काठमाडौं– नेपाली कांग्रेसको महासमिति बैठकमा १४ सयभन्दा बढी महासमिति सदस्यहरु सहभागी हुने भएका छन्। संघीय संरचनाअनुसार कांग्रेसको कार्यसमिति नभएको हुँदा बैठकमा विगतकै निर्वाचन प्रणालीअनुसार महासमिति सदस्यहरु सहभागी हुनेछन्।
संघीय संरचनाअघि कायम दुई सय ४० निर्वाचन क्षेत्रबाट महासमिति सदस्य छनोट भएका छन्। प्रत्येक निर्वाचन क्षेत्रबाट एक महिलासहित पाँच जना सहभागी हुनेछन्। त्यसअनुसार १२ सय प्रतिनिधि हुनेछन्।
भ्रातृ, जनसम्पर्क र शुभेच्छुक संगठनबाट ५४÷५४ का दरले सदस्यहरु सहभागी हुने हुनेछन्। कांग्रेसको विधानअनुसार जनसम्पर्कबाट एक समिति बराबर तीन जना सहभागी हुने व्यवस्था छ। नेपाली कांग्रेसका १३ भ्रातृ संस्था छन् भने १७ वटा शुभेच्छुक संस्था रहेका छन्। महासमिति बैठक पुस ३ गते सकिनेछ।
भ्रातृ संस्थाहरुबाट महासमिति बैठकका लागि छनोट हुने गरेका छन्। शुभेच्छुक संस्थाबाट भने केहीले मात्रै प्रतिनिधि पठाउन पाउने प्रवक्ता विश्वप्रकाश शर्माले जानकारी गराए।
नेपाल महिला संघ, तरुण दल, विद्यार्थी संघ, किसान संघ, दलित संघ, भूतपूर्व सैनिक संघ, प्रजातातन्त्र सेनानि संघ, आदिवासी जनजाति संघ कांग्रेसका भ्रातृ संस्था हुन्। त्यसैगरी लोकतान्त्रिक अपांग संघ, नेपाल तामाङ संघ, मुस्लिम संघ, राष्ट्रिय मगर संघ र ठाकुर समाज पनि कांग्रेसका भ्रातृ संगठन हुन्।
महासमिति बैठकमा १२औं महाधिवेशनअघि केन्द्रीय सदस्य रहेकाहरु स्वतः प्रतिनिधि बन्ने व्यवस्था छ। पार्टी सभापतिले बैठकमा सहभागी बनाउन १० जना चयन गर्नसक्ने विधानमा व्यवस्था छ।
औपचारिक सुरुवात २९ बाट
शुक्रबारबाट सुरु हुने भनिएको महासमिति बैठकको औपचारिक सुरुवात शनिबारबाट हुने भएको छ। २८ गते केन्द्रीय कार्यलयमा महासमिति सदस्यहरुलाई स्वागत गर्ने बताइएको छ। साथै, सहभागीलाई बैठकको दस्तावेज प्रदान गरिने तथा नामावली रजिष्ट्रेसनको काम हुनेछ।
शनिबार बिहान ११ बजे योगाम्बर पार्टी प्यालेसमा उद्घाटन हुने कार्यतालिका बनाइएको छ। भृकृटीमण्डपमा गर्ने भनी पूर्व घोषित स्थानलाई परिर्वतन गरिएको छ।
बासको व्यवस्था आफैं गर्नुपर्ने
खर्च कम गर्ने उद्देश्यले व्यवस्थापन समितिले साँझको खाना र बासको व्यवस्था आफैं गर्नुपर्ने जनाएको छ। सहभागीहरुले साँझ चिया सहितको नास्ता, अपरान्ह खाना र दिउँसो चिया प्राप्त गर्नेछन्।
बैठकमा उपस्थित हुन आउनेहरुले बासको व्यवस्था आफ्नै तरिकाले गर्नसक्ने भएकाले व्यवस्थापन समितिले रातको बसाइको व्यवस्था नगरेको काठमाडौं कांग्रेसका सभापति सबुज बानियाले बताए। उनले भने, 'बस्नको लागि व्यवस्थापन नगर्दा खर्चमा धेरै कमी आउँछ।’
प्रवक्ता शर्माले कूल खर्च बैठक सकिएपछि मात्रै जानकारी हुने भन्दै अनुमानित खर्च एक करोड रुपैयाँ हुने बताए। शर्माले महासमिति बैठकको तयारी सकिएको जानकारी गराए।
असहमतिकै विधान पेस हुनसक्ने
विधानका विषयमा केन्द्रीय कार्य समितिमा फरकफरक विचार आएपछि पार्टी सभापतिले असहमतिकै विधान महासमिति बैठकमा पेस गर्ने तयारी गरेका छन्।
मंसिर १३ बाट सुरु भएको केन्द्रीय समितिको बैठकमा संस्थापन पक्ष र इतर समूहले आ आफ्नो अडान राख्दा सर्वसम्मतिको विधान नबन्ने सम्भावना बढेको छ। पदाधिकारी, केन्द्रीय समिति सदस्य, सभापतिको अधिकार, प्रदेश र जिल्ला समितिको अधिकार लगायतका विषयमा विवाद कायम छ।
संस्थापन पक्षले पदाधिकारीको व्यवस्थालाई वर्तमानकै निरन्तरता दिन चाहेको छ। इतर पक्षले केन्द्रीय समितिको संख्या बढाएपछि सोहीअनुरुप पदाधिकारी पनि बढाउनुपर्ने विचार राखेको छ।
विधानमा सहमति जुटाउन नसकेपछि केन्द्रीय समितिको बैठक विषयान्तर भएको छ। पार्टीको आर्थिक प्रतिवेदन बैठकले सोमबार पारित गरेको छ भने मंगलबारको बैठक राजनीतिक प्रतिवेदनमा केन्द्रित भएको छ।
प्रवक्ता शर्माले केन्द्रीय समितिबाट विधान सर्वसम्मत हुन नसके सहमति भएका र हुन नसकेका दुवै विचार महासमितिमा पेस हुने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
