काठमाडौं- बुधबार प्रतिनिधिसभाको उद्योग तथा वाणिज्य र श्रम तथा उपभोक्ता हित समितिको बैठकमा बोल्ने अधिकांश सांसदले देशभित्र उत्पादन भएको ३ अर्ब रुपैयाँको चिनी स्टोर गरेर भारतबाट किन आयात गरेको भनी प्रश्न गरेका छन्।
समिति बैठकमा बोल्दै सांसद प्रकाश रसाइलीले भने, 'सरकारले आन्तरिक चिनीको उपेक्षा गरेको छ। नेपालमा ३ अर्बको चिनी स्टोर छ।' यो चिनी बिक्री नगिरी किन भारतीय बजारबाट चिनी किन ल्याइँदै छ? भनी अर्थमन्त्री युवराज खतिवडा र उद्योग, वाणिज्य तथा आपूर्तिमन्त्री मात्रिकाप्रसाद यादवलाई प्रश्न गरेका थिए।
सरकार नै किसान र जनतालाई अल्मल्याउने खेलमा लागेको अर्को संसद कृष्ण श्रेष्ठको आरोप छ। उद्योग मन्त्रालयले ७ महिनादेखि चिनीको मूल्य निर्धारण गर्न नसक्दा चिनी उद्योग र उखु किसान द्विधामा परेको उनको भनाइ छ। सरकारलाई तत्काल चिनीका मूल्य तोक्न उनले माग पनि गरेका छन्।
अर्थमन्त्री खतिवडाले उद्योगीलाई सरकारले गर्नुपर्ने सबै सहयोग गरेको भन्दै उपभोक्ता हितका विषयमा गम्भीर हुन उद्योग व्यवसायीलाई आग्रह गरेका छन्। उनले भने, 'सरकारले उद्योग व्यवसायीको सुरक्षामा मात्र ध्यान दिने हो भने उपभोक्ता मारमा पर्छन्। सरकारले सहुलियत दिएको छ। आवश्यक सहयोग पनि गर्छ। खुला अर्थतन्त्रमा धेरै समय राज्यले लगानी र संरक्षण गर्न सक्दैनौं।’
१५ प्रतिशतबाट भन्सार महसुल बढाएर ३० प्रतिशत बनाएकाले उद्योगीले यो कुरा मनन गर्नुपर्ने उनको भनाइ थियो। सरकारसँग सहुलियत मात्र खोजेर हुँदैन। गुणस्तरमा पनि ध्यान दिनुपर्ने मन्त्री खतिवडाले बताए।
सरकारले देशभित्र उत्पादन भएको चिनी र अन्य खाद्यान्यको गुणस्तरमा ध्यान दिएको उद्योगमन्त्री यादवले बताए। सरकारले बजारको माग र उत्पादनमा गुणस्तर हेरर तत्काल चिनीको मूल्य तोक्ने तयारी गरिरहेको उनको भनाइ छ।
यस्तै श्रम रोजगार तथा सामाजिक सुरक्षामन्त्री गोकर्ण विष्टले आन्तरिक श्रम बजारमा कार्यरत श्रमिकलाई सामाजिक सुरक्षाको दायराभित्र ल्याउन नमान्ने रोजगारदाता कम्पनीमाथि सरकारले निगरानी गर्ने बताए।
बैठकमा बोल्दै चिया उत्पादक संघका अध्यक्ष सुरेश अग्रवालले सामाजिक सुरक्षा कार्यक्रम कार्यान्वयन गर्न नसकिने बताएपछि मन्त्री विष्टले कानुनमा उल्लेख गरेअनुसार श्रमिकलाई सुविधा नदिने रोजगारदाता कम्पनीलाई कारबाहीको दायरामा ल्याइने बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
