सुर्खेत- बालिका बलात्कार गरी हत्या गर्ने ३ जनालाई जिल्ला अदालत सुर्खेतले जन्मकैद सजायको फैसला सुनाएको छ। सुर्खेतको पञ्चपुरी नगरपालिका–३ चौरकी गोरीकला रोकायको हत्यामा संलग्न तीन जनालाई अदालतले जन्मकैदको फैसला सुनाएको हो।
पञ्चपुरी–८ का लक्ष्मीप्रसाद बास्तोला, खुमप्रसाद बास्तोला र दैलेख घर भई सुर्खेतमा कार्यरत ट्राफिक प्रहरी हरिप्रसाद कोइरालालाई जिल्ला अदालत सुर्खेतले दोषी ठहर गरी जन्मकैदको फैसला सुनाएको हो।
फैसलाअनुसार उनीहरुलाई ३२ वर्षको जेल सजाय तोकिएको छ। हत्या र जबरजस्ति करणीको अभियोग पुष्टि गर्दै अदालतले २० वर्ष जन्मकैद सँगै थप १२ वर्ष कैद सजाय तोकेको हो। जिल्ला न्यायाधीश धु्रवकुमार शाहको एकल इजलासले गोरीकला हत्याको फैसला सुनाएको हो।
प्रतिवादी तीनै जनाले तत्कालीन मुलुकी ऐन २०२० को ज्यानसम्बन्धी महल १ र १३(३) अनुसार कसुर गरेको पुष्टि भएकाले सोही महलको १३ (३) अनुसार जन्मकैदको सजाय तोकिएको हो। यसका साथै अभियुक्तहरुमाथि जबरजस्ति करणीको कसुरको पुष्टि भएपछि मुलुकी ऐन २०२० बमोजिम जबरजस्ति करणी महल १ र ३ नम्बर महल अनुसारको कसुर गरेकाले महल ३ को (४) अनुसार ७ वर्ष र ३(क) अनुसार थप ५ वर्ष कैद सजाय हुने गरी ३२ वर्षको कैद सजाय फैसला गरिएको अदालतले जनाएको छ।
अदालतको फैसलाअनुसार अभियुक्त तीनैजनाले जबरजस्ति करणी महल १० नम्बर अनुसार १ लाख रुपैयाँ क्षतिपूर्तिसमेत तिर्नुपर्ने हुन्छ।
सूर्यप्रकाश माध्यामिक विद्यालय पञ्चपुरी–४, पलैटेबाट एसइई दिन बाबियाचौर पुगेकी गोरीकलाको २०७४ साल चैत १३ गते हत्या भएको थियो। प्रहरी अनुसन्धानबाट गोरीकलालाई बलात्कारपछि हत्या गरिएको पुष्टि भएपछि हत्या र बलात्कार कसुरअन्तर्गतको मुद्दा जिल्ला अदालत सुर्खेतमा दर्ता गरिएको थियो।
२०७५ बैसाख ९ गते जिल्ला अदालत सुर्खेतमा मुद्दा दायर भएको थियो। बैसाख ११ गते प्रारम्भिक फैसलामार्फत पुर्पक्षमा राख्न आदेश दिएको अदालतले मुद्दा दायर भएको ८ महिनापछि अन्तिम फैसला सुनाएको जिल्ला अदालत सुर्खेतका से्रस्तेदार भुपाल भण्डारीले जानकारी दिए।
२०७४ चैत ८ गतेदेखि सुरु भएको एसइई परीक्षा दिन बाबियाचौर बसेकी गोरीकला डेरामै मृत अवस्थामा भेटिएकी थिइन्। २०७४ चैत १३ गते राति उनको हत्या भएको थियो। हत्यामा संलग्न लक्ष्मी, खुम र हरिलाई जिल्ला कारागार सुर्खेतमा राखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
