काठमाडौं- परराष्ट्रमन्त्री प्रदीपकुमार ज्ञवाली सोमबार बिहान २ बजे संयुक्त राज्य अमेरिका भ्रमणमा प्रस्थान गर्ने भएका छन्। अमेरिकी विदेशमन्त्री माइकल आर पोम्पियोको निमन्त्रणामा मन्त्री ज्ञवाली अमेरिका जान लागेका हुन्।
परराष्ट्रमन्त्री ज्ञवालीले अमेरिकी विदेशमन्त्री पोम्पियोसँग पुस ३ गते संयुक्त राज्य अमेरिकाकोझ राजधानी वासिङ्टन डिसीमा द्विपक्षीय वार्ता गर्ने कार्यक्रम रहेको परराष्ट्र मन्त्रालयले जारी गरेको प्रेस विज्ञप्तिमा उल्लेख गरिएको छ।
भ्रणका क्रममा मन्त्री ज्ञवालीले अमेरिकी राष्ट्रपति कार्यालय, अन्तर्राष्ट्रिय विकासका लागि अमेरिकी नियोग (युएसएआइडी) र मिलेनियम च्यालेञ्ज कर्पोरेसनका उच्च अधिकारीसँग पनि छुट्छुट्टै भेटवार्ता गर्नेछन्।
पुस ३ गते नै परराष्ट्र सचिव शङ्करदास बैरागीले अमेरिकी विदेश मन्त्रालयका दक्षिण तथा मध्य-एसिया मामिलासम्बन्धी प्रमुख उपसहायक सचिव एलाइस जी वेल्ससँग परामर्श बैठक गर्ने कार्यक्रम छ।
परराष्ट्रका सचिव बैरागीले नेतृत्व गर्ने परामर्श बैठकका सदस्यमा अमेरिकाका लागि नेपाली राजदूत अर्जुनकुमार कार्की, अर्थ र गृह मन्त्रालयका सहसचिव, परराष्ट्र मन्त्रालय र वासिङ्टन डिसीस्थित नेपाली दूतावासका अधिकारी छन्।
विगत १७ वर्षदेखि नेपाल र अमेरिकाका उच्च प्रतिनिधिबीच भेटवार्ता हुन सकेको थिएन। पछिल्लो समय नेपालले चीन र भारतलाई मात्रै महत्व दिएको भन्दै नेपालीस्थित अन्य विदेशी नियोगका प्रतिनिधिहरूले नेपाल सरकारसँग गुनासो गर्दै आएका छन्।
परराष्ट्र स्रोतका अनुसार केही विदेशी नियोगले नेपालको यो प्रवृत्तिप्रति गुनासो गर्दै सरकारलाई लिखित रुपमा नै असन्तुष्टि व्यक्त गर्दै आएका छन्।
परराष्ट्रमन्त्री ज्ञवालीको अघिल्लो महिना भएको जापान भ्रमणलाई पनि नेपाल-जापानबीचको सम्बन्ध सुधारका प्रयासका रुपमा हेरिएको छ। सरकारको पछिल्लो प्रवृत्तिप्रति गुनासो गर्ने देश जापान पनि रहेको थियो। नेपालको विकासमा जापान एक महत्वपूर्ण दातृ राष्ट्र हो। मन्त्री ज्ञवालीको अमेरिका भ्रमण पनि त्यसैको उपक्रम हुन सक्ने स्रोतको भनाइ छ।
मन्त्री ज्ञवाली पुस ६ गते शुक्रबार स्वदेश फर्कने कार्यक्रम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
