पोखरा- घटना १ : बसको छतमा राखेर ल्याइँदै गरेको एउटा हाते ट्याक्टर पोखरा अमरसिंहको बिजुली तारमा अड्कियो। दुर्घटना नभए पनि त्यसले सञ्चारमाध्यममा ठूलै चर्चा पायो। सम्बन्धित निकायले दिनभर लगाएर उक्त समस्या पार गरेका थिए। यो चैत ९ गतेको कुरा हो।
घटना २ : अघिल्लो वर्षकै साउन २६ गते पोखरा रानीपौवा सडक खण्डमा मोटरसाइकलमा हिँडिरहेका एक व्यक्तिमाथि अचानक बिजुलीको तार चुँडिएर लाग्यो। ती व्यक्तिको पछि ज्यान गयो। त्यसले पनि ठूलै चर्चा पाएको थियो।
घटना ३ : साउन २ गते पोखरा गणेश टोलमा एक्कासी आगलागी भयो। सो आगलागी अव्यवस्थित तारकै कारण भएको अनुसन्धानमा खुल्यो।
यी घटना प्रतिनिधिमात्र हुन्। पोखरामा अव्यवस्थित तारजाली लगाइएकै कारण सर्वसाधारणमात्रै नभएर महानगर स्वयम्समेत समस्यामा पर्दै आएको छ।
सडकमा रहेका बिजुली, केबुल, टेलिफोन र इन्टरनेटका अव्यवस्थित तारकै कारण दुर्घटनाको जोखिम बढेपछि महानगरले बिहीबारबाट तारजाली हटाउन सुरु गर्ने भएको छ। केही समयअघि महानगरले नेपाल विद्युत प्राधिकरण, इन्टरनेट सेवा प्रदायक संस्था, नेपाल टेलिकम, केबल व्यवसायी लगायतका संस्थालाई बोलाएर तार व्यवस्थापनमा सहयोग गर्न आग्रह गर्दै सूचना प्रकाशित गरेको थियो।
महानगरले सूचना प्रकाशित गरेपछि नेपाल टेलिकम, नेपाल विद्युत प्राधिकरण, एनसेलसहित बाराही इन्टरनेट, टेलनेट प्रालि, पोखरा केबल, वर्डलिंक कम्युनिकेसन र पोखरा इन्टरनेट संस्थासँंगको मंगलबार भएको बैठकले तार व्यवस्थापन गर्न सहजिकरण समिति गठन गरेको छ। पोखरा महानगरका प्रमुख मानबहादुर जिसी, महानगरका प्रमुख प्रशासकीय अधिकृत शेषनारायण पौडेलसहित बसेको बैठकले महानगरका उपसचिव तथा सूचना अधिकारी गंगालाल सुवेदीको संयोजकत्वमा तार व्यवस्थापन सहजिकरण समिति गठन गरेको छ।
कोको छन् समितिमा?
समितिको सदस्यमा नेपाल टेलिकमका शेषकान्त बस्याल, नेपाल विद्युत प्राधिकरणका इन्जिनियर आनन्द सापकोटा, सुबोध रेग्मी, सुरेन्द्रबहादुर थापा, सोमराज गुरुङ,बिनोद हुमागार्इं,मनोज गुरुङ, अजित तामाङ, विनोद केसी, महानगरका नगर प्रहरी असई पुरुषोत्तम थापा, सूचना प्रविधि अधिकृत, पोखरा महानगरपालिका इन्जिनियर अशोक द्वारे छन्।
कहाँकहाँको तार हटाउने?
महानगरले पहिलो चरणमा सिद्धार्थ चोक – विपी चोक – न्यूरोड – सभागृह चोकको तार व्यवस्थिगत गर्ने भएको छ। महानगरका प्रमुख मानबादुर जिसीका अनुसार बिहीबार बिहान विपीचोकबाट तार व्यवस्थित गर्ने अभियान सुरु गरिने भएको छ।
दोस्रो चरणमा विपी चोक– साघँुको मुख– महेन्द्र पुल, – नयाँ बजार–पृथ्वीचोक– सभागृहचोक, तेस्रो चरणमा सभागृहचोक– सृजनाचोक–जिरो किमी–हल्लनचोक र चौथो चरणमा हल्लनचोक–सहिदचोक– मुस्ताङचोकसम्मका पोलका तारलाई व्यवस्थित गरिने मेयर जिसीले जनाए।
‘तार व्यस्थापन गर्दा सम्बन्धित निकाय सबै उपस्थित हुने निर्णय भएको छ। जुन कम्पनीको तर छ, त्यही कम्पनी स्वयम्ले तार व्यवस्थापन गर्नुपनेछ,’ महानगरका प्रमुख प्रशासकीय अधिृकत शेषनारायण पौडेलले भने। तार हटाउन प्राविधिक सहयोग नेपाल टेलिकमले उपलब्ध गराउने भएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।