काठमाडौं– कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको आशंकामा लिइएकाे स्थानीय प्रदीप रावल र विशाल चौधरीको डिएनए जाँचको रिपोर्ट प्रहरीको अपराध अनुसन्धान विभागमा थन्किएको छ।
बालिका पन्तको हत्या आरोपमा रावल र चौधरी पक्राउ परेपछि हौसिँदै प्रहरी अनुसन्धानमा जुटेको थियो। बयानमा रावलले स्विकार गरिसकेको र उनकै बयानका आधारमा चौधरीलाई पक्राउ गरिएको प्रहरी स्रोतले त्यसबेला बताएको थियो।
बालिका पन्तको हत्या भएपछि रावल हराउनुले पनि धेरै शंका गर्ने ठाउँ भएको भन्दै प्रहरीले रावलकाे यसअघिनै डिएनए जाँच गरेको थियो। रावलकाे बयानका आधारमा चौधरीको पनि डिएनए जाँचका लागि नमूना संकलन गरी नेपाल प्रहरीले आफ्नै केन्द्रीय विधिविज्ञान प्रयाेगशाला पठाएकाे थियाे।
स्रोतका अनुसार रावल र चौधरी दुबै जनाको डिएनए नमिलेपछि हौसिएको प्रहरी एकाएक निराश भएको थियो।
यसभन्दा अघि डिएनए जाँच राष्ट्रिय विधि विज्ञान प्रयाेगशाला, खुमलटारमा हुने गरेको थियो। सोही प्रक्रिया पूरा गर्न प्रहरीले रावल र चौधरीको डिएनए जाँच गर्न राष्ट्रिय विधि विज्ञान प्रयाेगशाला पठाएको थियो। तर, खुमलटारस्थित प्रयाेगशाला स्रोतले गत बिहीबार नै डिएनए जाँच गरेर प्रहरीलाई पठाइसकेको जनाएको छ। राष्ट्रिय विधि विज्ञान प्रयाेगशालाले यसभन्दा बढी डिएनएको बारेमा आफूले बोल्न नमिल्ने बताएको छ।
राष्ट्रिय विधि विज्ञानबाट प्रहरीको अपराध अनुसन्धान ‘अ’ विभाग पुगेको डिएनए रिपोर्ट अहिलेसम्म सार्वजनिक हुन सकेको छैन। हिजो (शनिबार)सम्म उक्त रिपोर्ट ‘अ’ विभागमै थन्किएको स्रोतले नेपाल लाइभलाई जानकारी दियो।
डिएनए रिपोर्टबारे सिआइबीले आफूलाई केही जानकारी नहुने र रिपोर्ट सिधै कन्चनपुर जाने बताएकाे छ। उता कञ्चनपुरका मुद्दा फाँटका डिएसपी कृष्ण ओझाले भने डिएनए रिपोर्ट आइनसकेको र ‘अ’ विभागमै थन्किएकोबारे आफूलाई जानकारी नभएको बताए।
प्रहरीले आफ्नै विधिविज्ञान प्रयाेगशालामा गरेकाे जाँचका क्रममा यसअघि नै दुबैकाे डिएनए जाँच नमिलेकाे रिपाेर्ट आइसकेकाेले पनि राष्ट्रिय विधि विज्ञानकाे रिपाेर्टप्रति चासाे नदिइएकाे बताइएकाे छ।
रावल पक्राउ परिसकेपछि रक्षामन्त्री ईश्वर पोखरेलले समेत हत्यारा पक्राउ परिसकेको र केही दिनमै सार्वजनिक गर्ने बताएका थिए। उता आइजिपी सर्वेन्द्र खनालसमेत आफैं प्रहरीको केन्द्रीय अनुसन्धान ब्युरो सिआइबीमा राति नै पुगेर बयान लिएका थिए।
दुई प्रहरीसहित ७ जनाको पनि डिएनए जाँच
बालिका पन्तको बलात्कार हत्या आरोपमा प्रहरीले थप ७ जनाको डिएनए जाँच गरेको छ। राष्ट्रिय अनुसन्धान विभागका २ जना सिपाही र थप ५ जना गरी ७ जनाको डिएनए जाँच गरिएको स्रोतले नेपाल लाइभलाई जानकारी दियो। उनीहरुको डिएनए रिपोर्ट भने आइनसकेको स्रोतले जानकारी दियो।
अहिले डिएनए जाँचका लागि पठाइएका सातै जनालाई सिआइबीका डिएसपी अंगुर जिसीको टोलीले सोधपुछ गरेर हत्यामा संलग्न नभएको देखिएको भन्दै छाडेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।