कठमाडौ- राष्ट्रिय सतर्कता केन्द्रले समयकाे पालना नगर्ने ५ सय ३० जना कर्मचारीलाई कारबाही गर्न सिफारिस गरेको छ।
केन्द्रले साउन यता १ सय ४० वटा कार्यालयमा गरेको छड्के अनुगमनका क्रममा ठीक समयमा कार्यालय नआउने ३ सय १८ र तोकिएको पोशाक नलगाउने १ सय ६२ गरी ५ सय ३० जना कर्मचारीलाई कारबाहीका लागि सिफारिस गरेको केन्द्रका प्रवक्ता विष्णुराज लामिछानेले बताए।
यसरी छड्केमा परेका कर्मचारीलाई विभागीय कारबाही गर्न सम्बन्धित कार्यालयका प्रमुखलाई निर्देशन दिइएको उनले बताए।
केन्द्रले गत आर्थिक वर्षमा ५२ जिल्लाका १ हजार १ सय ४० कार्यालय अनुगमन गर्दा करिब २ हजार ३ सय ४० जना कर्मचारीले समय पालना नगरेको पाएको उल्लेख गरेकाे छ। उनीहरुले कार्यालयमा पोशाक समेत नलगाउने गरेकाले कारबाहीको लागि सिफारिस गरेको थियाे।
यस्तै २ सय ३७ स्थानीय तहका जनप्रतिनिधिले अझै सम्पत्ति विवरण नबुझाएको समेत केन्द्रमा जनाएको छ। मुख्यमन्त्री कार्यालयबाट कात्तिक मसान्तसम्म स्थानीय तहका जनप्रतिनिधिको सम्पत्ति विवरण केन्द्रमा आउनुपर्ने लामिछानेले बताए।
स्थानीय तहका जनप्रतिनिधिको सम्पत्ति विवरण जिल्ला समन्वय समितिमार्फत मुख्यमन्त्रीमा जाने र मुख्यमन्त्रीबाट केन्द्रमा जानुपर्ने हुन्छ। यसरी सम्पत्ति विवरण नबुझाउनेमा सबैभन्दा बढी प्रदेश २ का स्थानीय तहका जनप्रतिनिधि रहेको उनले बताए।
सम्पत्ति विवरण बुझाउन सर्तकता केन्द्रले ताकेता गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
