काठमाडौं– नेपाल स्टक एक्सचेन्ज (नेप्से)मा सूचीकृत विभिन्न कम्पनीहरुले गत आर्थिक वर्ष २०७४/०७५ को नाफाबाट लगानीकर्तालाई लाभांश दिने घोषणा गरेका छन्। १७ वाणिज्य बैंकले लगानीकर्तालाई गत वर्षको नाफाबाट लाभांश दिने घोषणा गरेका हुन्।
केही बैंकले आफूले घोषणा गरेको लाभांश पारित गर्न साधारणसभाको मिति पनि तय गरेका छन्। तर, यसपटक अधिकांश बैंकहरुले नगद लाभांशलाई प्राथमिकतामा राखेर मात्रै लाभांश घोषणा गरेका छन्।
नेप्सेमा सूचीकृत ३ वाणिज्य बैंकबाहेक अन्य सबै बैंकले नेपाल राष्ट्र बैंकले तोकेको चुक्ता पूँजी पुर्याइसकेका छन्। चुक्ता पूँजी बढाउनु पर्दा यसअघि हकप्रद र अधिकतम बोनस सेयर जारी गरेका बैंकहरुले यो पटक नगदलाई प्राथमिकता दिएका हुन्।
दोस्रो बजारमा कारोबार गर्ने लगानीकर्ता नगद लाभांशभन्दा बोनस सेयरमा आकर्षित हुने गरेका छन्। वाणिज्य बैंकहरुले भने नगदलाई जोड दिएपछि केही हदसम्म सेयर बजार प्रभावित भएको लगानीकर्ताको टिप्पणी छ।
नेपाल पूँजी बजार लगानीकर्ता संघकी अध्यक्ष राधा पोखरेलले अधिकांश बैंकले बोनस सेयर भन्दा नगद लाभांशलाई जोड दिएकाले यसको प्रत्यक्ष असर सेयर बजारमा देखिएको दाबी गरिन्। ‘अघिल्लो वर्षको नाफाबाट अधिकांश वाणिज्य बैंकले नगद लाभांश घोषणा गरेकाले पनि त्यसको प्रत्यक्ष असर सेयर बजारमा परेको हो’, उनले भनिन्।
लाभांश घोषणा गर्ने १७ बैंकमध्ये १६ बैंकले नगद लाभांशलाई समेटेका छन्। ग्लोबल आइएमई बैंकले भने बोनस सेयर मात्रै दिने निर्णय गरेको छ।
बैंक सञ्चालक समितिको बैठकले घोषणा गरेको लाभांशलाई राष्ट्र बैंक र बैंकको आगामी साधारणसभाबाट पारित भएपछि मात्रै लगानीकर्ताले पाउने छन्।
सबैभन्दा बढी लाभांश एनआइबिएलको
हालसम्म लाभांश घोषणा गर्ने बैंकहरु मध्ये नेपाल इन्भेस्टमेन्ट बैंक (एनआइबिएल) ले बोनस र नगद दुवैतर्फ सबैभन्दा धेरै लाभांश दिने घोषणा गरेको छ। नबिलले गत आर्थिक वर्षमा सबैभन्दा धेरै नाफा कमाए पनि लाभांश भने एनआइबिएलले धेरै दिने घोषणा गरेको छ।
गत आर्थिक वर्षमा नबिल बैंकले ३ अर्ब ६४ करोड रुपैयाँ खुद नाफा कमाएको थियो। त्यस्तै, एनआइबिएलको कमाइ ३ अर्ब १६ करोड रुपैयाँ थियो।
एनआइबिएलले बोनस सेयर र नगद लाभांश गरेर ४० प्रतिशत लाभांश दिने घोषणा गरेको छ। जसमा बोनस सेयर १८ र नगद लाभांश २२ प्रतिशत छ। एनआइबिएलले हाल कायम रहेको १० अर्ब ६४ करोड ५५ लाख ९९ हजार रुपैयाँ चुक्ता पूँजीको ४० प्रतिशत लाभांश वितरण गर्न लागेको हो। बैंकले प्रस्ताव गरेको बोनस सेयर वित्तरणपछि चुक्ता पूँजी १२ अर्ब ५६ करोड १८ लाख रुपैयाँ पुग्नेछ।
त्यस्तै, नबिल बैंकले गत वर्षको नाफाबाट लगानीकर्तालाई ३४ प्रतिशत लाभांश दिने प्रस्ताव गरेको छ। बैंकले १२ प्रतिशत बोनस सेयर र २२ प्रतिशत नगद लाभांश दिन लागेको हो। हाल बैंकको चुक्ता पूँजी ८ अर्ब ४ करोड ३२ लाख २१ हजार रुपैयाँ छ। १२ प्रतिशत बोनस सेयर वितरणपछि बैंकको चुक्ता पूँजी ९ अर्ब ८४ लाख ७ हजार रुपैयाँ पुग्नेछ।
सिद्धार्थ बैंकले ५ प्रतिशत बोनस सेयर र ८ दशमलब १६ प्रतिशत नगद लाभांश सहित १३ दशमलब १६ प्रतिशत लाभांश दिने प्रस्ताव गरेको छ। स्ट्यान्डर्ड चार्टर्ड बैंकले १७ दशमलब ५० प्रतिशत नगद लाभांश, एभरेस्ट बैंकले २० प्रतिशत नगद लाभांश, एनएमबी बैंकले १० प्रतिशत बोनस सेयर र २० प्रतिशत नगद लाभांश गरी ३० प्रतिशत लाभांश दिने प्रस्ताव गरेको छ।
यता सानिमा बैंकले १४ प्रतिशत, एनआइसी एसिया बैंकले १० दशमलब ५२ प्रतिशत, माछापुच्छ्रे बैंकले १० प्रतिशत, नेपाल बंगलादेश बैंकले १० दशमलब ५३ प्रतिशत नगद लाभांश तथा कुमारी बैंकले १२ दशमलब ७५ प्रतिशत बोनस सेयर दिने प्रस्ताव अघि सारेकाे छ।
गत आर्थिक वर्षको नाफाबाट जनता बैंक नेपालले ८ दशमलब ५० प्रतिशत नगद लाभांश, ग्लोबल आइएमई बैंकले १६ प्रतिशत बोनस सेयर, बैंक अफ काठमाण्डूले १४ प्रतिशत बोनस सेयर र ११ प्रतिशत नगद लाभांश सहित २५ प्रतिशत लाभांश, नेपाल एसबिआई बैंकले १० दशमलब ७९ प्रतिशत नगद लभांश र ५ प्रतिशत बोनस सेयरसहित १५ दशमलब ७९ प्रतिशत लाभांश प्रस्ताव गरेको छ।
सनराइज बैंकले ११ दशमलब ५ प्रतिशत नगद लाभांश र सिटिजन्स बैंकले ३ दशमलब ६३ प्रतिशत बोनस सेयर र १ दशमलब ६४ प्रतिशत नगद लाभांश गरी ५ दशमलब २७ प्रतिशत लाभांश प्रस्ताव गर्ने निर्णय गरेको हो।
५ आर्थिक वर्षमा १७ वाणिज्य बैंकको कति लाभांश?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
