काठमाडौं– परराष्ट्र मन्त्री प्रदीप ज्ञवालीले आफ्नो अमेरिका भ्रमण सफल भएको बताएका छन्।
'यस भ्रमणले झण्डै दुई दशकसम्म दुई देशबीच औपचारिक रुपमा हुन नसकेको उच्चस्तरीय भ्रमणको क्रमलाई तोडेको छ', भ्रमणबारे जानकार दिन आयोजित पत्रकार सम्मेलनमा मन्त्री ज्ञवालीले भने, 'मुलुकको पछिल्लो राजनीतिक परिवर्तन तथा विकासक्रमप्रति संयुक्त राज्य अमेरिकाजस्तो हाम्रो पुरानो तथा महत्वपूर्ण साझेदार राष्ट्रको हामीप्रतिको चासो र महत्त्वमा बढोत्तरी ल्याएको मैले ठानेको छु।'
भेटवार्ताका क्रममा आपसी सम्बन्धका सबै पक्षहरुलाई उठाएको बताए। 'नेपालले राजनीतिक स्थायित्व हासिल गरेपछि विकासका प्रचुर सम्भावनाहरु छन्। ती सम्भावनाहरुलाई अन्तर्राष्ट्रिय सहयोग जुटाउने कुरा नै हाम्रो भ्रमणको प्राथमिक एजेन्डा रह्यो', मन्त्री ज्ञवालीले भने, 'नेपालमा लगानीको अनुकूल वातावरण छ। नेपालले स्वतन्त्र ढंगले आफ्ना विदेश नीतिहरु परिचालन गरेको छ। त्यसो हुनाले नेपालमा लगानी गर्नुस् भनेर अनुरोध गर्यौं।'
नेपालको शान्ति प्रकृया, पछिल्लो राजनीतिक विकासक्रम र वर्तमान सरकारका विकास प्राथमिकताहरु सम्बन्धमा नेपालको धारणा राखेको बताए।
'नेपालमा अमेरिकी लगानीका लागि सहजीकरण गरिदिन अनुरोध गर्दै नेपालमा मार्चको अन्तिम सातामा आयोजना हुन लागेको लगानी सम्मेलनबारे जानकारी दिएको छु', ज्ञवालीले भने, 'त्यसैगरी व्यापारको क्षेत्रमा अमेरिकाले नेपाललाई प्रदान गरेको सहुलियतका लागि हार्दिक धन्यवाद दिंदै नेपाललाई प्रदान गरेको भन्साररहित तथा सीमारहित सहुलियत प्राप्त वस्तुमा नेपालको तुलनात्मक लाभ रहेका केही थप वस्तुहरु (पुरुष र महिलाका पोशाकहरु) समावेश गरिदिन अनुरोध गरेको छु।'
अमेरिकाका विदेशमन्त्री माइकल रिचार्ड पोम्पेओले नेपालको राजनीतिक प्रगति र स्थायित्वको प्रशंसा गरेको र नेपालको विकासमा सहयोग गर्न आफू तत्पर रहेको बताएका ज्ञवालीले जानकारी दिए।
उनले भ्रमणको उद्देश्य कुनै सम्झौता वा थप परियोजनामा हस्ताक्षर गर्नु नभएको स्पष्ट पारेका छन्।
कोरिया प्रायद्विपको विषयमा छलफल हुनु स्वभाविक भएको उनले बताए। 'दुई पक्षीय, क्षेत्रीय र विश्व मामिलाका विषयमा कुराहरु हुनु स्वभाविक हो', मन्त्री ज्ञवालीले थपे, 'उदाहरणको निम्ति, सार्कको बारेमा जिज्ञासा राख्नुभयो। विम्स्टेकलाई कसरी अगाडि बढाउने सोचिरहनुभएको छ? आदिजस्ता विषयमा सोध्नुभयो।'
मन्त्री ज्ञवालीले कोरियाली प्रायद्विपमा शान्ति कायम गर्नका लागि अमेरिकाले सुरु गरेको प्रक्रिया टुंगियोस् भन्ने शुभकामना दिएको बताए।
परराष्ट्र मन्त्री ज्ञवाली गत पुस १ गते राति अमेरिका प्रस्थान गरी ७ गते स्वदेश फर्किएका थिए। यसक्रममा उनले पुस ३ गते वाशिंटन डिसीमा अमेरिकी विदेशमन्त्री पोम्पेओसँग द्विपक्षीय औपचारिक भेटवार्ता गरेका थिए।
भेटवार्ताका क्रममा पोम्पेओलाई नेपाल भ्रमणको निम्तो दिएको ज्ञवालीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
