काठमाडौं– नेपाल दूरसञ्चार प्राधिकरणले गरेको मोबाइल सेवा व्यवस्थापन र प्रवर्द्धन प्रणालीको डिजाइन, विकास, आपूर्ति, स्थापना, परीक्षण, कमिसन, सञ्चालन र परामर्श सेवा (एमडिएमएस) सम्बन्धी कामका लागि गरेको ग्लोबल टेन्डरमा चलखेल सुरु भएको छ।
१३ मिलियन अमेरिकी डलर लागत अनुमान गरिएको ग्लोबल टेन्डरमा प्रधानमन्त्री केपी शर्मा ओलीको ठाडो निर्देशनमा सूचना तथा सञ्चारमन्त्री गोकुल बाँस्कोटाले चलखेल सुरु गरेका हुन्।
प्रधानमन्त्री ओली र सञ्चारमन्त्री बाँस्कोटाले प्रधानमन्त्रीका आइटी सल्लाहकार अस्गर अली पनि मालिक रहेको 'एफवन सफ्ट इन्टरनेसनल कम्पनी'लाई टेन्डर पार्नुपर्ने भन्दै प्राधिकरणमा दबाब दिन थालेका छन्।
एमडिएमएस प्रविधिका लागि गरिएको ग्लोबल टेन्डरमा सहभागी कम्पनीहरुमध्ये अस्गर अलीको कम्पनी ‘एफवन सफ्ट’ ‘जोइन्ट भेन्चर’का रुपमा सहभागी भएको ‘इन्भिगो अफ-सोर एसएएल कम्पनी’लाई टेन्डर पार्ने गरी काम गर्न प्राधिकरण अध्यक्ष दिगम्बर झालाई दबाब दिन थालिएको हो।
प्राधिकरण अध्यक्ष झाले पनि प्रधानमन्त्री ओली र सञ्चारमन्त्री बाँस्कोटाको निर्देशन अनुरुप टेन्डर प्रक्रिया अगाडि बढाउन निर्देशन दिएको प्राधिकरण स्रोत बताउँछ।
‘अध्यक्ष झाले मुल्यांकन कमिटी गठन गर्दा नै प्रधानमन्त्री ओली र बाँस्कोटाको निर्देशन अनुरुपमा काम गर्नुपर्ने भन्दै जिम्मेवारी दिएका छन्’, प्राधिकरण स्रोतले भन्यो, ‘मुल्यांकन कमिटीले अब औपचारिकताका लागि मात्रै काम गर्दैछ। टेन्डर प्रधानमन्त्री ओलीका आइटी सल्लाहकार अलीले नै पाउने निश्चित छ।’
टेन्डर प्रक्रियाको विषयमा नेपाल लाइभले प्राधिकरणका वरिष्ठ निर्देशक पुरुषोत्तम पौडेलसँग जिज्ञासा राखेको थियो– ‘प्रधानमन्त्री ओलीको निर्देशनले ठेक्का प्रक्रियालाई प्रभावित पार्दैछ रे हो?’
जिज्ञासाको जवाफमा उनले भने– ‘टेन्डरमा प्रक्रियामा सहभागी ४ वटा कम्पनीको विषयमा अहिले मुल्यांकन भइरहेको छ। मुल्यांकन कमिटीको सिफारिस नआउँदासम्म यसले नै टेन्डर पाउँछ भन्न मिल्दैन।’ तर, पौडेलले प्राधिकरणले टेन्डर मुल्यांकनका लागि गठन गरेको कमिटीको विषयमा भने कुनै जानकारी दिन नमिल्ने बताए।
‘एमडिएमएसका लागि ६ वटा कम्पनीले चासो देखाएपनि ४ वटा कम्पनी मात्रै ‘सर्ट लिस्ट’मा परेका छन्’, उनले भने, ‘अब यीनै चार कम्पनीमध्ये एक कम्पनी छनोट हुन्छ।’
‘प्राधिकरणले टेन्डर मुल्यांकन कमिटी गठन गर्नु औपचारिकताका लागि मात्रै हो’ स्रोतले भन्यो, ‘टेन्डर प्रधानमन्त्रीका आइटी सल्लाहकार अलीलाई नै दिने निश्चित छ।’
टेन्डरमा सहभागी कम्पनी
‘जोइन्ट भेन्चर’मा गरी कुल ४ कम्पनी टेन्डर प्रक्रियामा सामेल छन्।
टेन्डरमा प्रधानमन्त्रीका आइटी सल्लाहकार अलीको ‘एफवन सफ्ट इन्टरनेसनल कम्पनी’ले लेवनानको ‘इन्भिगो अफ-सोर एसएएल कम्पनी’सँग ‘जोइन्ट भेन्चर’मा उपस्थित भएको छ।
यसैगरी, मोबाइल ट्रेड इन्टरनेसनल प्रालि नेपाल, इन्फ्रा डाटा एनभी, बेल्जियम र ग्रिन आइटी सोलुसन प्रालि, नेपाल पनि ‘जोइन्ट भेन्चर’कै रुपमा टेन्डर प्रक्रियामा सहभागी छन्।
तेस्राे कम्पनीमा एसआइसिएपी, स्विजरल्यान्ड तथा चाैथाे कम्पनीकाे रुपमा न्युमेरिया मलेसिया, ओएसए, भारत र नमस्ते ग्लोबल, सिंगापुर पनि ‘जोइन्ट भेन्चर’का रुपमा सहभागी छन्।
यस्तो छ चलखेल गुत्थी
नेपाल दूरसञ्चार प्राधिकरणले गत मे ११ मा एमडिएमएस प्रविधिका लागि काम गर्न इच्छुक कम्पनीसँग आसयपत्र माग गरेको थियो। आसयपत्रमा सहभागी कम्पनीहरुमध्ये ६ वटा कम्पनीलाई प्राधिकरणले ‘सर्ट लिस्ट’ गरेको थियो।
‘सर्ट लिस्ट’मा परेका कम्पनीहरु मध्येबाट फेरि अक्टोबर १२ मा प्राधिकरणले प्राविधिक तथा आर्थिक प्रस्ताव माग गरेको थियो। प्राधिकरणले गरेको टेन्डरमा ‘सर्ट लिस्ट’मा परेका ६ मध्ये ४ कम्पनीले मात्रै प्रस्ताव पेस गरे। तर, प्रस्ताव पेस गर्ने ४ कम्पनीमध्ये प्रधानमन्त्री ओलीका आइटी सल्लाहकार अस्गर अलीको ‘एफवन सफ्ट इन्टरनेसनल’ समेत सहभागी भएको ‘इन्भिगो अफ-सोर एसएएल’ले टेन्डर प्रक्रियामा सहभागी हुन राख्नुपर्ने धरौटी रकम दाखिला गरेको थिएन।
तर, प्राधिकरणका अध्यक्ष दिगम्बर झाले प्रधानमन्त्रीको निर्देशनमा प्राधिकरणको खरिद नियमावली भन्दा बाहिर गएर कम्पनीको मुल्यांकनमा सहभागी गराएका हुन्।
प्रस्तावमा भनेअनुसार धरौटी रकम नराख्ने कम्पनीलाई सार्वजनिक खरिद ऐन अनुसार टेन्डर प्रक्रियाबाट बाहिर निकाल्न सक्ने अधिकार छ। कि त पुनः टेन्डर गर्दै उसलाई धरौटी रकम राख्न लगाउनु पर्ने व्यवस्था छ। तर, प्राधिकरणका अध्यक्ष झाले पुनः टेन्डर आह्वान नगरी अस्गर अलीको कम्पनीसमेत रहेको ‘जोइन्ट भेन्चर’ कम्पनीको मुल्यांकन अगाडि बढाएका हुन्।
‘बालुवाटार र सञ्चार मन्त्रालयबाट ठाडो निर्देशनको जादु चलेपछि कसको के लाग्छ र?’, प्राधिकरणका एक कर्मचारीले भने, ‘आफन्तवादको नमूना यता पनि कार्यान्वयन हुँदैछ।’
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।