उनले देशमा संविधान र शान्ति कांग्रेसले ल्याएको दाबी गरे। 'यो कांग्रेसको सफलता हो', उनले भने।
'महत्त्वपूर्ण कुरा देशले जितेको छ। संविधान च्यातेका शक्तिलाई चुनावलाई ल्याइयो', उनले भने, 'कम्युनिस्ट सरकारका विरुद्द आन्दोलन गर्नुपर्ने अवस्था आउँदैछ। यो सरकार निरंकुश हुँदैछ, सबै एकजुट हौं।'
अर्का नेता रामचन्द्र पौडेलले कांग्रेसको विधान विश्वकै उत्कृष्ट बनेको दाबी गरे।
उनले कांग्रेस अब गाउँगाउँमा बहसमा जानुपर्ने बताए। 'वाम र कांग्रेसको सिद्धान्त के हो, बुझाउनु पर्छ', उनले भने।
उनले विधान लोकतान्त्रिक बनेकाले अब पार्टीमा मनोमालिन्य गर्ने अवस्था नहुने बताए।
'गाउँगाउँ जान नेता कार्यकर्तालाई विधानले बाटो खोली दिएको छ', पौडेलले भने, 'नयाँ विधान अनुसार कोही नेताको पछि लागेर पार्टीमा पद मिल्ने छैन।'
पौडेलले सरकारको आलोचना पनि गरे। 'कम्युनिस्ट सरकार अन्यौलमा परेको छ। कम्युनिस्टले शाब्दिक प्रपञ्च मात्रै गरेर जनतालाई भुलाइरहेका छन्। नयाँ वर्ग जन्माउने तरिकाले शासन चलाएका छन्', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
